ကြက်ဉအနှစ်နဲ့ပတ်သက်တဲ့ အယူအဆအမှားနဲ့ ကြက်ဉရဲ့အာဟာရဓာတ်ပါဝင်မှု

ကြက်ဉ၊ ဘဲဉတွေကို အရမ်းခရေဇီဖြစ်ကြတယ်သူတွေရှိတယ်မလား။ လူတွေ ကြိုက်နှစ်သက်လောက်အောင်လည်း ကြက်ဉ၊ ဘဲဉတွေက မယုံနိုင်လောက်အောင် ကျန်းမာရေးနဲ့ ညီညွှတ်လှပါတယ်။ ဟိုယခင်ကတည်းက ကြက်ဉ၊ဘဲတွေဟာ ကျန်းမာရေးနဲ့ညီညွှတ်တဲ့ တစ်နေ့တာစားသောက်နည်းအစီအစဉ်တွေရဲ့တစ်စိတ်တစ်ပိုင်းဖြစ်ခဲ့တာပါ။ တစ်နေ့ကို ကြက်ဉတစ်လုံးစားပေးရင် သင့်ကို မရှိမဖြစ်ဗီတာမင်ဓာတ်နဲ့ အာဟာရဓာတ်အမျိုးမျိုးထောက်ပံ့ပေးနိုင်ပါတယ်။

ဒါပေမဲ့ တချို့တွေက ကြက်ဉကို အနှစ်မစားကြသလို တချို့ကျပြန်တော့လည်း ကြက်ဉအကာကိုမစားပဲ ကြက်ဉအနှစ်စားကြတာပါ။ အခုခေတ်မှာ လက်စထရောမြင့်မားတယ်ဆိုပြီး ကြက်ဉအနှစ်ကို ဖယ်စားတဲ့သူတွေများလာပါတယ်။ ကြွက်သားတင်းရင်းဖို့ ကြိုးစားနေတဲ့သူတွေ၊ ကိုယ်အလေးချိန်ကျချင်တဲ့သူတွေကြားမှာ ပိုပြီးအဖြစ်များပါတယ်။ ကြက်ဉအနှစ်ကို ဖယ်ပြီး အကာပဲ စားမယ်ဆိုရင် သင့်ခန္ဓာကိုယ်ရဲ့ အာဟာရဓာတ်များစွာကို ချို့တဲ့သွားစေမှာဖြစ်တဲ့အပြင် ကြက်ဉကရရှိတဲ့အကျိုးကျေးဇူးကိုလည်း တစ်ဝက်သာ ရရှိမှာဖြစ်ပါတယ်။

အာဟာရဓာတ်အားလုံးပါဝင်တာက ကြက်ဉအနှစ်ပါပဲ။ ကြက်ဉတစ်လုံးရဲ့အကာက အနှစ်နဲ့ယှဉ်ရင် အာဟာရဓာတ်ပမာဏအနည်းငယ်ပဲရှိပါတယ်။ ကြက်ဉတစ်လုံး လုံးက ဗီတာမင် အေ၊ ဒီ၊ အီး၊ ကေ နဲ့ ဗီတာမင် B အမျိုးအစား (၆) မျိုး နဲ့ ပြည့်ဝနေတာပါ။ သတ္တုဓာတ်ပါဝင်မှုကလည်း ကြက်ဉ၊ဘဲဉမှာ သံဓာတ်၊ ကယ်စီယမ်၊ ဖော့စ်ဖရပ်စ်၊ ဇင့်စ်ဓာတ်နဲ့ ဖောလစ်ဓာတ်တွေနဲ့ ထုပ်ပိုးထားပါတယ်။ အနှစ်က အကာထက် အာဟာရဓာတ်ပိုများတဲ့အတွက် အနှစ်ကို ဖယ်စားလိုက်တာက သင့်ခန္ဓာကိုယ်က လိုအပ်တဲ့အာဟာရဓာတ်ကို လုံလုံလောက်လောက်မရရှိသလိုဖြစ်စေပါတယ်။ ကြက်ဉအကာက ပရိုတိန်းဓာတ်ပဲ ကြွယ်ဝပါတယ်။

