ဂျပန်ကမ်းခြေမှာ ရေကူးနေတုန်း ပစိဖိတ်သမုဒ္ဒရာထဲ မိုင် ၅၀ ကျော် မျောပါသွားတဲ့ တရုတ်အမျိုးသမီးကို ၃၇ နာရီအကြာမှာ ကယ်တင်နိုင်ခဲ့ပါတယ်။ အသက် ၂၀ ဝန်းကျင် အမျိုးသမီးဟာ ပြီးခဲ့တဲ့တနင်္လာနေ့ညက ဂျပန်နိုင်ငံ ရှီမိုဒါကမ်းခြေမှာ ရေကူးနေတုန်း အားပြင်းတဲ့ ဆွဲချရေစီးကြောင်းကြောင့် ပင်လယ်ထဲ မျောပါသွားခဲ့တာပါ။
![](https://yoyarlay.com/wp-content/uploads/2024/07/14.7.2024-yyl-3.jpg)
သူ့သူငယ်ချင်းက လူပျောက်တိုင်ကြားခဲ့ပြီးနောက် ဂျပန်ကမ်းခြေစောင့်တပ်ဖွဲ့က အပူတပြင်း ရှာဖွေခဲ့ပါတယ်။ ၃၆ နာရီအကြာမှာတော့ ကုန်တင်သင်္ဘောတစ်စီးက သမုဒ္ဒရာထဲ မျောပါနေတဲ့ အမျိုးသမီးကို တွေ့ရှိခဲ့တာပါ။ အဲဒီနောက်မှာ ကုန်တင်သင်္ဘောက ဒီလမ်းကြောင်းကို ဖြတ်သန်းသွားမယ့် LPG tanker, Kakuwa Maru No. 8 သင်္ဘောထံ ဆက်သွယ်အကြောင်းကြားခဲ့ပါတယ်။
Kakuwa Maru No. 8 သင်္ဘောပေါ်မှာ သင်္ဘောသားနှစ်ဦးဟာ ၆.၅ ပေမြင့်မားတဲ့ လှိုင်းလုံးကြီးတွေ ပုတ်ခတ်နေစဉ်မှာ ရေထဲ ခုန်ချသွားပြီး အမျိုးသမီးကို ကယ်တင်ဖို့ ကြိုးစားခဲ့ကြပါတယ်။ ဒီအချိန်မှာ အမျိုးသမီးက ကိုယ်ဖော့ထားနိုင်ဖို့ ခက်ခက်ခဲခဲ ကြိုးပမ်းနေရတာကြောင့် လက်မလျှော့ဖို့ အော်ဟစ်အားပေးခဲ့ကြပြီး သူရှိရာကို ကူးခတ်သွားခဲ့ကြတာပါ။ အဲဒီနောက် သူ့ခန္ဓာကိုယ်ကို ကြိုးနဲ့ရစ်သိုင်းပြီး သင်္ဘောပေါ် ဆွဲတင်နိုင်ခဲ့ကြပါတယ်။
![](https://yoyarlay.com/wp-content/uploads/2024/07/14.7.2024-yyl-3.png)
အဲဒီကတစ်ဆင့် ကမ်းခြေစောင့်တပ်ဖွဲ့က ရဟတ်ယာဉ်နဲ့ လာရောက်ခေါ်ဆောင်ခဲ့တာပါ။ အမျိုးသမီးဟာ ရေဓာတ်ခန်းခြောက်နေပုံရပေမဲ့ ကျန်းမာရေးကောင်းနေဆဲပါပဲ။ ရေထဲမှာ အချိန်ကြာမြင့်စွာ မျောပါခဲ့လို့ အပူချိန် အလွန်အမင်းကျဆင်းတာ၊ သင်္ဘောတွေနဲ့ တိုက်မိတာ အစရှိတဲ့ ဘေးအန္တရာယ်တွေ ကြုံခဲ့ပေမဲ့ အခုလို အသက်ရှင်လွတ်မြောက်ခဲ့တာကတော့ ကံကောင်းတယ်လို့ ဆိုရမှာပါ။
Ref: Miraculous Rescue: Woman Swept Out To Sea Found After 37 Hours Adrift
NZ ( ရိုးရာလေး)