မအူပင်၊ ကျိုက်လတ်၊ ဘိုကလေး၊ မော်လမြိုင်ကျွန်းနှင့် ဖျာပုံမြို့နယ်များရှိ စပါးစိုက်တောင်သူများအကြား အထွက်နှုန်းကောင်းမွန်ပြီး တစ်ဧကဝင်ငွေ တိုးတက်စေရန် အထောက်အကူပြုနိုင်သည့် နယူးဧရာ-၁၁ မျိုးစပါးအပေါ် ပိုမိုစိတ်ဝင်စားမှုရှိလာကြောင်း သိရသည်။
အဆိုပါဒေသများတွင် နှစ်စဉ် နယူးဧရာ-၁၁ အထွက်တိုးမျိုးစပါးကို ဧက ၃၅,၀၀၀ နှင့် ၄၀,၀၀၀ ကြားစိုက်ပျိုးလေ့ရှိပြီး စိုက်ပျိုးသည့် တောင်သူများအနေဖြင့် စိုက်ခင်းအတွင်း အပင်ဖြစ်ထွန်းမှု၊ အပင်သန်မာမှု၊ ရောဂါဒဏ်ခံနိုင်မှုနှင့် ရိတ်သိမ်းချိန်တွင် ရရှိသည့် အထွက်နှုန်းများနှင့် ဝင်ငွေတိုးခြင်းများ ရရှိနေသည်။
တောင်သူများ၏ ပြောကြားချက်များအရ ဒေသတွင်းအသုံးများသည့် စပါးမျိုးများနှင့် နှိုင်းယှဉ်ပါက နယူးဧရာ-၁၁ သည် အပင်သန်မာမှုနှင့် အထွက်နှုန်းပိုင်းတွင် ကွာခြားမှုများကို တွေ့ရှိရပြီး အများစုမှာ တစ်ဧကလျှင် တင်း ၁၈၀ မှ ၂၂၀ ကျော်အထိ အထွက်နှုန်းရရှိကြောင်း သိရသည်။
ထို့အပြင် နယူးဧရာ-၁၁ မှ ထွက်ရှိသည့် စပါး၏ ဆန်ရည်ဆန်သား အရည်အသွေးကောင်းမွန်မှု၊ စပါးအရည်အသွေးနှင့် ဆန်ထွက်ကောင်းမွန်မှုတို့ကြောင့် ဆန်စက်များ၏ လက်ခံ၊ ဝယ်ယူမှု ကောင်းမွန်ခြင်းကြောင့် တောင်သူများအနေဖြင့် စပါးရောင်းချမှုအပိုင်းမှာ အခက်အခဲမရှိသဖြင့် နယူးဧရာ-၁၁ မျိုးစပါးကို ပိုမိုစိတ်ဝင်စားကာ နှစ်စဉ်စိုက်ပျိုးလျက်သည်။
တောင်သူတစ်ဦး၏ အတွေ့အကြုံနှင့် စကားသံ
“ကျွန်တော်တို့အတွက် အထွက်နှုန်းက အဓိကပဲ။ တခြားမျိုးတွေနဲ့ ယှဉ်ရင် နယူးဧရာ-၁၁ က အထွက်နှုန်းပိုကောင်းတာ လက်တွေ့ တွေ့ရတယ်။ တစ်ဧက တင်း ၂၀၀ လောက်ရပြီး စပါးဈေးလည်း ကောင်းမယ်ဆိုရင် တောင်သူတွေအတွက် ရောင်းရငွေ ပိုကောင်းလာနိုင်ပါတယ်။ ဒါကြောင့် ဒီရာသီမှာလည်း ဒီမျိုးကိုပဲ ဆက်စိုက်ဖို့ စိတ်ဝင်စားတယ်”
လက်ရှိစပါးဈေးနှုန်းမှာ တင်း ၁၀၀ လျှင် ၂,၅၀၀,၀၀၀ ကျပ်ဝန်းကျင်ဖြင့် ဈေးကွက်အတွင်း အဝယ်ရှိနေပြီး နယူးဧရာ-၁၁ စိုက်ပျိုးလျှင် တစ်ဧက တင်း ၂၀၀ ရရှိသည့်အခြေအနေကြောင့် စုစုပေါင်းရောင်းရငွေမှာ ကျပ် သိန်း၅၀ ဝန်းကျင်အထိ ဝင်ငွေ ဖြစ်ထွန်းနေသည်။ ယင်းကဲ့သို့ အကျိုးအမြတ် ဝင်ငွေများစွာ ဖြစ်ထွန်းသည့်အတွက် အခြားတောင်သူများလည်း အထွက်တိုးမျိုးစပါးကိုသာ စိုက်ပျိုးကြဖို့ တိုက်တွန်းလိုပါသည်။
NZ (ရိုးရာလေး)
