ဒီတစ်ညတော့ မပြီးပြတ်သေးတဲ့ အလုပ်တွေကို ညလုံးပေါက်မအိပ်ဘဲ လတ်စသတ်မယ်။ နောက်ရက်မှ အားရပါးရပေါင်းအိပ်မယ်။ ဒီလိုမျိုးတွေးပြီး နောက်ရက်ကျတော့ တစ်နေကုန် မထတမ်း အိပ်ပစ်လိုက်တာမျိုးတွေ ရှိဖူးလား။ ဒီလိုအတွေးမျိုး လက်ကိုင်ထားပြီး ကျင့်သုံးနေတယ်ဆိုရင်တော့ ပြန်သုံးသပ်ဖို့လိုအပ်နေပါပြီ။
အိပ်ချိန် (၈) နာရီထက် နည်းပါးလွန်းတာက အဝလွန်ခြင်း၊ နှလုံးရောဂါ၊ စိတ်ဓာတ်ကျခြင်းနဲ့ စောစီးစွာသေဆုံးခြင်း စတာတွေနဲ့ ဆက်စပ်နေပါတယ်။ အိပ်ချိန်နည်းလွန်းသလိုပဲ အိပ်ချိန်များလွန်းတာကလည်း အလားတူ ရောဂါဆိုးတွေ ဖြစ်စေနိုင်ပါတယ်။
ထိုင်ဝမ်လူငယ် (၄) သိန်းနီးပါးရဲ့ အိပ်ချိန်အလေ့အထတွေကို (၇) နှစ်ကျော်ကြာ ကြိုးစားလေ့လာခဲ့ပြီး တစ်ညကို အိပ်ချိန် (၆) နာရီကနေ (၈) နာရီထိရှိသူတွေနဲ့ နှိုင်းယှဉ်လိုက်တဲ့အခါ အိပ်ချိန် (၄) နာရီတောင် ပြည့်ပြည့်ဝဝမရသူတွေက နှလုံးရောဂါကြောင့် သေဆုံးနိုင်ချေ (၃၄) ရာခိုင်နှုန်း ပိုများကြောင်း အပြည်ပြည်ဆိုင်ရာ နှလုံးရောဂါကုထုံးဂျာနယ်မှာ ဖော်ပြထားပါတယ်။ ထိုနည်းတူစွာပဲ အိပ်ချိန် (၈) နာရီထက် ကျော်လွန်သူတွေကတော့ သေဆုံးနိုင်ချေ (၃၅) ရာခိုင်နှုန်း ပိုများပါတယ်။
ဒါဆို နေမကောင်းဖြစ်လို့ အကိုက်အခဲပျောက်ဆေးတွေသောက်ပြီး အိပ်ချိန် (၈) နာရီထက် ကျော်သွားတာကရောလို့ မေးစရာရှိပါတယ်။ ဒီမေးခွန်းကတော့ အရမ်းကောင်းတဲ့မေးခွန်းတစ်ခုပါပဲ။ ၂၀၁၄ မှာ သုတေသနပညာရှင်တစ်ဖွဲ့က အမွှာလူငယ် (၉၀၀) နီးပါးရဲ့ အိပ်ချိန်ပေါ်အခြေခံတဲ့ ကျန်းမာရေးဆိုးကျိုးတွေက မျိုးရိုးလိုက်လားဆိုတာကို လေ့လာခဲ့ပါတယ်။ စိတ်ဓာတ်ကျခြင်းက မျိုးရိုးနဲ့ ဘယ်လောက်ထိဆိုင်လဲ၊ ပတ်ဝန်းကျင်ကြောင့် ဘယ်လောက်ထိသက်ရောက်လဲ ဆိုတာကို စစ်တမ်းတွေကောက်ပြီး သုံးသပ်ခဲ့ကြတာပါ။
ညစဉ် အိပ်ချိန် (၇) နာရီကနေ (၉) နာရီထိ ရှိသူတွေမှာ စိတ်ကျရောဂါလက္ခဏာ မျိုးရိုးလိုက်နှုန်းက (၂၇) ရာခိုင်နှုန်းဖြစ်ပြီး ခုနှစ်နာရီ ဒါမှမဟုတ် ကိုးနာရီထက် လျော့နည်းသူတွေမှာတော့ (၅၀) ရာခိုင်နှုန်းဝန်းကျင်မှာ ရပ်တန့်နေပါတယ်။ အိပ်ချိန်နည်းလွန်းခြင်း၊ များလွန်းခြင်းတွေက မျိုးရိုးဗီဇနဲ့ နည်းနည်းလေးတော့ ရောထွေးနေပါတယ်။ ဒါဆို အိပ်ချိန်ပမာဏအမှန်က ဘယ်လောက်ဖြစ်ရမှာလဲလို့ မေးစရာပေါ်လာပြန်ပါပြီ။
ဘယ်အချိန်ထိအိပ်ရင် နည်းလွန်းတယ်၊ များလွန်းတယ် ဆိုတာက အသက်အရွယ်ပေါ်လည်း မူတည်ပါသေးတယ်။ လူငယ်အချို့အတွက် (၇) နာရီကနေ (၉) နာရီထိ အိပ်ချိန် လိုအပ်တာရှိသလို တချို့လူငယ်တွေကျပြန်တော့ အိပ်ချိန်နည်းနည်းပဲအိပ်တာမျိုး၊ အိပ်ချိန်အများကြီးရမှ အဆင်ပြေတာမျိုးတွေ ဖြစ်တတ်ပါတယ်။
ယေဘုယျအားဖြင့်တော့ ခေါင်းအုံ ခေါင်းကိုက်ခြင်း၊ ကျောအောင့်ခြင်း၊ ဒယိမ်းဒယိုင်ဖြစ်ခြင်းတွေ လုံးဝမရှိဘဲ လန်းလန်းဆန်းဆန်းနိုးထလာတယ်ဆိုရင် အိပ်ချိန်နည်းခြင်း၊ များလွန်းခြင်းက ပြဿနာမရှိပါဘူး။ တကယ်လို့ စိတ်ထဲမှာ အိပ်ချိန်ပုံမှန်မရှိပါလားလို့ ယူဆနေတယ်ဆိုရင်တော့ စောစောအိပ်ရာဝင်ပြီး စောစောအိပ်ရာထတာ အကောင်းဆုံးပါပဲ။
Ref: curiosity “Too Much Sleep May Be Just as Harmful as Too Little”
Alice May (ရိုးရာလေး)
