“ဖြည်းဖြည်း” လား ၊ “ဖြေးဖြေး” လား

ရောထွေးမှားယွင်းတတ်တဲ့ မြန်မာစကားလုံးတွေ၊ အသုံးအနှုန်းတွေကို ရိုးရာလေးက မျှဝေပေးလျက် ရှိပါတယ်။

ဒီတစ်ပတ်မှာတော့ “ဖြည်းဖြည်း” နဲ့ “ ဖြေးဖြေး “ ဘယ်စာလုံးပေါင်းက အမှန်လဲ ဆိုတာကို တင်ဆက်သွားမှာပါ။


တကယ်ကတော့ “ဖြည်းဖြည်း” ဆိုတဲ့ သတ်ပုံကသာ အမှန်ပါ။ စာလုံးပေါင်းသတ်ပုံကျမ်း တွေ ၊ အစဉ်အဆက်က ဝဏ္ဏဗောဓနသတ်အင်း ၊ ကဝိလက္ခဏသတ်ပုံသံပေါက် ၊  ကဗျာသာရတ္ထ သင်္ဂဟကျမ်းတွေမှာ “ဖြည်းဖြည်း” လို့သာ ဖော်ပြခဲ့ပါတယ်။ အဲဒါကြောင့်  တချို့ ဆိုင်းဘုတ်တွေ၊ သတိပေးစာမှာ မြင်ရတဲ့ “ဖြေးဖြေးမောင်း “ ၊ “ဖြေးဖြေးတက် ၊ ဖြေးဖြေးဆင်း “ ဆိုတာဟာ စာလုံးပေါင်း ရေးထုံးအနေနဲ့ မှားယွင်းနေတယ်လို့ ဆိုရမှာပါ။


ဒါပေမယ့် တစ်ဖက်က ကြည့်ရင် ဘာသာစကားဆိုတာ ပုံသေမရှိတဲ့ သဘော၊ ပြောင်းလဲနေတတ်တဲ့ သဘောရှိပါတယ်။ ပုဂံခေတ်က သုံးခဲ့တဲ့ “ အတို့ကျွန်” ဆိုတဲ့ စကားလုံးမျိုးကို အခုအချိန်မှာ ဘယ်သူမှ မသုံးတော့ပါဘူး။ ပိုပြီး နီးစပ်တဲ့ ဥပမာပြရရင် အရင်က စာအုပ်အဟောင်းတွေမှာ စာဖတ်တာကို “စာဘတ်နေသည် “ လို့ စာလုံးပေါင်းတာမျိုး ၊ ဖမ်းတာကို “ဘမ်း”တာ လို့ စာလုံးပေါင်းတာမျိုးတွေ မြင်ဖူးခဲ့ကောင်း မြင်ဖူးခဲ့ပါမယ်။ အခုအချိန်မှာတော့ “ဖတ်” ၊ “ဖမ်း” ဆိုတာတွေကိုပဲ အတည်ပြု သုံးစွဲနေပါတယ်။ ဒါကို ကြည့်ရင် ဘာသာစကားရဲ့ ပြောင်းလဲတတ်တဲ့ သဘောကို မြင်ရမှာပါ။ အခု ရိုးရာလေးက ပုံမှန်ဖော်ပြနေရတဲ့ အဓိက ရည်ရွယ်ချက်က လက်ရှိအချိန် ၊ မြန်မာစာ မြန်မာစကားမှာ စံနှုန်းသတ်မှတ် အတည်ပြုထားတဲ့ စာလုံးပေါင်းသတ်ပုံနဲ့ အသုံးအနှုန်းတွေအကြောင်း သတိပြုမိစေချင် ၊ ဗဟုသုတ ရစေချင်တဲ့ ရည်ရွယ်ချက်နဲ့ပဲ ဖြစ်ပါတယ်။


မှားယွင်းရောထွေးတတ်တဲ့ မြန်မာစာ အသုံးအနှုန်းတွေကို ရိုးရာလေးက ပုံမှန်တင်ဆက် မျှဝေပေးလျက် ရှိနေပါတယ်။


ကိုးကား ။ ။ ပညာရေး ဝန်ကြီးဌာန မြန်မာစာအဖွဲ့ထုတ် “မြန်မာစာ မြန်မာစကား”
(Design - Ti Nyain)