ကြက်ဉအနှစ်နဲ့ပတ်သက်ပြီး အယူအဆအမှား

လူအများစုက ကြက်ဉအနှစ်မှာ ကိုလက်စထရော၊ အဆီနဲ့ ဆိုဒီယမ်ပါဝင်မှု မြင့်မားတယ်ဆိုပြီး ကြက်ဉအနှစ်ကို ဖယ်စားကြတဲ့ အယူအဆအမှားကို လက်ခံထားကြပါတယ်။ ကြက်ဉကို ပမာဏကန့်သတ်ပြီး စားသုံးမယ်၊ ကျန်းမာရေးနဲ့ညီညွှတ်တဲ့စားသောက်နည်းကို လိုက်နာမယ်၊ လေ့ကျင့်ခန်းပုံမှန်လုပ်မယ်ဆိုရင် ကိုလက်စထရော၊ အဆီပါဝင်မှုတို့နဲ့ ပတ်သက်ပြီး စိတ်ပူစရာမလိုပါဘူး။ သင်က ကိုယ်အလေးချိန်ကျဖို့ ကြိုးစားနေတာလား (ဒါမှမဟုတ်) ကြွက်သားကျစ်လျစ်ဖို့ ကြိုစားနေတာလား။

ဘယ်လိုပဲဖြစ်ဖြစ် သင်က ကိုယ်လက်စထရောနဲ့ အဆီ (၂) ခုလုံးလိုအပ်ပါတယ်။ ကိုလက်စထရောက ခွန်အားတိုးလာဖို့နဲ့ ကြွက်သားတည်ဆောက်ဖို့အတွက်ကူညီပေးတဲ့ တက်စတိုစတီရုန်းဟော်မုန်း (Testosterone) ထုတ်လွှတ်ဖို့ အရေးကြီးပါတယ်။ အဲဒါက အရေပြားက နေရောင်ခြည်နဲ့ ထိတွေ့တဲ့အခါ ဗီတာမင်ဒီဖြစ်တည်လာဖို့လည်း ကူညီပေးပါတယ်။ ဗီတာမင်ဒီက အရိုးကြံ့ခိုင်သန်မာဖို့ ကူညီပေးပါတယ်။ ကြက်ဉတစ်လုံးမှာ ပါဝင်တဲ့အဆီကလည်း ကျန်းမာရေးနဲ့ညီညွှတ်ပါတယ်။ ကြက်ဉအဆီကို စားသုံးတာက သင့်ကို နွေးထွေးစေပြီး အချိန်အကြာကြီး ဗိုက်ပြည့်အင်နေစေပါတယ်။

ကြက်ဉအကာနဲ့ ကြက်ဉတစ်လုံးမှာ ပါဝင်တဲ့ အာဟာရဓာတ်

ကြက်ဉအကာနဲ့ ကြက်ဉတစ်လုံးမှာ ပါဝင်တဲ့ အာဟာရဓာတ်တွေက ကြီးကြီးမားမားကွဲပြားမှုရှိပါတယ်။

ကြက်ဉအကာ (၈) ခု မှာ ပရိုတိန်း (၂၈ ဂရမ်)၊ ကာဗွန်ဟိုက်ဒရိုတ် (၂ ဂရမ်)၊ အဆီ (၀ ဂရမ်)၊ ကယ်လိုရီ (၁၃၇)

ကြက်ဉ(၄) လုံးမှာ ပရိုတိန်း (၂၈ ဂရမ်)၊ ကာဗွန်ဟိုက်ဒရိုတ် (၂ ဂရမ်)၊ အဆီ (၂၁ ဂရမ်)၊ ကယ်လိုရီ (၃၁၂)

သင်ဟာ ကြက်ဉတစ်လုံးကို စားတဲ့အခါ အာဟာရဓာတ်အားလုံးရဖို့အတွက် အကာကိုဖယ်စား (သို့) အနှစ်ကို ဖယ်စားတာမျိုးမလုပ်ဘဲ တစ်လုံးလုံးစားတာအကောင်းဆုံးပါပဲ။ အနှစ်ကို ဖယ်ပြီး အကာကို ပိုစားတာက အာဟာရဓာတ်နည်းပါးသွားစေပါလိမ့်မယ်။ ကြက်ဉအကာ (၄) ခုစားမယ့်အစား ကြက်ဉ (၂) လုံးစားပေးပါ။ ကြက်ဉအကာ (၄) ခုနဲ့ယှဉ်ရင် ကြက်ဉ (၄) လုံးကနေ အာဟာရဓာတ်ပိုရရှိမှာဖြစ်ပါတယ်။

(ဒီဆောင်းပါးကို ဗဟုသုတအနေနဲ့ တင်ဆက်ပေးခြင်းဖြစ်ပါတယ်)

Ref: TOI “What Happens When You Eat Only Egg Whites And Discard The Yolk”

WL (ရိုးရာလေး)