သတိမမူမိသော မြန်မာစာလုံးပေါင်းသတ်ပုံအမှားများ

အရင်တစ်ခေါက်က မြန်မာစာအဖြတ်အတောက် အရေးကြီးပုံတွေပြောအပြီးမှာတော့ ဒီတစ်ခါ မြန်မာစာလုံးပေါင်းသတ်ပုံတွေအကြောင်း ပြောကြရအောင်။ မြန်မာစာမှာ သဒ္ဒါအရေးကြီးသလို သတ်ပုံကလည်း အရေးကြီးပါတယ်။ အချိန်တွေကြာလာတာနဲ့အမျှ စာလုံးပေါင်းသတ်ပုံတွေ ပြောင်းလဲလာတတ်တယ်ဆိုတာမှန်ပေမဲ့ မပြောင်းလဲသေးတဲ့စာလုံးပေါင်းသတ်ပုံတွေကို မှားနေကြတာဟာလည်း ဒုနဲ့ဒေးပါပဲ။ ဒီဆောင်းပါးမှာတော့ အမှားအများဆုံး စာလုံးပေါင်းသတ်ပုံအနည်းငယ်ကို ဖော်ပြပေးလိုက်ပါတယ်။

၁။ ယောင်ယမ်း၊ ရောင်ရမ်း
ဒီစကားလုံး နှစ်ခုကို တော်တော်များများ ရောထွေးပြီး အသုံးပြုနေတာမျိုး တွေ့ရပါတယ်။
ဥပမာ – “ညက အိပ်မက်မက်တာကွာ၊ မက်ရင်းကနေ ရောင်ရမ်းပြီး ပျောက်သွားတဲ့ပစ္စည်းကို အပြင်မှာပါ လိုက်ရှာနေရော” ဆိုတာမျိုး မှားယွင်းသုံးစွဲတာပါ။ ဒီလို ယောင်မှားပြီးလုပ်မိတာမျိုးတွေ၊ မှားယွင်းပြီး လုပ်ကိုင်ပြောဆိုတာမျိုးတွေကိုတော့ ယ နဲ့ ယောင်ယမ်းလို့ သုံးစွဲရမှာဖြစ်ပြီး ဒဏ်ရာက ဖောရောင်နေတာမျိုးတွေကိုတော့ ရောင်ရမ်း ညိုပုတ်နေတာပဲ စသဖြင့် သုံးစွဲရမှာပါ။ ဒီစကားလုံးနှစ်လုံးကို ရောထွေးမှားယွင်းတတ်ပုံကလည်း အမျိုးမျိုးပါပဲ။ ယောင်ရမ်း၊ ရောင်ယမ်း စသဖြင့်လည်း တွဲပြီး မှားတတ်ကြပါသေးတယ်။ ဒီ ဥပမာတွေနဲ့ဆိုရင်တော့ ရှင်းသွားလိမ့်မယ်ထင်ပါတယ်။ “အိပ်မက်ယောင်”၊ “ယောင်ယမ်းပြီး လိုက်ရှာ” ၊ “ဒဏ်ရာက ရောင်ရမ်းနေတာပဲ” စသဖြင့် သုံးစွဲရပါတယ်။

၂။ နေ့လည်၊ နေ့လယ်
ဒါကတော့ လူတော်တော်များများ မှားတတ်ကြတဲ့ အရေးအသားပါ။ “နေ့လည်”လို့ အသုံးများကြတာဖြစ်ပြီး အသံထွက်ကြောင့် မှားယွင်းတတ်တယ်လို့ ယူဆနိုင်ပါတယ်။ မြန်မာစာ အသံထွက်ဟာ ရေးတော့အမှန်၊ ဖတ်တော့အသံဆိုတဲ့အတိုင်း “လည်” စာလုံးကို လယ်လို့အသံထွက်ကြတာကြောင့် “နေ့လည်” လို့ ရေးသားလိုက်ကြဟန် တူပါတယ်။ တကယ်တမ်းမှာတော့ နေ့တစ်နေ့ရဲ့ အလယ် လို့ ဆိုလိုရင်းဖြစ်တာကြောင့် “နေ့လယ်” လို့ရေးမှသာ မှန်ပါတယ်။

