နိုင်ငံပေါင်း ၁၅၀ ကျော်ပါဝင်ထားတဲ့ PEN International ရဲ့ အဖွဲ့ဝင်အဖြစ် PEN Myanmar ဟာ ယခုအချိန်မှာ နိုင်ငံတကာ စာပေပညာရှင်များနဲ့ မြန်မာစာပေ ပညာရှင်များကို ထိရောက်စွာ ချိတ်ဆက်ပေးနိုင် နေပြီဖြစ်ပါတယ်။
PEN Myanmar ရဲ့ နှစ်ပတ်လည် Conference ကို 2015 December 5 ရက်နေ့က ကျင်းပခဲ့ပြီး ရသတံတား၊ ရသအစုန်အဆန်၊ ရသညနေခင်း စတဲ့ စာပေဆိုင်ရာလှုပ်ရှားဆောင်ရွက်မှုများနဲ့ ပတ်သက်ပြီး သတင်းထုတ်ပြန်ခဲ့ပါတယ်။
ရသတံတားအစီအစဉ်ဟာ မြန်မာနိုင်ငံတဝှမ်းမှ ဘာသာပြန်စာပေစိတ်ဝင်စားသူပညာရှင်များ၊ဝါသနာရှင်များ၊ရွက်ပုန်းသီးများ ကိုမြေတောင်မြှောက်ပေးဖို့ အတွက်ရွေးချယ်တဲ့ အစီအစဉ်ဖြစ်ပြီး ၂၀၁၅ မေလမှာ ပထမအကြိမ်အလုပ်ရုံဆွေးနွေးပွဲပြုလုပ်ခဲ့ပါတယ်။ ထိုဆွေးနွေးပွဲမှ ဘာသာပြန်စာပေဝါသနာရှင် ၂၀ ဦး (မြန်မာ- အင်္ဂလိပ် ၁၀ ဦး၊ အင်္ဂလိပ်-မြန်မာ ၁၀ဦး) ကို ရွေးချယ်ပျိုးထောင်ပေးနိုင်ခဲ့ပါတယ်။
၂၀၁၆ ခုနှစ်အတွက် ဘာသာပြန်စာပေဝါသနာရှင် ၄၀ ဦး (မြန်မာ- အင်္ဂလိပ် ၂၀ ဦး၊ အင်္ဂလိပ်-မြန်မာ ၂၀ဦး) ကိုရွေးချယ်ဖို့ လျာထားပြီး ရွေးချယ်ခံရသူများမှာ ရန်ကုန်သို့ လာရောက်ပြီး စာပေပွဲတော်ကို တက်ရမှာဖြစ်ပါတယ်။ နာမည်ကြီးစာရေးဆရာများ၊ ထုတ်ဝေသူများ၊ အယ်ဒီတာများ စတဲ့စာနယ်ဇင်းသမားများနဲ့တွေ့ဆုံရမယ့် ဒီပွဲကို ၂၀၁၆ မေလတွင်ကျင်းပမှာဖြစ်ပြီး ထိုပွဲကိုတက်ရောက်နိုင်မယ့်သူများကိုရွေးချယ်မယ့် ဘာသာပြန်စာမူပြိုင်ပွဲကိုတော့ ၂၀၁၆ ဖေဖော်ဝါရီလ လောက်မှာ စတင်လျှောက်လွှာခေါ်ယူမယ်လို့ သတင်းရရှိပါတယ်။
