အခုတော့ ကျွန်တော့်သားနှစ်ယောက် လူလားမြောက်ပါပြီ။ ဒီနှစ်ဆိုရင် တစ်ယောက်က ၃၂ နှစ်၊ နောက်တစ်ယောက်က ၂၇ နှစ်ရှိပါပြီ။ အသက် ကြီးလာပေမဲ့ သူတို့နှစ်ယောက်လုံး ကလေးစိတ်ပဲ ရှိပါသေးတယ်။ အော်တစ်ဇင်(Autism)က သူတို့ရဲ့ဉာဏဆိုင်ရာ ဖွံ့ဖြိုးမှုကို ဘောင်ခေတ်ထားခဲ့လို့ သူတို့ကို အချိန်ပြည့်စောင့်ရှောက်ရပါတယ်။ ကျွန်တော် ကလေးဘဝတုန်းကတော့ ကျွန်တော့်သားတွေလို အခြေအနေရှိသူတွေကို စိတ်မနှံ့သူတွေလို့ ခေါ်ကြပါတယ်။ ကျွန်တော် အရွယ်ရောက်လာတော့ ဦးနှောက်ဖွံ့ဖြိုးမှုအားနည်းသူတွေလို့ ခေါ်ကြပြန်တယ်။ နောက်ပိုင်းကျတော့ ဉာဏ်ရည်နိမ့်ပါးသူတွေလို့ ပြောင်းလဲသုံးစွဲခဲ့တယ်။ တကယ်တော့ အဲဒီစကားလုံး အသုံးအနှုန်းအားလုံးက သူတို့ရဲ့ပကတိ အခြေအနေကို ပုံဖော်နိုင်ခြင်းမရှိပါဘူး။ သူတို့တွေက အဲဒီဝေါဟာရတွေထက် အဆပေါင်းများစွာ သာလွန်အောင် စွမ်းဆောင်နိုင်သူတွေပါ။
ဒီနေ့အချိန်မှာတော့ အထူးဂရုစိုက်ဖို့ လိုအပ်သူတွေလို့ သုံးနှုန်းကြပါတယ်။ ဒီစကားလုံးက ပိုပြီး နူးညံ့သိမ်မွေ့သလို သူတို့ရဲ့ အခြေအနေနဲ့လည်း ပိုအပ်စပ်လို့ ကျွန်တော်ကတော့ အရင်အသုံးအနှုန်းတွေထက် ပိုသဘောကျပါတယ်။ ကျွန်တော့်သားတွေက အထူးလိုအပ်ချက်ရှိသူတွေပါ။ ဒါပေမဲ့ သူတို့မှာ တမူထူးခြားတဲ့ ပင်ကိုယ်စွမ်းရည်တွေလည်း ရှိပါတယ်။ ကျွန်တော့်သားအကြီးဆုံးက စကားလုံး တချို့တလေပဲ ပြောတတ်တယ်။ အော်တစ်ဇင်က သူ့ရဲ့သင်ယူနိုင်စွမ်းနဲ့ စိတ်ဝင်စားမှုကို ကန့်သတ်ထားတယ်။ ဒါပေမဲ့ သူက လူတွေကို နာမည်ခေါ်ပြီး နှုတ်ဆက်ရရင် ပျော်ရွှင်နေတတ်သူပါ။ လူတစ်ယောက်ယောက်ကို သူ ချစ်ခင်တာ၊ ပွေ့ဖက်တာတွေက ကျွန်တော့်ထက်ပိုပြီး လွတ်လပ်ရိုးရှင်းပါတယ်။ သူနဲ့ ဆုံတွေ့သူတိုင်းကို စိတ်ချမ်းမြေ့စေတယ်။ ကျွန်တော့် အငယ်ဆုံးသားက လုံးဝစကားမပြောတတ်ပါဘူး။ အချိန်တော်တော်များများ သူတစ်ယောက်တည်း သီးသန့်နေတတ်ပါတယ်။ တစ်ခါတလေ ချောင်ထဲသွားပြီး အော်ငိုတာ၊ ကိုယ့်ကိုယ်ကိုယ် ပြန်ရိုက်တာမျိုး လုပ်တတ်ပါတယ်။ ဒါပေမဲ့ သူ့ရဲ့ ရယ်မော၊ ပျော်ရွှင်နိုင်စွမ်းက ကျွန်တော့်ထက် အများကြီးသာပါတယ်။ သူက ငိုပြီးပြီးချင်း ရယ်လို့ရတယ်။ ကျွန်တော်ဆိုရင်တော့ ငိုပြီးရင် နာရီတော်တော်ကြာတဲ့အထိ မှိုင်တွေနေတတ်တယ်။ အထူးလိုအပ်ချက်ရှိတဲ့ ကျွန်တော့်သားနှစ်ယောက်က ဘယ်လိုရှင်သန်ရမလဲ၊ လူတွေကို ဘယ်လိုချစ်ရမလဲဆိုတာကို ကျွန်တော်ကိုယ်တိုင် လေ့လာနိုင်စွမ်းရှိတာထက် ပိုပြီးသင်ပြပေးခဲ့ပါတယ်။
တကယ်တော့ ကျွန်တော်တို့အားလုံးက အထူးလိုအပ်ချက်ရှိသူတွေပါပဲ။ ကျွန်တော်တို့အားလုံးမှာလည်း ထူးခြားတဲ့ ပင်ကိုယ်စွမ်းရည်တွေ ရှိပါတယ်။ ကျွန်တော်တို့ရဲ့ စွမ်းရည်တွေကို ဝေမျှပေးမလား၊ တစ်ယောက်ရဲ့လိုအပ်ချက်ကို တစ်ယောက်က ဖြည့်ဆည်းပေးမလား၊ တစ်ယောက်နဲ့တစ်ယောက် ချစ်ချစ်ခင်ခင်၊ ကြင်ကြင်နာနာ ဆက်ဆံမလားဆိုတာကတော့ ကျွန်တော်တို့အပေါ်မှာပဲ မူတည်ပါတယ်။ တကယ်တော့ ကျွန်တော်တို့က ကမ္ဘာကြီးရဲ့မိသားစုဝင်တွေပါပဲ။
Sunny Skyz သတင်းဌာနမှ ဂျိုးဆက်ဂျေမက်ဇဲလား(Joseph J. Mazzella)ရေးသားတဲ့ Special Needs ကို ဘာသာပြန်ဆိုပါသည်။
Nz (ရိုးရာလေး)