၃။ ဘူး၊ ဖူး ၊ ဘဲ၊ ပဲ
ဒါကတော့ အတွေ့ရအများဆုံး အမှားတွေပါပဲ။ အငြင်းနဲ့တွဲသုံးတဲ့ ဝါကျတွေရဲ့ အဆုံးမှာ ဘူးကို ဒီလိုသုံးပါတယ်။ “မလုပ်ဘူးကွာ၊ မပြောဘူး၊ မယူဘူး၊ မဟုတ်ဘူး။” ဆိုတာမျိုး သုံးပြီး ကိုယ်မလုပ်ဖူးတဲ့ အရာတစ်ခုခုအကြောင်းပြောဆိုတဲ့အချိန်မှာတော့ “ မလုပ်ဖူးဘူး၊ မပြောဖူးဘူး၊ မသွားဖူးဘူး၊ မနေဖူးဘူး” စသဖြင့် သုံးစွဲပါတယ်။ ထိုနည်းတူ ဘဲ ဆိုတာကိုတော့ အငြင်းစကားလုံးဖြစ်တဲ့ “မ” နဲ့ တွဲသုံးတာများတယ်လို့ အလွယ်မှတ်လို့ရပါတယ်။ ဥပမာ – “ မလုပ်ဘဲ လုပ်တယ်ပြောတယ်၊ မသွားဘဲ မနေရဘူး၊ သီချင်းမဆိုဘဲ မနေနိုင်ဘူး” စသဖြင့် သုံးပါတယ်။ ကျန်တဲ့အခြေအနေမှာတော့ “ပြောမှာပဲ။ သူကဟုတ်မှမဟုတ်တာ၊ ဟုတ်ကဲ့.. ဒါပါပဲ။ သူကတော့ ဒီလိုပြောသွားတာပဲ” စသဖြင့် ပဲကို သုံးတတ်ပါတယ်။

၄။ -့ (အောက်မြစ်)
ဒါကတော့ တစ်ချို့တွေမှာ တွေ့ရတတ်တဲ့ အမှားပါ။ မြန်မာစကားမှာ သံပြတ်တွေရှိပါတယ်။ ဥပမာ – ကျ၊ ရှိ၊ မှု၊ မိ၊ စု၊ ခု၊ အောက် စသဖြင့် ဒီလိုသံပြတ်တွေမှာ -့ (အောက်မြစ်) မလိုပါဘူး။ တစ်ချို့တွေကတော့ ဘာရယ်ကြောင့် မသိဘူးခင်ဗျ။ သွားမှု့၊ လာမှု့၊ စာမေးပွဲကျ့ စသဖြင့် မလိုအပ်ဘဲ အောက်မြစ်တွေ ထည့်သုံးကြပါတယ်။ -႔ (အောက်မြစ်) ဟာ သံရှည်တွေ၊ သံလတ်တွေကို သံပြတ်ဖြစ်အောင် ကူညီပေးတဲ့ အရာပါ။ ဥပမာ – အောင်၊ အောင့်။ လို၊ လို့။ စဉ်၊ စဉ့် စသဖြင့် သံပြတ်ဖြစ်အောင် အကူအညီပေးတဲ့ အရာပါ။ မူလသံပြတ်ဖြစ်ပြီးသား စကားလုံးတွေမှာတော့ -့ (အောက်မြစ်) မလိုပါဘူး။

