“သွားခါနီး လာခါနီး “ လား ၊ “သွားကာနီး လာကာနီး” လား

ဒီတစ်ပတ်မှာတော့ ရောထွေးတတ်တဲ့ မြန်မာစကားအသုံးအနှုန်းတွေထဲက “ကာ” နဲ့ “ခါ” အကြောင်းကို ပြောပြသွားမှာ ဖြစ်ပါတယ်။

လူအများစု သိပြီးသား အကြောင်းအရာပေမယ့် အမှတ်တမဲ့ မှားယွင်းသုံးစွဲမိတာတွေ ရှိတတ်လို့ ပြန်လည်ဆွေးနွေးကြည့်ရအောင်လေ။ 


တစ်ပြိုင်နက် ဖြစ်စေ ၊ ဆက်တိုက်ဖြစ်စေ ဖြစ်ပျက်နေတဲ့ အကြောင်းအရာတွေကို ဖော်ပြချင်ရင် “ကာ” ကို သုံးပါတယ်။


ဥပမာ - ရယ်ကာ မောကာ ပြောသည်။
အင်တာနက်ဖွင့်ကာ facebook သုံးသည်။


အချိန်၊ အခါ ၊ ကာလတွေကို ပြချင်ရင်တော့ “ခါ”  ကို သုံးပါတယ်။


ဥပမာ - ငယ်စဉ် အခါ ပညာရှာ
“ဖြစ်ခါမှ ဖြစ်ရော ရသလောက် ကြိုးစားရမှာက ကိုယ့်တာဝန် “ (ဒီမှာ “ ဖြစ်တဲ့ အချိန်အခါမှ ဖြစ်ရော  “ ဆိုတဲ့ သဘောနဲ့ “ ခါ” ကို သုံးတာပါ )
ခေါင်းစဉ်က မေးခွန်းအတွက်လည်း အဲဒီသဘောပါပဲ။ အချိန်အခါကို ပြတဲ့ သဘောနဲ့ “သွားခါနီး လာခါနီး” လို့ သုံးထားတာပါ။


မှားယွင်းရောထွေးတတ်တဲ့ မြန်မာစာ အသုံးအနှုန်းတွေကို ရိုးရာလေးက ပုံမှန်တင်ဆက် မျှဝေပေးလျက် ရှိနေပါတယ်။

ကိုးကား ။ ။ ပညာရေး ဝန်ကြီးဌာန မြန်မာစာအဖွဲ့ထုတ် “မြန်မာစာ မြန်မာစကား”

(Design - Ti Nyain)