တိုးတက်ပြောင်းလဲလာတဲ့ ခေတ်ထဲမှာ ကွန်ပျူတာကို လူကြီး၊ လူငယ်၊ နေရာဒေသမရွေး တွင်တွင်ကျယ်ကျယ် အသုံးပြုလာကြပါတယ်။ ကွန်ပျူတာဟာ အလုပ်တွေ လျင်မြန်စွာ ပြီးနိုင်ဖို့ ကူညီပေးနိုင်တဲ့အပြင် ကျောင်း၊ လုပ်ငန်းခွင်တွေအတွက်လည်း အထောက်အကူဖြစ်စေပါတယ်။
ဒါပေမဲ့ ဘယ်အရာမဆို တန်ဆေး၊ လွန်ဘေး ပါပဲ။ လူသားတွေအတွက် အကျိုးရှိပေမယ့် မနက်ကနေ ညအထိ ကွန်ပျူတာရှေ့မှာပဲ ထိုင်ပြီး အလုပ်လုပ်နေမယ်၊ စာလုပ်နေရမယ်ဆိုရင်တော့ အနှေးနဲ့ အမြန် ကျန်းမာရေးပြဿနာတွေ ကြုံလာနိုင်ပါတယ်။ ကွန်ပျူတာသုံးလွန်းတဲ့သူတွေမှာ အဖြစ်များတဲ့ ကျန်းမာရေးဆိုးကျိုးတွေနဲ့ ပတ်သက်ပြီး ဝေမျှပေးချင်ပါတယ်။
၁။ အရိုး၊ အဆစ်တွေ နာကျင်ကိုက်ခဲမယ်
ကွန်ပျူတာကို ထိုင်ပြီး အသုံးပြုနေရတာဖြစ်တဲ့အတွက် အချိန်ကြာလာတဲ့အခါ ကျောနဲ့ လည်ပင်းမှာရှိတဲ့ အရိုး၊ အဆစ်တွေ ကိုက်ခဲနာကျင်လာမယ်။ ပုခုံးကြွက်သားတွေ ကိုက်ခဲလာမယ်။ ခေါင်းမူး၊ ခေါင်းကိုက်လာမယ်။ ထိုင်နေရတဲ့အခါ လှုပ်ရှားမှုမရှိပေမဲ့ ခန္ဓာကိုယ်က တချို့သော အစိတ်အပိုင်းတွေဟာ အချိန်အကြာကြီး ပုံမှန်အလုပ်လုပ်နေရပါတယ်။ အချိန်ကြာလာတာနဲ့အမျှ သွေးလည်ပတ်မှု နှေးလာမယ်။ နာကျင်မှုတွေ ခံစားလာရမယ်။ ကျန်းမာရေးနဲ့ ပတ်သက်တဲ့ နောက်ဆက်တွဲအန္တရာယ်တွေ ဖြစ်လာနိုင်ခြေ ပိုမြင့်လာပါတယ်။
ဘယ်လိုကာကွယ်မလဲ
- ကွန်ပျူတာအသုံးပြုဖို့အတွက် သီးသန့်ထုတ်လုပ်ထားတဲ့ စားပွဲ၊ ကုလားထိုင်မှာ ထိုင်ပြီး အသုံးပြုပါ။
- ကွန်ပျူတာမျက်နှာပြင်ဟာ မျက်လုံးနဲ့ တစ်တန်းတည်း ဒါမှမဟုတ် မျက်လုံးအောက် နည်းနည်း ရောက်နေပါစေ။
- ထိုင်ခုံမှာ ထိုင်တဲ့အခါ ခါး၊ ကျောရိုးနဲ့ လည်ပင်းအရိုးအဆစ်တွေကို ဒဏ်မဖြစ်စေဖို့ သက်တောင့်သက်သာ ဖြစ်မယ့် အနေအထားနဲ့ ထိုင်ပါ။
- နာရီဝက်ခြား တစ်ခါ မတ်တပ်ရပ်ပြီး လမ်းထလျှောက်တာ၊ ကွန်ပျူတာနဲ့ အဝေးတစ်နေရာ ကြည့်တာ၊ အကြောအချဉ်လျှော့တာမျိုး လုပ်ပေးပါ။
၂။ မျက်စိကိုက်လာမယ်
ကွန်ပျူတာမျက်နှာပြင်ကိုပဲ အချိန်ကြာရှည်စွာ ကြည့်တဲ့အခါ မျက်လုံးက ပိုပြီး အားစိုက်ရပါတယ်။ ဒါကြောင့် အချိန်ကြာလာတဲ့အခါ မျက်လုံးက ဒဏ်ဖြစ်လာတယ်။ မျက်စိမှုန်တာ၊ အမြင်အာရုံေ၀ဝါးတာ၊ အဝေးမှာ ရှိတဲ့အရာတွေကို သေချာအားစိုက်ပြီး ကြည့်လို့မရတော့ဘူး။ ခေါင်းတွေကိုက်လာမယ်။ အာရုံကြောစနစ်လည်း အားနည်းနိုင်ပါတယ်။
