သတင်းထောက်တစ်ဦးဟာ အသက် ၁၃ နှစ်အရွယ် ကျောင်းသူလေး ပျောက်သွားတယ်ဆိုတာကို ရိုက်ကူးနေရင်း အဲ့ဒီကျောင်းသူလေးရဲ့အလောင်းကို ထိမိခဲ့ပါတယ်။ အဲ့ဒီထိတ်လန့်ဖွယ်ဖြစ်ရပ်ကတော့ ဇွန်လက ကျောင်းသူလေးကို နောက်ဆုံးမြင်တွေ့ခဲ့ရတဲ့ ဘရာဇီးနိုင်ငံ အရှေ့မြောက်ပိုင်းမှာ ရှိတဲ့ Mearim မြစ်မှာ ဖြစ်ခဲ့တာပါ။
လီနယ်ဒို ဖရာဇာအိုဆိုတဲ့ သတင်းထောက်က မြစ်ထဲ ဆင်းကာလျှောက်သွားပြပြီးတော့ ကျောင်းသူလေး ရေကူးနေခဲ့တဲ့ နေရာနဲ့ ရေအနက်ကို ပြသနေခဲ့တာပါ။ မြစ်ရေကို သူ့ရင်ညွှန့်နားရောက်တဲ့အထိ သွားခဲ့တဲ့အချိန် ရေမျက်နှာပြင်အောက်မှာ သူ တစ်စုံတစ်ခုနဲ့ ထိတွေ့မိသလို ခံစားခဲ့ရပြီး ထိတ်လန့်တုန်လှုပ်သွားကာ ရေတိမ်ပိုင်းထိ အမြန်ပြေးသွားခဲ့ပါတယ်။
“ရေအောက်မှာ တစ်ခုခုရှိတယ်ထင်တယ်။ ဟင့်အင်း ငါ မသွားတော့ဘူး။ ငါ ကြောက်တယ်။ လက်နဲ့တူတယ်။ အဲ့ဒါက သူ ဖြစ်နိုင်မလား။ ဒါပေမဲ့ ငါးတစ်ကောင်လည်းဖြစ်နိုင်တာပဲ။ ငါ မသိဘူး”လို့ သတင်းထောက်က သူ့အဖွဲ့သားတွေကို ပြောနေခဲ့ပါတယ်။
လီနယ်ဒို သတင်းတင်ဆက်မှုအပြီး ဇွန်လ ၃၀ ရက်နေ့မှာ မီးသတ်သမားတွေနဲ့ ရေငုပ်သမားတွေက ပျောက်ဆုံးနေတဲ့ ကျောင်းသူလေး ရာအစ်ဆာကို ပြန်လည်ရှာဖွေခဲ့ကြပါတယ်။ သတင်းထောက်ရိုက်ကူးခဲ့တဲ့ နေရာအတိအကျမှာပဲ သူ့ရဲ့ရုပ်အလောင်းကို တွေ့ရှိခဲ့ပါတယ်။
ရာအစ်ဆာက မြစ်ထဲမှာ သူငယ်ချင်းတွေနဲ့အတူ ရေကူးနေရင်း ရေနစ်ခဲ့တာပါ။ သေဆုံးရခြင်းအကြောင်းအရင်းကတော့ ရုပ်ပိုင်းဆိုင်ရာ ထိခိုက်ဒဏ်ရာတွေ မတွေ့တဲ့အတွက် မတော်တဆရေနစ်သေဆုံးတာဖြစ်ပါတယ်။ ဇွန်လ ၃၀ ရက်နေ့ ညနေပိုင်းမှာ ရာအစ်ဆာကို မြေမြုပ်သင်္ဂြုဟ်ခဲ့ပါတယ်။ ရာအစ်ဆာရဲ့ကျောင်းကလည်း သူ့အတွက် ၃ ရက်တိုင်တိုင် ဝမ်းနည်းခြင်းအထိမ်းအမှတ်အဖြစ်သတ်မှတ်ခဲ့ပါတယ်။
Ref: Horrifying Moment Brazil Journalist Steps On Missing Girl’s Body While Reporting Her Disappearance
WL ( ရိုးရာလေး)
