အချိန်”မီ” လား ၊ အချိန် “မှီ” လား

အခုတစ်ပတ်မှာတော့ လူအများစုအတွက် ရောထွေးနေဆဲဖြစ်တယ်လို့ ယူဆရတဲ့ “မီ” နဲ့ “ မှီ”  ကွာခြားချက်ကို ဖော်ပြပေးသွားမှာ ဖြစ်ပါတယ်။

“ မီ “ ဆိုတာက “မိ” ဆိုတဲ့ စကားလုံးနဲ့ အနက်ရင်း တူပါတယ်။ တစ်စုံတစ်ရာကို (ဆုပ်ကိုင်)မိ လိုက်တယ် ၊ ထိထိမိမိ ရှိတယ် (မပိုမလျော့ဘူး) ဆိုတဲ့ သဘောမျိုးတွေအတွက် “မီ” ကို သုံးပါတယ်။

အဲဒါကြောင့် “အချိန်မီ” ဆိုတဲ့ စကားလုံးတွေ ၊ “ကျောင်းကို မီအောင် သွားရမည် “ ဆိုတဲ့ နေရာတွေမှာ “ မီ “ ကို သုံးရမှာ ဖြစ်ပါတယ်။ “ခေတ်မီ” ၊ “စံချိန်မီ” ဆိုတဲ့ စကားလုံးတွေမှာလည်း “ ခေတ်ကို မီအောင် ၊ခေတ်နဲ့ ထိစပ်ယှဉ်တွဲအောင် လိုက်နိုင်တယ် “ ၊ “စံချိန်နဲ့ မပိုမလျော့ ဖြစ်တယ် “ ဆိုတဲ့ အဓိပ္ပာယ်နဲ့ “မီ” ကို သုံးရပါတယ်။

နောက်ထပ် “မီ” ကို သုံးတဲ့ နေရာတစ်နေရာကတော့ “မ” နဲ့ ဆက်စပ်ပြီး သုံးတာ ဖြစ်ပါတယ်။ “ခင်” ဆိုတဲ့ စကားလုံးနေရာမှာ “မီ” ကို အစားထိုးပြီးသုံးတာမျိုးပါ။

ဥပမာ ပြရရင် မကြာခင် ၊ မသွားခင် ၊ အစာမစားခင် ဆိုတဲ့ စကားလုံးတွေနေရာမှာ မကြာမီ ၊ မသွားမီ ၊ အစာမစားမီ ဆိုပြီး သုံးတာပါ။

“မှီ” ဆိုတဲ့ စကားလုံးကတော့ တစ်ခုခုကို ယှဉ်ကပ်အားပြုတာ ၊ အားကိုးအားထားပြုတာကို ဆိုလိုပါတယ်။ “မှီခိုတာ၊ မှီတင်းတာ ၊ မှီဝဲတာ “ စတဲ့ စကားလုံးတွေမှာ သုံးပါတယ်။ မေ့သွားရင်တော့ “ ကြီးရင်မှီ ၊ ငယ်ရင်ချီ “ ဆိုတဲ့ စကားပုံကို သတိရလိုက်ရုံပါပဲ။ 


Design - Ti Nyain
ကိုးကား ။ ။ ပညာရေး ဝန်ကြီးဌာန မြန်မာစာအဖွဲ့ထုတ် “မြန်မာစာ မြန်မာစကား”