ဝက်ခြံနှင့် မျက်နှာပေါ်က အန္တရာယ်ဇုံ

ဝက်ခြံညှစ်ခြင်းက ဝက်ခြံတွေကို ပိုဆိုးစေ၊ ပိုးဝင်စေ၊ အမာရွတ်တွေကျန်စေနိုင်မှန်း တော်တော်များသိကြပါတယ်။ သို့သော်လည်း တကယ့်တကယ်ဝက်ခြံပေါက်လာတဲ့အခါ ညှစ်ကောင်းကောင်းနဲ့ ညှစ်မိကြပြန်ပါတယ်။

တစ်ခါတစ်ခါ ဝက်ခြံအညှစ်မတော်တဲ့အခါ ဝက်ခြံလေးတစ်ခု အခြေပြုပြီး အထက်မှာပြောထားတဲ့ ဆိုးကျိုးတွေထက် အဆပေါင်းများစွာ ပိုဆိုးပြီး အသက်အန္တရာယ်ကိုတောင် ထိခိုက်နိုင်တဲ့ အန္တရာယ်တွေကျရောက်လာနိုင်ပါတယ်။

ဟုတ်ပါတယ်။ သင့်မျက်နှာပေါ်မယ် သင်မသိသေးတဲ့ အန္တရာယ်ဇုံ (တစ်နည်း..အန္တရာယ်တြိဂံ) တစ်ခုရှိနေပါတယ်။ သင်မြင်အောင်ပြောပြရမယ်ဆိုရင်....စိတ်ကူးထဲမှာ အမှတ်လေးတွေ နေရာချကြည့်ပါ

- သင့်မျက်လုံးနှစ်လုံးရဲ့ကြား အလယ်တည့်တည့်မှာ တစ်မှတ်

- သင့်ညာဘက်နှုတ်ခမ်းထောင့်မှာ တစ်မှတ်

- သင့်ဘယ်ဘက်နှုတ်ခမ်းထောင့်မှာ တစ်မှတ်

အဲဒီအမှတ် သုံးမှတ်ကို စိတ်ကူးထဲမှာ မျဉ်းကြောင်းလေးတွေနဲ့ဆက်ကြည့်ပါ။ တြိဂံတစ်ခုပုံပေါ်လာပါလိမ့်မယ်။ အဲဒီတြိဂံကတော့....အခုကျွန်မပြောချင်တဲ့ မျက်နှာပေါ်က အန္တရာယ်ဇုံ (ခေါ်) အန္တရာယ်တြိဂံပါပဲ။ ဒီနေရာရဲ့နောက်ဖက်မှာ Cavernous Sinus လို့ခေါ်တဲ့ အရေးကြီးတဲ့အခန်းတစ်ခန်းရှိပါတယ်။ ဦးနှောက်အာရုံကြော အတော်များများ ရှိနေတဲ့အခန်းပေါ့။

အကယ်၍ သင့်မျက်နှာရဲ့ အန္တရာယ်ဇုံအတွင်း ပေါက်နေတဲ့ဝက်ခြံကို သင့်ရဲ့မသန့်ရှင်းတဲ့လက်နဲ့ညှစ်မိခဲ့မယ်ဆိုရင်....ဝက်ခြံပိုးဝင်မယ်....ဒီပိုးတွေဟာ သွေးပြန်ကြောတွေကနေတစ်ဆင့် ခုနကပြောတဲ့ အရေးကြီးအခန်းဖြစ်တဲ့ Cavernous Sinous ထဲကိုရောက်မယ်။ အဲဒီကမှတစ်ဆင့် ဦးနှောက်ဆီ တန်းရောက်သွားနိုင်ပါတယ်။ ဒီလိုအခြေအနေမျိုးမှာ ဖြစ်လာနိုင်တဲ့ ဆိုးကျိုးတွေကတော့ မျက်စိကွယ်ခြင်း၊ အကြောသေအကြောလိုက်ခြင်း၊ အသက်သေဆုံးခြင်းအထိ ဖြစ်နိုင်ပါတယ်။

အဖြစ်နည်းပေမယ့်လို့ ဖြစ်လာခဲ့မယ်ဆိုရင်လည်း အလွန်အန္တရာယ်ရှိတာကြောင့် ဒီလိုနေရာမျိုးမှာ ဝက်ခြံထွက်နေတယ်ဆိုရင် ကုတ်ဖဲ့ခြင်း၊ ညှစ်ခြင်း စတာတွေကို အထူးရှောင်ရှားသင့်ပါကြောင်းနဲ့ ကျွမ်းကျင်သူဆရာဝန်တွေနဲ့ ပြသပြီး ကုသမှုခံယူသင့်ပါကြောင်း...။

မေ@ဆေး၂ (ရိုးရာလေး)