ကာဇက်စတန်နိုင်ငံမှာ ရုပ်ရှင်ထဲက မဟုတ်တဲ့ အပြင်က တကယ့်သူရဲကောင်းကတော့ မိုးမျှော်တိုက်ရဲ့ပြတင်းပေါက်အပြင်ဘက်ကို တွယ်တက်ပြီး ၈ လွှာမှာ တွဲလောင်းကျနေတဲ့ ကလေးမလေးတစ်ဉီးကို ကယ်တင်ဖို့ ကြိုးစားခဲ့ပါတယ်။ အဲဒီသူရဲကောင်းက အသက် ၃၇ နှစ်အရွယ် ဆာဘစ် ရိုတတ်ခ်ဘဲဗ် ဆိုသူပါပဲ။
ဆာဘစ်က သူငယ်ချင်းတစ်ယောက်နဲ့ အလုပ်လုပ်ဖို့ သွားတဲ့လမ်းမှာ မိုးမျှော်တိုက်ပေါ်က တွဲလောင်းကျနေတဲ့ ၃ နှစ်သမီးလေးကို မော့ကြည့်နေကြတဲ့ လူအုပ်ကြီးကို မြင်ခဲ့တယ်။ ချက်ခြင်းပဲ ကလေး (၄) ယောက်ဖခင် ဆာဘစ်က ကလေးလေး ပြုတ်မကျသွားခင် ကယ်တင်ဖို့ တိုက်အပေါ်ထပ်ကို အပြေးသွားခဲ့ပါတယ်။
အဆောက်အဉီးထဲ ပြေးဝင်ခဲ့ပြီး ကလေးမလေး တွဲလောင်းကျနေတဲ့ အောက်ဘက် တိုက်ခန်း ၇ လွှာကို တက်သွားခဲ့ပါတယ်။ ၇ လွှာက တိုက်ခန်းကို တံခါးခေါက်တော့ အိမ်ရှင်တွေက ချက်ခြင်း တံခါးဖွင့်ပေးခဲ့ပါတယ်။ ဆာဘစ်က ၇ လွှာရဲ့ပြတင်းပေါက်အပြင်ဘက်ကို တွယ်တက်ခဲ့ပါတယ်။ ကြောက်လန့်နေတဲ့ကလေးမလေးက ပြတင်းပေါက်ကို တွဲလောင်းခိုပြီးပြုတ်မကျအောင် ကိုင်ထားရတာ ၁၅ မိနစ်ရှိပါပြီ။
ပြတင်းပေါက်အပြင်ဘက်ကနေ ကလေးမလေးဆီရောက်အောင် တက်သွားခဲ့ပါတယ်။ ကလေးမလေးရဲ့ခြေထောက်ကို ဖမ်းကိုင်ခဲ့ပြီးနောက် ကလေးမလေးကို ဆွဲချခဲ့တယ်။ ဒါမှ ကလေးမလေးကို သူ ဖမ်းဆွဲနိုင်မှာဖြစ်လို့ပါ။ အဲဒီနောက် ကလေးမလေးကို သူငယ်ချင်းဖြစ်သူဆီ ပြတင်းပေါက်ကနေတဆင့် လှမ်းပေးခဲ့ပါတယ်။ ဆာဘစ်က အလုပ်နောက်ကျမှာဆိုးတဲ့အတွက် ကလေးမလေးရဲ့မိခင်ကို တွေ့ဖို့ မစောင့်တော့ဘဲ အလုပ်ကိုတန်းသွားခဲ့ပါတယ်။
ကလေးမလေးရဲ့မိခင်ဖြစ်သူက ဈေးဝယ်ထွက်သွားခဲ့ပြီး ကလေးကို အိမ်မှာ တစ်ယောက်တည်းထားခဲ့တာပါ။ ကလေးမလေးက နူးညံပျော့ပျောင်းတဲ့အရုပ်တွေနဲ့ ကူရှင်တွေကို စုပြီး ပြတင်းပေါက်အပြင်ဘက်ကို တက်ဖို့ လုပ်ခဲ့တာဖြစ်တယ်လို့ သိရပါတယ်။
ကလေးမလေးကို ကယ်တင်ခဲ့တဲ့ ဆာဘစ်ရဲ့အကြောင်းက သတင်းတွေနဲ့ လူမှုကွန်ယက်ပေါ်မှာ ပျံ့နှံ့သွားခဲ့ပြီး သူ့ကို “သူရဲကောင်း” လို့ ခေါ်ခဲ့ကြပါတယ်။ ဆာဘစ်ကတော့ သူ့ရဲ့လုပ်ရပ်တွေက သူရဲကောင်းဆန်တယ်လို့ မယူဆဘူး။ သူ့အတွက်ကတော့ ဒီလိုအခြေအနေမျိုးမှာ လူတိုင်း ကူညီတဲ့လက်တစ်စုံကမ်းပေးသင့်တယ်တဲ့။
နျူ-ဆူလ်တန်မြို့တော်ဝန် အယ်တိုင် ကူလ်ဂီနိုဗ်က ဆာဘစ်ကို သူ့ရဲ့ရဲစွမ်းသတ္တိရှိတဲ့လုပ်ရပ်အတွက် ချီးကျူးဂုဏ်ပြုခဲ့ပါတယ်။ အရေးပေါ်ဌာန ဒုဝန်ကြီး အီဘရာဟင်မ် ကူလ်ရှင်မ်ဘာရဲဗ်ကလည်း ဆာဘစ်ကို ရဲစွမ်းသတ္တိဆုတံဆိပ်ချီးမြှင့်ခဲ့ပါတယ်။ကယ်ဆယ်ရေးသမားတစ်ယောက်အဖြစ် အလုပ်သစ်လည်း ကမ်းလှမ်းခံခဲ့ရပါတယ်။ ဒါတင်မကသေးပါဘူး။ သူ့ကို အိမ်ခန်း (၃) ခန်းပါ တိုက်ခန်းအသစ်နဲ့ တီဗီတစ်လုံးကိုလည်း ချီးမြှင့်ခဲ့တယ်လို့ သတင်းတွေမှာ ဖော်ပြထားပါတယ်။ နွေရာသီစခန်းသွင်းသင်တန်းတက်ရာက်မယ့် သူ့ရဲ့ကလေးတွေအတွက် ငွေကိုလည်း ပေးသွားမှာဖြစ်ပါတယ်။
အခုအချိန်ထိ သူက နျူ-ဆူလ်တန်မြို့မှာ ငွေရှာနေခဲ့ပြီး ကူဇူလော်ဒါမြို့က ဇနီးထံ ငွေတွေ ပို့ပေးနေခဲ့ရတာပါ။ အခုဆိုရင် ဆာဘစ်က နျူ-ဆူလ်တန်မြို့မှာပဲ မိသားစုနဲ့အတူတူ နေနိုင်တော့မှာဖြစ်ပါတယ်။
Ref: Dailymail “Dramatic moment hero clings to the outside of a window 80ft up a tower block to save girl, three, after spotting her hanging from the eighth-floor in Kazakhstan”
Team ( ရိုးရာလေး )