၅။ ထက်၊ ထပ်
သူ့ထက်သာ၊ မနာလို။ နောက်ထပ်ပြောချင်တာက။
ဒီလိုစကားလုံးတွေကိုတော့ သူ့ထပ်သာ၊ နောက်ထက် စသဖြင့် မှားယွင်းရေးသားကြပါတယ်။ ဒေသဆိုင်ရာအသံထွက်တွေနဲ့ သက်ဆိုင်တဲ့ အမှားလို့ ယူဆမိပါတယ်။ တစ်ခုနှင့်တစ်ခု နှိုင်းယှဉ်ရာမှာ ထက်ကို သုံးရမှာဖြစ်ပြီး လက်ထပ်တာ၊ နောက်ထပ် စသဖြင့် စကားလုံးတွေမှာတော့ ထပ်ကို သုံးပါတယ်။ ပိုပြီး ရှင်းလင်းအောင် ဥပမာ ပြရမယ်ဆိုရင်တော့ “သူ့ထက်သာတဲ့သူကို ရွေးပြီး လက်ထပ်လိုက်တာပေါ့။ နောင်လည်း ဘာတွေထပ်လုပ်ဦးမယ် မသိပါဘူး။ သူက ခပ်ထက်ထက်ရယ်” စသဖြင့် သုံးစွဲမှုမျိုးပါ။

၆။ တက်၊ တတ်
ထက်နဲ့ ထပ်လိုပဲ မှားတတ်ကြတာကတော့ တက်နဲ့ တတ်ပါ။ ဒီအမှားကိုလည်း မကြာခဏဆိုသလို မြင်တွေ့ရတတ်ပါတယ်။ ဥပမာ- ဒီဟာကို မောင်မောင်လုပ်တတ်တယ်၊ ကိုကိုပြင်တတ်တယ်။ ညီလေး ပြောတတ်တယ် စသဖြင့်နေရာတွေမှာ လုပ်တက်၊ ပြောတက်၊ ပြင်တက် ဆိုပြီး သုံးကြတာမျိုးတွေပါ။ တကယ်တမ်း ကိုယ်လုပ်တတ်တဲ့အရာတွေကို ပြောချင်၊ ရေးချင်တဲ့အခါမှာ “တ” နဲ့သာ တတ်ရမှာဖြစ်ပြီး ကျောင်းတက်တယ်။ အပေါ်တက်တယ်။ အတက်ရောဂါကြောင့် တက်သွားတယ်။ စသဖြင့်နေရာတွေမှာသာ “က” နဲ့သတ်ပြီး တက်လို့ သုံးရမှာပါ။ ဒါဟာလည်း အသံထွက်ကြောင့်မှားတဲ့ စာလုံးပေါင်းအမှားလို့ ယူဆရပြီး တစ်ချို့တွေကတော့ “တ” ပဲသတ်သတ် “က” ပဲ သတ်သတ် တစ်သံတည်းထွက်ကြတာမျိုး ရှိပါတယ်။ ခက်ခက်ခဲခဲ ပြင်ရမယ့် အမှားမျိုးတွေ မဟုတ်တာကြောင့် အနည်းငယ်လောက် သတိထားရေးလိုက်မယ်ဆိုရင်တော့ အဆင်ပြေသွားမှာပါ။

ဒီလောက်ဆိုရင်တော့ ရိုးရာလေး ပရိသတ်တွေကျေနပ်လိမ့်မယ်ထင်ပါတယ်။ ဒီစာလုံးတွေထဲမှာ ကိုယ်မှားယွင်းသုံးစွဲမိနေတာမျိုး ရှိခဲ့ရင်လည်း ပြင်ဆင်ဖို့ လုံလောက်လိမ့်မယ် ထင်ပါတယ်။ နောက်ထပ်၊ နောက်ထပ် စာလုံးပေါင်း မှားယွင်းတာမျိုးတွေ တွေ့ခဲ့ရင်လည်း နောက်ထပ ္စာမူတစ်ပုဒ်နဲ့ ပြန်လာခဲ့ပါဦးမယ်။ မြန်မာစာလုံးပေါင်းသတ်ပုံတွေ မှန်ကန်နိုင်ကြပါစေ။

Angelic Demon ( ရိုးရာလေး )