ဟယ်ရီပေါ်တာရုပ်ရှင်တွဲတွေနဲ့ စာအုပ်တွေကြားက ကွာခြားမှု

ဟယ်ရီပေါ်တာ ရုပ်ရှင်တွေဆိုရင် အားလုံးမိတ်ဆက်ပေးနေစရမလိုလောက်အောင် သိပြီးသားဖြစ်မှာပါ။ စာအုပ်တွေဆိုရင်လည်း ဖတ်ဖူးတဲ့သူမနည်းလောက်ပါဘူး။ ဒါပေမဲ့တစ်ချို့သူတွေကတော့ ရုပ်ရှင်ကိုပဲ အဓိကကြည့်ဖူးပြီး စာအုပ်အပြည့်မဖတ်ဖူးတဲ့သူတွေလည်းရှိနေဦးမှာပါ။ ဒါကြောင့် ဟယ်ရီပေါ်တာရုပ်ရှင်တွဲတွေနဲ့ စာအုပ်ကြားက ကွာခြားမှုတွေကို ဖော်ပြပေးလိုက်ပါတယ်။

Luna and Neville (လူနာ နဲ့ နယ်ဗီးလ်)

ရုပ်ရှင်ထဲမှာတော့ နယ်ဗီးလ်က ဟော့ဝဂ်တိုက်ပွဲမှာ ကြိုက်နေပြီလို့အော်ပြီးထွက်သွားခဲ့ပေမယ့် စာအုပ်ထဲမှာတော့ လူနာ နဲ့ နယ်ဗီးလ်ကြားမှာ Romantic ဆန်တဲ့ဆက်ဆံရေးမျိုးလုံးဝမရှိခဲ့ပါဘူး။ ပရိသတ်တွေကို Fan service ပေးတဲ့အနေနဲ့သာ ရုပ်ရှင်ထဲမှာထည့်သွင်းထားခဲ့တာပါ။

အမှန်တော့ လူနာက ဟော့ဝဂ်တိုက်ပွဲအပြီးမှာ Rolf Scamander နဲ့ လက်ထပ်သွားခဲ့ပြီး အမြွာညီအစ်ကိုနှစ်ယောက်ဖြစ်တဲ့ Lorcan နဲ့ Lysander ကိုမွေးဖွားခဲ့ပါတယ်။ Rolf Scanmander ဆိုတာတော့ တခြားသူမဟုတ်ပါဘူး။ Fantastic Beasts and where to find them ဖတ်စာအုပ်ကိုရေးသားခဲ့တဲ့ Newt Scamander ရဲ့မြေးဖြစ်သူပါ။ နယ်ဗီးလ်ကတော့ ဟော့ဝဂ်အတန်းဖော်ဖြစ်တဲ့ ဟန်နာအက်ဘော့နဲ့လက်ထပ်ခဲ့တာဖြစ်ပြီး ဟော့ဝဂ်မှာပဲ ဆရာပြန်လုပ်နေပါတယ်။

ဒေါ့ဘီရဲ့အခန်းကဏ္ဍ

ရုပ်ရှင်ရိုက်တဲ့သူတွေဟာ စာအုပ်ထဲမှာ ဒေါ့ဘီလုပ်ပေးခဲ့တဲ့အလုပ်တွေကို နယ်ဗီးလ်နဲ့ အစားထိုးခဲ့တာတွေတွေ့ရမှာပါ။ ပြောရမယ်ဆိုရင် Goblet of Fire ထဲမှာ ဟယ်ရီကို ရေထဲမှာအသက်ရှူနိုင်အောင် Gillyweed ရှာပေးခဲ့တာ ဒေါ့ဘီပါ။ ပရော်ဖက်ဆာမိုဒီက ဒေါ့ဘီကြားအောင် တမင်ပြောလိုက်လို့ ဒေါ့ဘီက ဟယ်ရီကိုလာပြောခဲ့တာပါ။ ရုပ်ရှင်ထဲမှာတော့ နယ်ဗီးလ်က ဟယ်ရီ့ကိုပေးခဲ့တယ်လို့ပဲ ရိုက်ပြထားပါတယ်။ Order of Phoenix မှာလည်း Room of Requirement ကိုတွေ့ခဲ့တာ အမှန်တစ်ကယ်တမ်းတော့ ဒေါ့ဘီပါ။ ဒါပေမဲ့ ရုပ်ရှင်ရိုက်တဲ့အခါမှာတော့ နယ်ဗီးလ် အိမ်သာသွားချင်နေတုန်း ရှာတွေ့ခဲ့တယ်လို့ပုံဖော်ထားခဲ့ပါတယ်။ အမှန်တော့ အိမ်သာကိုတောင့်တပြီးတွေ့ခဲ့တဲ့သူက တခြားတစ်ယောက်သက်သက်ရှိပါတယ်။ ဟော့ဝဂ် ကျောင်းအုပ်ကြီး ဒမ်ဘယ်ဒေါကိုယ်တိုင်ပါ။ ဒါပေမဲ့ သူကနောက်ပိုင်း ဘယ်လိုပြန်ရှာရမှန်းမသိခဲ့ပါဘူးတဲ့။

