တောင်ကိုရီးယားနိုင်ငံ့ရဲ့ဝါရင့်သရုပ်ဆောင်မင်းသားကြီး အန်ဆွန်ကီဟာ အသက် ၇၄ နှစ်အရွယ်မှာ ကွယ်လွန်သွားခဲ့ပါပြီ။ ဇန်နဝါရီ ၅ ရက်နေ့ မနက်ခင်းမှာ အန်ဆွန်ကီရဲ့အေဂျင်စီ Artist Company က ဒီဝမ်းနည်းကြေကွဲဖွယ်ရသတင်းကို ကြေညာခဲ့တာပါ။
မင်းသားကြီးအန်ဆွန်ကီက ကိုရီးယားစံတော်ချိန် မနက် ၉ နာရီဝန်းကျင်မှာ ကွယ်လွန်သွားခဲ့တာပါ။ သူဟာ ၂၀၁၉ ခုနှစ်မှာ သွေးကင်ဆာရောဂါကို ခံစားခဲ့ရပြီး ကုသမှုခံယူနေခဲ့ရပါတယ်။ နောက်နှစ်ကျတော့ ကုသပျောက်ကင်းသွားပြီလို့ ကြေညာခဲ့ပေမဲ့ ကင်ဆာပြန်လည်ဖြစ်ပွားခဲ့ပြီး မကြာသေးခင်ကအထိ ကုသမှုကို ဆက်လက်ခံယူနေခဲ့ရပါတယ်။
ဒီဇင်ဘာ ၃၁ ရက်နေ့က အန်ဆွန်ကီဟာ ရုတ်တရက် နှလုံးရပ်ပြီး ဆေးရုံတင်ခဲ့ရကာ အဲ့ဒီကတည်းက စိုးရိမ်ရတဲ့အခြေအနေမှာ ရှိနေခဲ့တာပါ။
ဇန်နဝါရီ ၅ ရက်နေ့မှာ သူ ကွယ်လွန်သွားတာနဲ့ပတ်သက်ပြီး သူ့အေဂျင်စီရဲ့ ထုတ်ပြန်ချက်အပြည့်အစုံကို ဖော်ပြပေးလိုက်ရပါတယ်။
“မင်းသား အန်ဆွန်ကီကို ကိုယ်စားပြုတဲ့ အေဂျင်စီ Artist Company ပါ။ မင်းသားအန်ဆွန်ကီက ဇန်နဝါရီ ၅ ရက်နေ့၊ မနက် ၉ နာရီ၊ အသက် ၇၄ နှစ်အရွယ်မှာ ကွယ်လွန်သွားခဲ့ပါတယ်။
သူ့ရဲ့အနုပညာအပေါ်လေးနက်တဲ့ တာဝန်ဝတ္တရားနဲ့ မယိမ်းယိုင်တဲ့ ရိုးသားမှုနဲ့ အန်ဆွန်ကီဟာ ကိုရီးယားယဉ်ကျေးမှုရဲ့သမိုင်းတစ်လျှောက် လျှောက်လှမ်းခဲ့ပါတယ်။
သူ့ရဲ့သရုပ်ဆောင်မှုတွေကို လူတွေဆီ အမြဲတမ်းဦးတည်ပြီး မရေတွက်နိုင်တဲ့ပရောဂျက်တွေကတဆင့် ခေတ်အဆက်ဆက်နဲ့ မျိုးဆက်တစ်လျှောက် နက်ရှိုင်းတဲ့ပဲ့တင်သံတွေ၊ နှစ်သိမ်းမှုတွေကို ပေးစွမ်းခဲ့ပါတယ်။
အထူးသဖြင့် သရုပ်ဆောင်မဖြစ်ခင် သူဟာ လူသားတစ်ယောက်အနေနဲ့ ဂုဏ်သိက္ခာနဲ့ တာဝန်တ္တရားကို တန်ဖိုးထားခဲ့ပြီး စီနီယာနဲ့ ဂျူနီယာတွေအပေါ်ရော ရိုက်ကွင်းက လူတိုင်းအပေါ်ကိုပါ လေးစားမှုပြသခဲ့တယ်။ သူဟာ တကယ်ကို National Actor တစ်ယောက်ပါပဲ။
ဒီရုတ်တရက်သတင်းကြောင့် အလွန်ဝမ်းနည်းကြေကွဲရပါတယ်။ ကွယ်လွန်သူအတွက် ကျွန်တော်တို့ ဆုတောင်းပေးပြီး သူ့ရဲ့ဝမ်းနည်းကြေကွဲနေတဲ့ မိသားစုကို ကျွန်တော်တို့ရဲ့နှလုံးသားထဲကနေ ထပ်တူထပ်မျှဝမ်းနည်းရပါကြောင်း ပြောကြားလိုပါတယ်”
မင်းသားကြီးအန်ဆွန်ကီက ၁၉၅၇ ခုနှစ် ဇာတ်ကား “The Twilight Train” နဲ့ ကလေးသရုပ်ဆောင်အဖြစ် ရုပ်ရှင်လောကထဲ ဝင်ရောက်ခဲ့ပြီး “Mandala” , “Two Cops” , “Nowhere to Hide” , “The Devine Fury” , “Hansan: Rising Dragon” အပါအဝင် ရုပ်ရှင်ကား ၁၇၀ ကျော်မှာ ပါဝင်သရုပ်ဆောင်ခဲ့ပါတယ်။
ဆက်စပ်သတင်းဖတ်ရှုရန်- ကိုရီးယားဝါရင့်မင်းသားကြီး ရုတ်တရက်နှလုံးရပ်ပြီး ဆေးရုံတင်လိုက်ရ အရေးပေါ်အခြေအနေမှာရှိနေ –
Ref: Veteran Actor Ahn Sung Ki Passes Away
WL (ရိုးရာလေး)
