သူတို့ စုံတွဲကတော့ ၂၅ နှစ်အရွယ် အီတလီသား ဒယ်နီယယ် (Daniele) နဲ့ ၂၃ နှစ်အရွယ် ဗြိတိန်သူ ခလိုအီ (Chloe) တို့ဖြစ်ပါတယ်။ နဖူးစာရွာလည်ချင်တော့လည်း စပိန်၊ Ibiza ကျွန်းပေါ်က နိုက်ကလပ်တစ်ခုမှာ သွားဆုံမိခဲ့ကြတယ်။ မြင်မြင်ချင်း ချစ်မိသွားချိန်မှာ ဘာသာစကား မတူညီတဲ့ နှစ်ဦးသားအတွက် အရာရာ အတားအဆီးမဲ့သွားခဲ့ပါတယ်။
ကလပ်ထဲက တက္ကနို တေးသံတွေကြားမှာ မြင်မြင်ချင်း ကြွေသွားတဲ့ ခလိုအီက ဒယ်နီယယ်ဆီ ပထမဆုံးခြေလှမ်း စလှမ်းပြီး မိတ်ဆက်ခဲ့တယ်။ ဒယ်နီယယ်ရဲ့ ဖုန်းနံပါတ်ကိုတောင်းတယ်။ ဂီတသံတွေ မြူးကြွ ဆူညံနေချိန်မှာ ကြားတစ်ချက် မကြားတစ်ချက်နဲ့ စကားစပြောဖြစ်ကြရင်း ‘Google Translate’ ကို သုံးပြီး တစ်ယောက်ပြောစကား တစ်ယောက် ဘာသာပြန်လို့ နားလည်ခဲ့ကြတယ်။
ဒါဟာ လွန်ခဲ့တဲ့ ၂ နှစ်လောက်က ဖြစ်ပျက်ခဲ့တာပါ။ အဲဒီညက ဖြစ်ပျက်ခဲ့သမျှဟာ လက်ရှိအချိန်ထိ သူတို့နှစ်ယောက်ရဲ့ ရွှေလက်တွဲ မြဲစေခဲ့တာပဲ ဖြစ်ပါတယ်။ ကလပ်မှာတွေ့အပြီး တစ်ပတ်အကြာမှာပဲ ခလိုအီ နဲ့ ဒယ်နီယယ်တို့ ဘာစီလိုနာမြို့ကို အလည်အပတ်ခရီးထွက်ခဲ့ကြတယ်။
သူတို့နှစ်ဦးအကြား စိတ်ဝိညာဉ်တွေ နီးစပ်ခဲ့ကြပါတယ်။ သူတို့စုံတွဲက ခရီးသွားရတာလဲ အကြိုက်တူကြပြီး တက္ကနို တေးဂီတ အပေါ်မှာလည်း အကြိုက်တူ ပရိသတ်တွေ ဖြစ်နေပြန်ပါတယ်။ ချစ်သူဖြစ်အပြီး ၆ လ အတွင်းနဲ့ကို ဥရောပအနှံ့ ခရီးခြေဆန့်နိုင်ခဲ့ကြအောင် စိတ်တူကိုယ်တူတွေအဖြစ် စွဲငြိခဲ့ကြပါတယ်။ လူတွေရဲ့အမြင်နဲ့ အခက်အခဲမျိုးစုံကို ၂ နှစ်တာအကြာ ကျော်ဖြတ်အပြီးမှာတော့ ဒယ်နီယယ်က ခလိုအီကို အီတလီစာ ချက်ပြုတ်နည်းတတ်အောင် သင်ပေးနိုင်ခဲ့သလို ခလိုအီက ဒယ်နီယယ်နဲ့ အပြန်အလှန် စကားပြောကျင့်ရင်း ဒယ်နီယယ်အတွက် အလိုလိုတတ်မြောက်ပြီးသား ဖြစ်စေခဲ့တယ်။
လက်ရှိမှာတော့ သူတို့နှစ်ဦးဟာ အင်္ဂလန်နိုင်ငံ၊ လန်ဒန်က စထရေးသန် (Streatham) စီရင်စုမှာ အတူနေချစ်သူတွေအဖြစ် နေထိုင်ရင်း အပြန်အလှန် ယုံကြည်မှုနဲ့ ဘဝကို တည်ဆောက်နေကြပါတယ်။ ခလိုဝီက မိတ်ကပ်ပညာရှင်အဖြစ် ရပ်တည်ပြီး ဒယ်နီယယ်က ဘားမှာ အဖျော်ယမကာစပ်သူအဖြစ် လုပ်ကိုင်နေသလို အခုချိန်မှာ သူတို့နှစ်ဦးအကြား Google Translate ကို မလိုတော့တဲ့အထိ အရာရာဟာ လုံးဝ ပြီးပြည့်စုံသွားခဲ့ပါပြီ။
“စတွေ့တုန်းက ခလိုအီ က စကားတွေ အများကြီး ပြောနေခဲ့တယ်။ အကြာကြီးလည်း ရယ်မောနေခဲ့တယ်။ သူ့စကားတွေကိုတော့ ကျွန်တော် နားမလည်ခဲ့ပါဘူး။ ကျွန်တော် နားလည်ခဲ့တာက ခလိုအီက သိပ်ပြီး ထူးခြားတဲ့သူ တစ်ယောက် ဆိုတာပါ။ အဲဒီအချိန်ကတည်းက သူဟာ ကျွန်တော်နဲ့ စိတ်တူကိုယ်မျှတဲ့ ဘဝလက်တွဲဖော် ဖြစ်လာတော့မယ့်သူ လို့ ခံစားမိနေခဲ့ပါတယ်။ ” လို့ ဒယ်နီယယ်က သူတို့ရဲ့ ပထမဆုံးနေ့အကြောင်း ပြန်ပြောခဲ့သလို ခလိုအီကလည်း ဒယ်နီယယ်က သဘာဝကျကျကို ရိုးသားပြီး စစ်မှန်တဲ့သူဖြစ်ကြောင်း သိခဲ့ရတဲ့နောက် ဘဝရဲ့ အကောင်းဆုံး ဆုံးဖြတ်ချက်ကို သူချနိုင်ခဲ့တာဖြစ်ကြောင်း ပြောပြသွားခဲ့ပါတယ်။
Ref: Dailymail ” British woman who fell in love at first sight with an Italian man reveals how they used GOOGLE TRANSLATE ”
AI (ရိုးရာလေး)
