တောင်အာဖရိကနိုင်ငံမှာ ကိုရိုနာဗိုင်းရပ်စ် ကူးစက်ခံရတဲ့ စစ်သည် ၄၀ ထက်မနည်းရှိတယ်လို့ တောင်အာဖရိကကာကွယ်ရေးတပ်ဖွဲ့(SANDF)က အတည်ပြုခဲ့ပါတယ်။ ကိတ်တောင်းမြို့မှာ အခြေစိုက်တဲ့ ခြေမြန်တပ်ရင်းက စစ်သည်တွေ ရောဂါကူးစက်ခံခဲ့ရတာပါ။ သူတို့ဟာ တောင်အာဖရိကနိုင်ငံမြောက်ပိုင်း လင်ပိုပိုပြည်နယ်ကို စေလွှတ်ခံခဲ့ရသူတွေဖြစ်ပါတယ်။ တောင်အာဖရိကနဲ့ ဇင်ဘာဘွေနိုင်ငံကြား နယ်စပ်လုံခြုံရေးတာဝန်ယူထားတဲ့ တခြားတပ်ရင်းတစ်ခုကို အင်အားဖြည့်ဖို့အတွက် စစ်သည်တွေကို လီဖာလာလီမြို့ထံ မလွှတ်ခင် ကျန်းမာရေးအရ လိုအပ်တဲ့ ကြိုတင်ကာကွယ်မှုအားလုံး လုပ်ခဲ့တယ်လို့ SANDF က ပြောပါတယ်။
ဇွန်လ ၁၃ ရက်က လီဖာလာလီမြို့ကို ရောက်ရှိချိန်မှာ စစ်သည်တွေကို ၁၄ ရက်ကြာ အသွားအလာကန့်သတ်ထားပြီး ဆေးစစ်ချိန်မှာ စစ်သည်အချို့က ကိုရိုနာဗိုင်းရပ်စ် ရှိနေမှန်း တွေ့ရှိခဲ့တာပါ။ ကိုရိုနာဗိုင်းရပ်စ် ကူးစက်ခံထားရသူတွေကို အခြေစိုက်စခန်းရဲ့ အဆောက်အအုံတစ်ခုထဲမှာ သီးသန့်ခွဲခြားထားပါတယ်။ တောင်အာဖရိကနိုင်ငံမှာ ကိုရိုနာဗိုင်းရပ်စ် ၁၆၈၀၀၀ ကျော်ရှိနေပြီး သေဆုံးသူ ၂၈၄၄ ယောက် ရှိပါတယ်။
Nz (ရိုးရာလေး)
