ဘယ်သူမှန်လို့ ဘယ်သူမှားတယ်

လမ်းသွားရင်း အမှတ်မထင် လူသွားလမ်းပေါ်မှာ အမှိုက်တွေကို မျက်စိနောက်အောင် တွေ့မိလိုက်တဲ့အခါ ခင်ဗျား တိတ်တဆိတ်ရေရွတ်မိမယ်။ တော်တော်စည်းကမ်းမရှိတဲ့လူတွေလို့ပေါ့။

ဒါပေမယ့် သေသေချာချာပြန်စဉ်းစားကြည့်ပါ။ ခင်ဗျားကော အမှတ်တမဲ့နဲ့ တစ်ရှုးစလေး၊ ရေသန့်ဘူးခွံလေးတစ်ခုကို ဒီတိုင်းပစ်ချခဲ့ဖူးတယ်မဟုတ်လား။ အခုအချိန်က သူတစ်ပါးကိုချည်း အပြစ်တင်ရမယ့်အချိန်မဟုတ်တော့ပါဘူး။

စကားပုံတစ်ခုရှိပါတယ်။ လက်ညှိုးတစ်ချောင်းက သူများဘက်ကိုထိုးနေချိန်မှာ ကျန်တဲ့လေးချောင်းက မိမိဘက်ကို ပြန်ထိုးနေပါသတဲ့။ တစ်ခုခုကို သူများကိုအပြစ်တင်နေမယ့်အစား ကိုယ့်ဘာသာကိုယ်ဆင်ခြင်ရမယ့် အချိန်ကာလပါ။ အရမ်းရောင်းကောင်းတဲ့ စားသောက်ဆိုင်တစ်ခုမှာ လူတွေ အတင်းတိုးဝှေ့နေရတာ တစ်ဦးကိုတစ်ဦး Respect ဆိုတဲ့ လေးစားသမှုမထားပဲ ကိုယ့်အတွက်သာကိုယ်ကြည့်ကြတာမျိုးဟာ စည်းကမ်းရှိတဲ့လူတွေရဲ့ အပြုအမူမျိုးမဟုတ်ပါဘူး။

လမ်းသွားရင်း မသိမသာ အများပိုင်လမ်းပေါ် ကွမ်းတံတွေးထွေးချပြီးမှ လက်ဖက်ရည်ဆိုင်မှာ ဒီကလူတွေ စည်းကမ်းမရှိလို့ တိုင်းပြည်မတိုးတက်တာ ဘာညာပြောနေဖို့ ခင်ဗျားလိပ်ပြာလုံပါရဲ့လား။ စည်းကမ်းတကျနေတတ်ဖို့ဆိုတာ သူများတကာကို လိုက်တိုက်တွန်းနေရမယ့် အလုပ်မျိုးမဟုတ်ပါဘူး။ ခင်ဗျားကိုယ်တိုင် ပြင်ရမယ့်အလုပ်မျိုးပါ။

ကိုယ့်ရဲ့ရပိုင်ခွင့်ကို အပြည့်အဝယူသလို တစ်ပါးသူရဲ့အခွင့်အရေးကိုလည်း လေးစားတတ်ရပါမယ်။ နားအေးပါးအေးထိုင်ချင်လို့ အေးအေးဆေးဆေးရှိတဲ့ စားသောက်ဆိုင်ကို လာကြတဲ့သူတွေကြားမှာ ခင်ဗျားဟာ အလိုက်သိတတ်ရပါမယ်။ တစ်ဆိုင်လုံးမှာ မိမိတို့တစ်ဝိုင်းထဲလူရှိသလိုမျိုး ဟေးလားဝါးလားလုပ်မနေသင့်ပါဘူး။ ကိုယ်ပိုင်ကားတွေနဲ့ မိုးရွာထဲကားမောင်းတဲ့အခါ လမ်းဘေးပလက်ဖောင်းမှာ လမ်းလျှောက်နေသူတွေကို လေးစားတတ်ရပါမယ်။ လမ်းလျှောက်နေသူကလည်း ဘေးဘယ်ညာ သေချာလေ့လာသင့်ပါတယ်။ ဥပမာ လမ်းကူးလို့ရတဲ့ လူရုပ်လေးပေါ်လာမှ ကူးတာမျိုး ကားရှင်းမှ ကူးတာမျိုးပေါ့။

တန်းစီတယ်ဆိုတာ အဓိပ္ပါယ်မဲ့ ပျော်သလို လျှောက်လုပ်နေတာမဟုတ်ပါဘူး။ ဒါကြောင့် သူတစ်ပါးအခွင့်အရေးကို လေးစားပြီး တန်းစီတတ်အောင် သင်ယူပါ။ ကိုယ်ပြုလုပ်တဲ့ တစ်စုံတစ်ခုဟာ ကိုယ့်ဆီကိုပဲ ပဲ့တင်သံအနေနဲ့ ပြန်လာတတ်ပါတယ်။ လူတစ်ဦးချင်းကသာ စည်းကမ်းတကျပြုမူနေထိုင်မယ်ဆိုရင် ပိုပြီးနေပျော်ဖို့ကောင်းတဲ့ ပတ်ဝန်းကျင်တစ်ခုဖြစ်လာမှာပါ။ အနည်းဆုံးတော့ စိတ်ထဲလုံခြုံမှုရှိတယ်လို့ ခံစားရမှာပါပဲ။ သူများနိုင်ငံက မြို့တော်တွေ၊ လမ်းတွေ ကြည့်ပြီးအားကျနေရုံနဲ့တော့ ဘာမှဖြစ်လာမှာမဟုတ်ပါဘူး။ သူတို့တွေ ဘယ်လိုပြုမူနေထိုင်တယ်ဆိုတာ လေ့လာအတုယူသင့်ပါတယ်။ ဒီဆောင်းပါးလေးကြောင့် အနည်းဆုံးတော့ အမှိုက်တစ်စလောက်ကို အမှိုက်ပုံးထဲ သေသေချာချာ ပစ်ခဲ့ပြီဆိုရင်တော့ ကျွန်တော်ကျေနပ်မိပါပြီ။

EL (ရိုးရာလေး)