“အဖေ အားလုံးကို သိသားနဲ့..တိတ်တိတ်လေးပဲ ကြည့်နေခဲ့တယ်”…ဒီစကားကတော့ အသက် ၂၂ နှစ်အရွယ် မလေးရှားလူမျိုးကောင်မလေး မသေဆုံးခင် ချန်ခဲ့တဲ့ စာမှာ ရေးထားတာပါ။ ဝမ်ချူယွီဆိုတဲ့ ကောင်မလေးက ဇန်နဝါရီ ၁၈ ရက်နေ့မှာ ကင်ဆာရောဂါနဲ့ မသေဆုံးခင် သူ့အဖေနဲ့မိထွေးရဲ့အနိုင်ကျင့်နှိပ်စက်မှုအကြောင်း စာချန်သွားခဲ့ပါတယ်။
ဝမ်ချူယွီရဲ့နောက်ဆုံးဆန္ဒအရ ဒီစာကို ဇန်နဝါရီ ၂၁ ရက်နေ့က သူ့ရဲ့ညီမဖြစ်သူဟာ ဖေ့စ်ဘွတ်ခ်မှာ တင်ပေးခဲ့တာပါ။ အဲ့ဒီပို့စ်မှာ ဆေးရုံကုတင်ပေါ်မှာ ဇန်နဝါရီ ၉ ရက်နေ့ လက်မှတ်ရေးထိုးခဲ့တဲ့ စာကို ကိုင်ဆောင်ထားတဲ့ ချူယွီရဲ့ဓာတ်ပုံလည်းပါဝင်ပါတယ်။
သူ့အဖေကို ရည်ညွှန်းထားတဲ့ စာမှာ ချူယွီက သူ့အပေါ်ထားတဲ့ သူ့အဖေရဲ့ချစ်ခြင်းမေတ္တာကို မေးခွန်းထုတ်ခဲ့ပြီး ကွာလာလမ်ပူမှာ ဆေးကုသမှုခံယူပြီးနောက် စီပူမြို့ကို အိမ်ပြောင်းလာခဲ့ပြီးကတည်းက နေ့တိုင်း ရုပ်ပိုင်းဆိုင်ရာနဲ့စိတ်ပိုင်းဆိုင်ရာအနိုင်ကျင့်မှုတွေကို ခံစားခဲ့ရကြောင်း ပြောဆိုထားပါတယ်။
ရုပ်ပိုင်းဆိုင်ရာအနိုင်ကျင့်မှုအပြင် သူ့မိထွေးက သူနဲ့ သူ့ညီမကို ရေချိုးခန်းနဲ့ မီးဖိုချောင်တွေကို အသုံးပြုခွင့်မပေးဘူးလို့လည်း ဆိုထားပါတယ်။ သူ့အဖေရဲ့စိတ်သဘောထားက နောက်အိမ်ထောင်ပြုပြီးတဲ့နောက်မှာ ပြောင်းလဲသွားတယ်လို့ ချူယွီက ပြောထားပါတယ်။
သူ့အဖေက အနိုင်ကျင့်နှိပ်စက်တာကို ခွင့်လွှတ်ပေးထားပြီး မိထွေးက သူ မြန်မြန်သေအောင် ကျိန်ဆဲခဲ့တယ်လို့ ဆိုပါတယ်။ “သမီး ထွက်သွားပြီးတဲ့နောက် အဖေရဲ့ကလေးတွေကို ကောင်းကောင်းဆက်ဆံဖို့ မျှော်လင့်တယ်”လို့လည်း ချူယွီက စာထဲမှာ ရေးထားပါတယ်။
ချူယွီရဲ့ညီမဖြစ်သူက သူ့ရဲ့ဖုန်းထဲက ဓာတ်ပုံတွေနဲ့ ဗီဒီယိုတွေကို ဇန်နဝါရီ ၂၃ ရက်နေ့မှာ တင်ပေးခဲ့ပါတယ်။ “ဒီအကြောင်းကို လူသိရှင်ကြားဖြစ်အောင်လုပ်ဖို့ ဆုံးဖြတ်ထားပါတယ်။ နာမည်ကြီးချင်လို့လုပ်တာမဟုတ်ဘဲ လူတိုင်းသိအောင်လို့ပါ။ ကျွန်မ့အစ်မရဲ့စာမှာ ရေးထားတဲ့အတွေ့အကြုံတိုင်းက စွပ်စွဲပြောဆိုချက်တွေမဟုတ်ပါဘူး။ တကယ်အဖြစ်အပျက်တွေပါ”လို့ ရေးသားထားပါတယ်။ ဓာတ်ပုံတွေထဲကတစ်ပုံမှာ ရေချိုးခန်းအသုံးမပြုဖို့ ပြောထားတဲ့ သူတို့ရဲ့မိထွေး ထုတ်ထားတဲ့ သတိပေးစာကို ပြထားပါတယ်။
ချူယွီရဲ့အိပ်ခန်းတံခါးသော့ကို ဖျက်ပြီး ပစ္စည်းတွေကို ရှာဖွေကြည့်နေတာကို ပြနေတဲ့ ဗီဒီယိုလည်း ပါဝင်ပါတယ်။ အိမ်ထဲက သော့တွေအားလုံးလည်း သူတို့ရဲ့မိထွေးကြောင့် ပျက်စီးသွားတယ်လို့လည်း ဆိုထားပါတယ်။ မိထွေးဖြစ်သူက အိမ်ထဲ ခိုးဝင်ပြီး ပစ္စည်းတွေယူတယ်ဆိုတဲ့ ပြောဆိုချက်အတွက်လည်း မနက် ၆ နာရီမှာ သူ့အဖေနဲ့ မိထွေးက မီးဖိုချောင်သုံးပစ္စည်းတွေနဲ့ ပန်းကန်ခွက်ယောက်အားလုံးကို ခိုးယူနေတယ်ဆိုတာကို ဗီဒီယိုမှာ ပြထားပါတယ်။
ကွယ်လွန်သူဝမ်ချူယွီဟာ ၂၀၁၃ ခုနှစ်ကတည်းက သူ့မိသားစုရဲ့လျစ်လျူရှုအနိုင်ကျင့်မှုကို ခံနေရတာကို ပြီးခဲ့တဲ့နှစ် ဒီဇင်ဘာလမှာ ရဲစခန်းတိုင်ကြားခဲ့ကြောင်း မလေးရှားရဲတပ်ဖွဲ့က ပြောပါတယ်။ ရဲစခန်းက ကလေးသူငယ်အက်ဥပဒေအရ အမှုကို စုံစမ်းစစ်ဆေးနေတယ်လို့ သိရပါတယ်။
Ref: ‘You only watched quietly’: Malaysian woman leaves letter alleging abuse by dad and stepmother before dying of cancer
WL (ရိုးရာလေး)