ဘယ်လိုကာကွယ်မလဲ
- အပြင်ပြတင်းပေါက်က နေအလင်းရောင်ဟာ ကွန်ပျူတာမျက်နှာပြင်ပေါ် ကျနေတာမျိုး မဖြစ်သင့်ပါဘူး။ အလင်းပြန်တဲ့အခါ မျက်စိကို ပိုပြီး ထိခိုက်စေလို့ပါ။
- မျက်လုံးထဲ အလင်းတည့်တည့်ပြန်တာကို ရှောင်ပေးပါ။
- ကွန်ပျူတာနဲ့ မျက်လုံး အရမ်းမနီးကပ်ပါစေနဲ့။
- ကွန်ပျူတာ မီးအလင်းအမှောင်ကို လျှော့ထားပါ။
- မကြာခဏ ကွန်ပျူတာနဲ့ ဝေးတဲ့ နေရာတွေကို ကြည့်ပေးပါ။ မျက်စိကို ခေတ္တခဏ မှိတ်ပြီး အနားပေးပါ။
- အမြင်အာရုံဝေဝါးတာ၊ ခေါင်းမူးခေါင်းကိုက်တာ ဖြစ်လာပြီဆိုရင် ဆရာဝန်နဲ့ အမြန်ဆုံးပြသပါ။
- ကိုယ့်မျက်လုံးအခြေအနေကို မျက်ခြေမပြတ်အောင် မျက်စိဆရာဝန်ဆီမှာ ပုံမှန်စစ်ဆေးမှုခံယူသင့်ပါတယ်။
၃။ ကလေးတွေ ငယ်ငယ်ရွယ်ရွယ်နဲ့ အဝလွန်လာမယ်
ကွန်ပျူတာရှေ့မှာ အချိန်အကြာကြီး ထိုင်ပြီး ဂိမ်းဆော့ကြတယ်။ စာလုပ်ကြတယ်။ အထိုင်များပြီး လှုပ်ရှားမှုနည်းလာတဲ့အခါမှာ ကလေးတွေ ငယ်ငယ်ရွယ်ရွယ်နဲ့ လေးလံထိုင်းမှိုင်းလာမယ်။ အာရုံစူးစိုက်မှု အားနည်းလာမယ်။ ကိုယ်အလေးချိန် တက်လာပြီး အဝလွန်လာမယ်။ နောက်ဆက်တွဲ နှလုံး၊ သွေးတိုး၊ ဆီးချိုရောဂါတွေ ဖြစ်နိုင်ခြေ မြင့်တက်လာမှာပါ။
ဒါ့အပြင် ကလေးတွေအရွယ်ဟာ ကြီးထွားဖွံ့ဖြိုးရမယ့် အရွယ်ဖြစ်တာကြောင့် ကိုယ်လက်လှုပ်ရှားမှု မရှိတဲ့အခါမှာ တခြားကလေးတွေနဲ့ အရပ်ချင်း၊ ခန္ဓာကိုယ်အရွယ်အစားချင်း ယှဉ်လိုက်တဲ့အခါ သေးငယ်နေမယ်။ စိတ်ပိုင်းဆိုင်ရာမှာလည်း ပြဿနာတွေ ဖြစ်လာမယ်။ ရန်လိုတဲ့ အပြုအမူမျိုးတွေ လုပ်လာမယ်။ မျက်စိအကြောဆွဲတာလိုမျိုး အာရုံကြောနဲ့ ဆက်စပ်နေတဲ့ လက္ခဏာတွေ ဖြစ်လာနိုင်ပါတယ်။
ဘယ်လိုကာကွယ်မလဲ
ကလေးတွေ ကွန်ပျူတာအသုံးများပြီး ကျန်းမာရေးပြဿနာတွေ မကြုံလာစေဖို့အတွက် မိဘတွေဘက်က သေချာ ဂရုစိုက်ပြီး အကျင့်လုပ်ပေးထားဖို့ လိုပါတယ်။ အပြင်ထွက်ပြီး ပေးကစားတာ၊ ကိုယ်လက်လှုပ်ရှားမှု အတူလုပ်ပေးတာ အစရှိသဖြင့် ကလေးတွေကို တက်တက်ကြွကြွ ဖြစ်အောင် နေထိုင်ပုံတွေကို စိတ်ရှည်ရှည်နဲ့ ပုံသွင်းပေးပါ။
ရေးသားသူ – Ye Myo Myat
ဆေးပညာပိုင်းဆိုင်ရာတည်းဖြတ်သူ – Dr. Thurein Hlaing Win
