ဒီပါဝလီနေ့လို့ လူသိများတဲ့ ဒေဝါလီဟာ ဟိန္ဒူဘာသာဝင်တို့ရဲ့ မီးထွန်းပွဲတော်နေ့ဖြစ်ပါတယ်။ မြန်မာနိုင်ငံက သီတင်းကျွတ်ပွဲတော်လိုပါပဲ။ နှစ်စဉ်နှစ်တိုင်း ဆောင်းဦးအချိန်အခါမှာ ကျင်းပလေ့ရှိပါတယ်။ ဂရီဂိုးရီးယန်းပြက္ခဒိန်အရဆိုရင် ပွဲတော်ကို အောက်တိုဘာလလယ်နဲ့ နိုဝင်ဘာလလယ်တွေမှာ ကျင်းပလေ့ရှိပါတယ်။ ဒီပါဝလီပွဲတော်က ငါးရက်ကြာမြင့်ပါတယ်။ ဒေဝါလီပွဲတော်က ဟိန္ဒူဘာသာဝင်တို့ရဲ့ပွဲတော်တွေထဲမှာ အကျော်ကြားဆုံးပွဲတစ်ခုဖြစ်ပါတယ်။ အိန္ဒိယနိုင်ငံ တောင်ပိုင်းနဲ့ မြောက်ပိုင်းတို့မှာ အခေါ်အဝေါ်အနည်းငယ်ကွဲလွဲပေမဲ့ ဟိန္ဒူဘာသာဝင်တို့ရဲ့ မီးထွန်းပွဲတော် တစ်ခုပါပဲ။ မြန်မာနိုင်ငံအပါအဝင် အခြားနိုင်ငံတွေမှာတော့ ဒီပါဝလီလို့ အသုံးများကြပါတယ်။ ဒီပါဝလီနေ့ကို မြန်မာနိုင်ငံနဲ့နိုင်ငံတော်တော်များများမှာ တရားဝင် အစိုးရရုံးပိတ်ရက်အဖြစ် သတ်မှတ်ထားကြပါတယ်။
ဒီပ ဆိုတာ မီးအလင်းရောင်ကိုခေါ်ပြီး ဒီပါဝလီဆိုတာ ဆီမီးခွက်တွေ စီတန်းထွန်းညှိပူဇော်တဲ့ပွဲဖြစ်ပါတယ်။ ပွဲတော်ကျင်းပတဲ့ ကာလမှာ ဘုရားကျောင်းတွေ၊ လူနေအိမ်တွေ၊ ဈေးဆိုင်တွေနဲ့ အများပြည်သူနဲ့ဆိုင်တဲ့ အဆောက်အအုံတွေမှာ မီးတွေကိုလှပစွာ ထွန်းညှိကြပါတယ်။ ပွဲတော်မတိုင်ခင်မှာလည်း မိမိတို့ရဲ့ နေအိမ်တွေ၊ အလုပ်နေရာတွေကို အလှဆင်တာ၊ သန့်ရှင်းရေးလုပ်တာတွေ ပြုလုပ်ကြပါတယ်။ အဲဒီနောက်မှ အကောင်းဆုံး အဝတ်အစားတွေကို ဝတ်ဆင်ကြပြီး အိမ်အတွင်းအပြင်မှာ ဖယောင်းတိုင်တွေ၊ ဆီမီးအိမ်တွေ စတာတွေနဲ့ အလှဆင်ကြပြီး ဘုရားတွေ၊ မယ်တော်တွေ၊ နတ်မင်းကြီးတွေကို ပူဇော်ရှိခိုးကြပါတယ်။
မီးပူဇော်ခြင်းဖြင့် အလင်းနဲ့ အမှောင်ကို ခွင်းနိုင်သလို အဆိုးအညံ့တွေရှိခဲ့ရင်လည်း ကောင်းတာတွေရောက်လာဖို့၊ လက်မှိုင်ချနေရတဲ့ အခြေအနေတွေမှာ မျှော်လင့်ချက်တွေရရှိလာစေဖို့ဆိုတဲ့ အဓိပ္ပာယ်နဲ့ မီးပူဇော်ကြတာပဲ ဖြစ်ပါတယ်။ ကာလီမယ်တော်ပူဇော်ပွဲလို့လည်းခေါ်တဲ့အပြင် လက်ချ်မီးမယ်တော်ပူဇော်ပွဲလို့လည်း ခေါ်ကြပါတယ်။ တစ်နှစ်ပတ်လုံးမှာ အမှောင်ဆုံးနေ့ဖြစ်တဲ့ လကွယ်ညမှာ မကောင်းဆိုးဝါးနဲ့ ခရစ်ရှနဘုရင်ကို အောင်နိုင်တဲ့ အထိမ်းအမှတ်အနေနဲ့ ယူဆကာ ကာလီမယ်တော်ကို ပူဇော်ရှိခိုးကြပါတယ်။ လက်ချ်မီးမယ်တော်အတွက်ကတော့ အခင်းအနေနဲ့ ရွှေပြားငွေပြားတွေဖြန့်ခင်းက မီးထွန်းညှိပူဇော်ကြပါတယ်။ မယ်တော်ရဲ့တန်ခိုးကြောင့် ကျန်းမာချမ်းသာကာ ဘေးအန္တရာယ်ကင်းစေတယ်လို့ အယူရှိကြပါတယ်။ တချို့ကတော့ ရာမမင်းက ဒဿဂီရိဖြစ်တဲ့ ရာဝဏ ကို သတ်နိုင်ခဲ့လို့ ပျော်ပွဲရွှင်ပွဲလုပ်တာလို့လည်း ဆိုကြပါတယ်။
ဒီပါဝလီပွဲတော်နဲ့တွဲပြီးမြင်ရမှာက ရန်ဂိုလီတန်ဆာဆင်ခြင်းဖြစ်ပါတယ်။ ရောင်စုံအမှုန့်၊ သဲတွေအသုံးပြုပြီး တန်ဆာဆင်တဲ့ ရန်ဂိုလီက ဒီပါဝလီပွဲတော်အတွင်း ကျော်ကြားပါတယ်။ ရန်ဂိုလီဆိုတာ ဟိန္ဒူလူမျိုးတွေရဲ့ ကနုတ်လက်ရာတစ်မျိုးလည်းဖြစ်ပါတယ်။ ဒီပါဝလီက မီးထွန်းပွဲတော်တစ်ခုတည်းတင်မဟုတ်ပါဘူး။ သူငယ်ချင်း၊ မိတ်ဆွေ၊ မိသားစုတွေကြားမှာ ရိုးရာမုန့်တွေ၊ လက်ဆောင်တွေ အပြန်အလှန်ပေးကြတဲ့ ပျော်ပွဲရွှင်ပွဲ တစ်ခုလည်းဖြစ်ပါတယ်။
Ref: Wikipedia
Team ( ရိုးရာလေး )