Neville’s parents (နယ်ဗီးလ်၏ မိဘများ)

ဒါကတော့ စာအုပ်ထဲမှာ အရမ်းအင်အားကောင်းတဲ့အခန်းတစ်ခု ပိတ်ကားပေါ်ထိရောက်မလာနိုင်ခဲ့တာပါ။ စာဖတ်ပရိသတ်တိုင်းလည်း လိုချင်မိတဲ့ဇာတ်ဝင်ခန်းဖြစ်ပါလိမ့်မယ်။ နယ်ဗီးလ်ရဲ့မိဘတွေဟာ ဘယ်လားထရစ်တို့လင်မယား နှိပ်စက်တာခံရပြီး ဦးနှောက်ပျက်ရူးသွပ်သွားပါတယ်။ ဒါကို နယ်ဗီးလ်က သူ့သူငယ်ချင်းတွေကို ပြောထားခြင်းမရှိပါဘူး။ ဟယ်ရီတို့တစ်သိုက် ရွန့်အဖေကိုဆေးရုံသွားကြည့်ရင်းတိုးတော့မှ အဖြစ်မှန်ကိုသိရတာပါ။ ဟယ်ရီကတော့ ဒမ်ဘယ်ဒေါပြောပြထားလို့ သိပြီးသားဖြစ်ပါတယ်။

ထရီလော်နီရဲ့ဟောကိန်း

ရုပ်ရှင်ထဲမှာ ထည့်မပြောသွားတဲ့ဇာတ်ကွက်တစ်ခုရှိခဲ့ပါသေးတယ်။ အမှန်တော့ နယ်ဗီးလ်နဲ့ ဟယ်ရီတို့ရဲ့ကံကြမ္မာဟာ ပြောင်းပြန်ဖြစ်သွားဖို့ အရမ်းနီးစပ်ခဲ့ပါတယ်။ ပရော်ဖက်ဆာထရီလောနီရဲ့ ဟောကိန်းအပြည့်အစုံက “ဗိုဒါမော့ကို သတ်နိုင်မယ့်သူဟာ ဇူလိုင်လကုန်မှာမွေးတဲ့သူဖြစ်သလို ဗိုဒါမော့ကိုယ်တိုင်ကသူနဲ့တန်းတူယူဆမယ့်သူ” လို့ဆိုထားပါတယ်။ အဲ့ဒီတော့ ဇူလိုင်အကုန်မှာမွေးတဲ့ နယ်ဗီးလ်ရော ဟယ်ရီပါဖြစ်နိုင်ခဲ့တာပါ။ ဒါပေမဲ့လည်း ဗိုဒါမော့က ဟယ်ရီသာဖြစ်နိုင်တယ်လို့ ယူဆပြီး ဟယ်ရီကိုသာလာသတ်ခဲ့တာကြောင့် The Chosen One က ဟယ်ရီဖြစ်သွားခဲ့တာပါ။

