လက်မပါဘဲ မွေးဖွားလာပြီး လေယာဉ်မှူးဖြစ်လာတဲ့ အမျိုးသမီး

လက်မပါဘဲ မွေးဖွားလာတဲ့ အမျိုးသမီးတစ်ဦးဟာ ခြေထောက်နဲ့ လေယာဉ်မောင်းတတ်အောင် သင်ယူခဲ့ပြီး လိုင်စင်ရ လေယာဉ်မှူး ဖြစ်လာခဲ့ပါတယ်။ ဒါဟာ အမေရိကန်နိုင်ငံသမိုင်းမှာ ပထမဆုံးပါပဲ။ အရီဇိုးနားပြည်နယ်၊ ဖီးနစ်မြို့မှာ နေထိုင်တဲ့ အသက် ၃၆ နှစ်အရွယ် အမျိုးသမီး ဂျက်ဆီကာကော့ဟာ ထူးခြားတဲ့ရောဂါတစ်မျိုးကြောင့် လက်နှစ်ဖက်လုံး မပါဘဲ မွေးဖွားလာခဲ့သူပါ။

လက်နှစ်ဖက်လုံး လက်မောင်းအရင်းကနေ မပါဘဲ မွေးဖွားလာတာကြောင့် ဂျက်ဆီကာဟာနေ့စဉ်ဘဝမှာ လုပ်ဆောင်ရမယ့်ကိစ္စအားလုံးကို ခြေထောက်နဲ့ လုပ်တတ်အောင် သင်ယူခဲ့ရပါတယ်။ သူဟာ ခြေထောက်နှစ်ဖက်နဲ့ စန္ဒရားတီးတာ၊ ကားမောင်းတာတွေပါ လုပ်နိုင်တဲ့အပြင် အသိအမှတ်ပြု လက်မှတ်ရ စကူဘာရေငုပ်သမားလည်း ဖြစ်ပါတယ်။ တိုက်ကွမ်ဒိုမှာလည်း တတိယအဆင့် ခါးပတ်နက် ရထားသူပါ။ သူ့ရဲ့ အထူးခြားဆုံး အောင်မြင်မှုကတော့ အင်ဂျင်တစ်လုံးတပ် လေယာဉ်ပိုင်းလော့ ဖြစ်လာခဲ့တာပါပဲ။

သူ့ရဲ့အောင်မြင်မှုတွေဟာ အခြားမသန်စွမ်းသူတွေအတွက် အားကျအတုယူစရာ ဖြစ်လာစေဖို့ မျှော်မှန်းထားကြောင်း ဂျက်ဆီကာက ဆိုပါတယ်။ ဂျက်ဆီကာဟာ ၂၀၀၅ ခုနှစ်မှာ အရီဇိုးနားပြည်နယ်တက္ကသိုလ်ကနေ စိတ်ပညာဆိုင်ရာဘွဲ့ ရပြီးနောက်ပိုင်းကတည်းက လေယာဉ်မှူး ဖြစ်လာဖို့ ကြိုးပမ်းခဲ့သူပါ။

ဂျက်ဆီကာကို ကိုယ်ဝန်ဆောင်ချိန်မှာ ဓာတ်မှန်ရိုက်ကြည့်တော့ သန္ဓေသားက ပုံမှန်အတိုင်းပဲလို့ ပြသခဲ့ပေမဲ့ amelia လို့ခေါ်တဲ့ ရှားပါးအခြေအနေတစ်ရပ်ကြောင့် လက်နှစ်ဖက်လုံးမပါဘဲ မွေးဖွားလာခဲ့တာ ဖြစ်ပါတယ်။ ဒီအခြေအနေဟာ ကိုယ်ဝန်ဆောင်ချိန် ၂၄ ရက်ကနေ ၃၆ ရက်ကြားမှာ သန္ဓေသားကြီးထွားမှု ရုတ်တရက်ရပ်တန့်သွားတာမျိုးပါ။ အဲဒီလို အခြေအနေမျိုးနဲ့ မွေးဖွားလာသူ အများစုဟာ အသက်မပါဘဲ မွေးဖွားလာတာ၊ မွေးပြီး သိပ်မကြာခင် သေဆုံးသွားတာမျိုး ဖြစ်လေ့ရှိပါတယ်။

Ref:Woman born without arms becomes the first licensed pilot to fly a plane with just her FEET

Team ( ရိုးရာလေး)