ပင်ပန်း နွမ်းနယ်မှုကို အစားအသောက် နဲ့ဘယ်လို တိုက်ဖျက်မလဲ

တစ်ခါတစ်ရံ လူကဘာမှမလုပ်ချင်မကိုင်ချင်အောင် ပင်ပန်းနွမ်းနယ်နေတတ်ပါတယ်။ ဒီအခါမှာ ပြန်လည်လန်းဆန်းလာဖို့အတွက် အစားအသောက်နဲ့ဘယ်လိုတိုက်ဖျက်မလဲ နည်းလမ်းတွေကို ဖော်ပြလိုက်ပါတယ်။

၁။ ရေများများသောက်ဖို့လိုပါတယ်။ တစ်ခါတစ်လေမှာ ရေဓာတ်ခမ်းခြောက်နေရင်လည်း လူကတဖြည်းဖြည်းနွမ်းနယ်လာတတ်ပါတယ်။ ဒါကြောင့် အလုပ်တစ်ခုခုလုပ်ပြီးရင်ဖြစ်ဖြစ် လေ့ကျင့်ခန်းတစ်ခုခုလုပ်ပြီးရင်ဖြစ်ဖြစ် ရေတစ်ဝကြီးသောက်လိုက်ပါ။

၂။ ကဖင်းဓာတ်ကို တတ်နိုင်သလောက်ရှောင်ပါ။ ကဖင်းဓာတ်ဟာ ပင်ပန်းနွမ်းနယ်မှုဖြစ်စေတဲ့ အကြောင်းရင်းတစ်ခုဖြစ်ပါတယ်။ အကောင်းဆုံးနည်းလမ်းကတော့ ကော်ဖီလျှော့သောက်ပါ။ တစ်ချို့လက်ဖက်ရည်နဲ့အချိုရည်တွေထဲမှာလည်း ကဖင်းဓာတ်ပါတာကြောင့် သတိထားသောက်စေချင်ပါတယ်။ တစ်လလောက် ကောင်းကောင်းရှောင်ကြဉ်လိုက်ရင် အတော်ကြီးလန်းဆန်းလာမှာပါ။

၃။ မနက်စာမလွတ်ပါစေနဲ့။ခန္ဓာကိုယ်ရဲ့စွမ်းအားကို တိုးတက်စေပြီး အဆိပ်အတောက်တွေကို လောင်ကျွမ်းစေနိုင်ပါတယ်။ ဦးနှောက်ဟာ ဂလူးကို့စ်ကို လောင်စာအနေနဲ့အသုံးပြုပါတယ်။ ကာဗွန်ဟိုက်ဒရိတ်ကြွယ်ဝတဲ့ အစားအစာတွေကို စားသုံးပါ။ မနက်စာကို အာဟာရကြွယ်ဝစွာ စားသုံးခြင်းဖြင့် နွမ်းနယ်မှုတွေကို ဖြေလျှော့နိုင်ပါတယ်။

၄။ တစ်နေ့တာရဲ့ အစာသုံးနပ်ကို ရအောင်စားပါ။ ဘယ်လိုအကြောင်းပြချက်နဲ့မှ မလွတ်စေပါနဲ့။ အစာစားချိန်လွတ်သွားရင် သွေးတွင်းသကြားဓာတ်လုံးဝကျဆင်းသွားတတ်ပါတယ်။ ပုံမှန်စားခြင်းဖြင့် ရှိသင့်တဲ့ ဓာတ်တွေကိုထိန်းသိမ်းထားနိုင်ပါတယ်။

၅။ အသီးအနှံ ဟင်းသီးဟင်းရွက်နဲ့ အဆီနည်းနည်းပဲပါတဲ့နို့ထွက်ပစ္စည်းတွေ အဆီနည်းတဲ့အသားတွေ သင့်တင့်စွာပါပါစေ။ သကြားနဲ့ဆားတွေ လျှော့စားပါ။

၆။ အလွန်အကျွံစားသုံးမှုမှ ရှောင်ကြဉ်ပါ။ ဒါက ခန္ဓာကိုယ်ရဲ့အလုပ်လုပ်နိုင်စွမ်းကို ပိုမိုကျဆင်းစေပါတယ်။ တစ်ချို့က အများကြီးစားရင် အာဟာရပြည့်တယ်ထင်တတ်ကြပါတယ်။ ဒါဟာ မှားယွင်းတဲ့အယူအဆတစ်ခုပါ။ ခန္ဓာကိုယ်ကို ပိုမိုပင်ပန်းနွမ်းနယ်စေပါတယ်။

၇။ သံဓာတ်ပြည့်ဝတဲ့အစာများကို စားပါ။ အထူးသဖြင့် အမျိုးသမီးတွေပေါ့။ သံဓာတ်နည်းပါးလာရင် ပင်ပန်းနွမ်းနယ်ပြီး စိတ်ဖိစီးမှုတွေပါ ကြုံရတတ်ပါတယ်။ ဒါ့ကြောင့် အနီရောင်ရှိတဲ့အသားတွေအပြင် သံဓာတ်ကြွယ်ဝတဲ့ အစားအစာများကို များများစားပေးပါ။

Ref: Better health: Fatigue Fighting Tips
Sophia (ရိုးရာလေး)