သူရဲကောင်းနယ်ဗီးလ်

နယ်ဗီးလ်ဆိုရင် လူအတော်များများက ကြောက်တတ်တဲ့ထုံထုံအအပုံကိုပဲပြေးမြင်ကြမယ်ထင်ပါတယ်။တကယ်တမ်းတော့နယ်ဗီးလ်ဟာ HPထဲမှာ character development အရှိဆုံးဇာတ်ကောင်တစ်ကောင်ပါ။ ကြောင်တောင်တောင်ကောင်လေးတစ်ယောက်ကနေ ဒမ်ဘယ်ဒိုးသေအပြီးဟော့ဝပ်ဂ်ကျောင်းမှာ Death Eaters တွေကြီးစိုးချိန် ဘာကိုမှမကြောက်ပဲ ကျောင်းသားငယ်တွေအတွက် နှိပ်စက်ခံပြီးရပ်တည်ရဲတဲ့အထိကိုပြောင်းလဲလာခဲ့တာပါ။

ဒီအချက်ဟာစာအုပ်တွေထဲမှာသိသာထင်ရှားပေမယ့် ရုပ်ရှင်ထဲမှာတော့သိပ်မသိသာတာတွေ့ရပါတယ်။ တခြားနေရာတွေမှာသူပြောင်းလဲလာတာသိပ်မပြတာကိစ္စမရှိပေမယ့် နောက်ဆုံးဇာတ်လမ်းမှာနယ်ဗီးလ်က ဗိုဒါမော့ရဲ့မြွေကြီးနာဂီနီကိုသတ်တဲ့နေရာကတော့ သဘောမတွေ့ချင်စရာပါ။ စာအုပ်ထဲမှာနယ်ဗီးလ်ဟာ ဗိုဒါမော့ရဲ့ခြေချုပ်ကျိန်စာမှပင်လွတ်မြောက်ခဲ့ပြီး အဆောင်ခွဲဦးထုပ်ထဲမှ ဂရင်းဖင်းဒေါဓားကိုထိုက်တန်စွာရယူပြီးမှာ နာဂီနီရဲ့ခေါင်းကိုဖြတ်နိုင်ခဲ့တာဖြစ်ပါတယ်။

ရုပ်ရှင်ထဲမှာတော့ နယ်ဗီးလ်မေ့မြောနေရာကထလာပြီး ရုတ်တရက်သတ်လိုက်ပုံကြောင့် ဟာသဆန်စွာရိုက်ပြထားတာပါ။ နယ်ဗီးလ်ဟာစာအုပ်ထဲကအတိုင်းပိုမိုသူရဲကောင်းဆန်စွာ ဗိုဒါမော့ရဲ့နောက်ဆုံး Horcrux ကိုအဆုံးသတ်ပေးပုံကိုတော့ ပရိသတ်တွေအနေနဲ့ ပိုတမ်းတမိမှာအမှန်ပါ။

Rita Skeeter’s secret ( ရီတာစကီတာရဲ့လျို့ဝှက်ချက်)

စာအုပ်ထဲကမှာပါတဲ့ ရီတာ စကီတာဟာ ရုပ်ရှင်ထဲကလိုပဲ အမြင်ကတ်ချင်စရာကောင်းတဲ့သတင်းထောက်ပါ။ သူများမရတဲ့ သတင်းတွေကိုလည်း နှိုက်နှိုက်ချွတ်ချွတ်အကုန်ရပါတယ်။ သူ့ရဲ့လျှို့ဝှက်ချက်ကတော့ သူဟာ Animagus (ကိုယ်သွင်ပြောင်းနိုင်သူ) တစ်ယောက်ဖြစ်နေခဲ့တာပါ။ ရီတာ က သူ့ကိုယ်သူ ပိတုန်းပုံစံပြောင်းနိုင်ပါတယ်။ ဒါပေမဲ့လည်း Goblet of Fire ထဲမှာ နောက်ဆုံး ဟာမွန်နီက ရိပ်မိသွားပီး ဖန်ပုလင်းထဲ ပိတ်သိမ်းထားနိုင်ခဲ့ပြီး ပြန်လွှတ်ပေးတဲ့အခါ သတင်းဆက်မရေးဖို့ ခြိမ်းခြောက်ခဲ့ပါတယ်။

S.P.E.W

စာအုပ်ထဲမှာ ဟာမွန်နီက Elf တွေကိုစောင့်ရှောက်တတ်သူတစ်ယောက်ဖြစ်ပြီး house elf တွေကို လခယူပြီးအလုပ်လုပ်ဖို့၊ ရက်ရက်စက်စက် ဒဏ်ပေးတာတွေ၊ ခိုင်းစေတာတွေကို ကန့်ကွက်ဖို့အတွက် Society for the Promotion of Elfish Welfare လို့အမည်ရတဲ့ အဖွဲ့အစည်းတစ်ခုတည်ထောင်ခဲ့ပါသေးတယ်။ ဒါကတော့ ရုပ်ရှင်ထဲကိုလုံးဝမပါဝင်လာခဲ့ပါဘူး။

Dumbledore (ဒမ်ဘယ်ဒေါ)

စာအုပ်ထဲမှာ ဒမ်ဘယ်ဒေါရဲ့စရိုက်ဟာ အဖိုးအိုကြီးတစ်ယောက် ကလေးလိုလုပ်နေတာတွေခဏခဏမြင်ရမှာဖြစ်ပါတယ်။ အနီးစပ်ဆုံးပြောရရင် Philosopher’s stone ရုပ်ရှင်ထဲက ဒမ်ဘယ်ဒေါဟာ စာအုပ်နဲ့တော်တော်နီးစပ်တူညီပါတယ်။

နောက်ပိုင်းမှာတော့ သရုပ်ဆောင်ပြောင်းလဲခြင်း၊ ဇာတ်လမ်းဇာတ်အိမ်ပိုပြီးလေးနက်လာတာတွေကြောင့် ဒမ်ဘယ်ဒေါကို ပိုပြီးတည်ကြည်လေးနက်တဲ့ပုံစံမြင်တွေ့လာရပါတယ်။ ဒါဟာ ခြုံကြည့်လိုက်ရင်အရေးကြီးမဟုတ်ပေမယ့် Goblet of fire ထဲမှာ ဟယ်ရီ့ကိုမီးခွက်ထဲစာထည့်မထည့်မေးတဲ့ဇာတ်ဝင်ခန်းမှာ သရုပ်ဆောင်ပုံက လိုအပ်တာထက်ပိုပြီးတင်းမာခဲ့တာကြောင့် ဝေဖန်ခံရမှုတွေတော့ရှိပါတယ်။ တစ်ကယ်တမ်းတော့ စာအုပ်ထဲမှာဒီအခန်းမှာ ဒမ်ဘယ်ဒေါက အေးဆေးညင်သာစွာမေးမြန်းခဲ့တယ်လို့ရေးသားထားတာပါ။

Luna and Ginny (လူနာ နဲ့ ဂျင်းနီ)

ရုပ်ရှင်ထဲမှာ လူနာ နဲ့ ဂျင်းနီရဲ့ဆက်ဆံရေးကို ဘာမှသိပ်ပြီးမဖော်ပြသွားပေမယ့် စာအုပ်ထဲမှာတော့ သူငယ်ချင်းကောင်းတွေဖြစ်ပါတယ်။ အမှန်တော့ လူနာကို ဟယ်ရီတို့စသိတာ ဂျင်းနီကနေတစ်ဆင့်ဖြစ်ပါတယ်။ လူနာ ရဲ့ကြောင်တောင်တောင်နိုင်တဲ့စရိုက်တွေကြောင့် ကျောင်းသားတွေဝိုင်းလှောင်ကြတိုင်း ဂျင်းနီကပဲ လူနာ့ဘက်ကပဲ ရှိနေပေးခဲ့တာဖြစ်ပါတယ်။ ဒါ့အပြင် လူနာ့အတွက်အမှတ်တရအနေနဲ့ ဟယ်ရီနဲ့ ဂျင်းနီတို့မွေးတဲ့သမီးလေးကို “လီလီ လူနာ ပေါ်တာ” လို့နာမည်ပေးခဲ့ပါသေးတယ်။

Ginny (ဂျင်းနီ)

စာအုပ်ထဲက ဂျင်းနီနဲ့ ရုပ်ရှင်ထဲက ဂျင်းနီလည်းတော်တော်လေးကွာခြားပါတယ်။ ရုပ်ရှင်မှာ ဂျင်းနီရဲ့အခန်းကဏ္ဍက တော်တော်လေးနည်းသလို စရိုက်သဘာဝလည်းသိပ်ပြီးမပေါ်လွင်ခဲ့ပါဘူး။ စာအုပ်ထဲမှာဆိုရင် ဂျင်းနီက စိတ်ဓာတ်မာကြောပြီး သွက်သွက်လက်လက်ရှိတဲ့မိန်းကလေးတစ်ယောက်ပါ။ ဒါကြောင့် ဟယ်ရီ Hourcxes တွေ လိုက်ရှာပြီးသတ်ရမယ်ကိုနားလည်တဲ့အချိန်မှာ ဆွဲမထားပဲ စိတ်တင်းပြီး လက်လွှတ်ပေးခဲ့တဲ့သူပါ။ အပေါ်လွင်ဆုံးတစ်ခုပြောရမယ်ဆိုရင် ဟယ်ရီနဲ့ဂျင်းနီတို့ရဲ့ ပထမဆုံးအနမ်းဟာ ကွစ်ဒစ်ချ်ဖလားယူပြီးနောက် နားနေခန်းထဲ အားလုံးရှေ့မှာဖြစ်ခဲ့တာပါ။ ရုပ်ရှင်ထဲကလို Room of Requirement ထဲမှာမဟုတ်ပါဘူး။

Brave Ron (ရဲရင့်သော ရွန်)

ရုပ်ရှင်ထဲမှာ ရွန်ရဲ့ဇာတ်ကောင်စရိုက်ကိုလည်း တစ်ခါတစ်လေ ဟာသဖောက်လွန်းတာကြောင့် လမ်းလွဲသွားတာမျိုးရှိတယ်လို့ ခဏခဏဝေဖန်ခံရပါတယ်။ ဝေဖန်မှုတွေထဲက တစ်ခုကိုပြောရမယ်ဆိုရင် Deathly Hollows မှာ မယ်ဖွိုင်းအိမ်တော်မှာ ဘဲလားထရစ်က ဟာမွန်နီကိုနှိပ်စက်မယ်လုပ်တဲ့အချိန်မှာ ရွန်က ဟာမွန်နီအစား သူ့ကိုခေါ်ပါလို့ တောက်လျှောက်အော်သွားပြီးမှ မြေအောက်ခန်းထဲအထည့်ခံရတာပါ။ ရုပ်ရှင်ထဲမှာတော့ ဒီအတိုင်း ရေငုံနှုတ်ပိတ်လိုက်သွားခဲ့ပါတယ်။ ဒါဟာ အသေးစားကိစ္စလေးတွေလိုထင်ရပေမယ့် စာအုပ်ပါဖတ်ထားပြီး ရွန်ရဲ့ပရိသတ်တစ်ယောက်ဖြစ်မယ်ဆိုရင်တော့ စိတ်ပျက်စရာအချက်တစ်ခုပါ။

အချုပ်ပြောရရင် စာအုပ်ကို ရုပ်ရှင်အဖြစ်ပုံဖော်ခဲ့တဲ့အခါမှာ ထိန်ချန်ခဲ့ရတာတွေ မလိုအပ်တာတွေထားခဲ့ရတာထုံးစံပါ။ ဒါပေမဲ့လည်း ပရိသတ်တွေအနေနဲ့လည်း အကောင်းဆုံးလို့ယူဆထားတဲ့ ဇာတ်ဝင်ခန်းတွေကို ပြောင်းလဲပစ် ထားခဲ့ပစ်တာတွေကို မြင်ရတဲ့အခါမှာလည်း မချင့်မရဲဖြစ်ရမှာပါ။ ဘယ်လိုပဲဖြစ်ဖြစ် ဟယ်ရီပေါ်တာရုပ်ရှင်တွေဟာ စာအုပ်တွေကိုပုံဖော်တဲ့နေရာမှာ အကောင်းဆုံးမဖြစ်ခဲ့ရင်တောင် အဆိုးဆုံးမဟုတ်ခဲ့ဘူးလို့လည်း ပြောလို့ရနိုင်သေးအောင် အခြေအနေမဆိုးတဲ့ဇာတ်ကားတွေအဖြစ် ရပ်တည်နေနိုင်ပါတယ်။

Nyi Min Tun (ရိုးရာလေး)