နေ့စဉ် လှုပ်ရှားရုန်းကန်နေရတဲ့ဘဝမှာ စိတ်ဖိစီးမှု၊ စိတ်ပင်ပန်းနွမ်းနယ်မှု စတဲ့ စိတ်ပိုင်းဆိုင်ရာပြဿနာတွေအပြင် ရုပ်ပိုင်းဆိုင်ရာ ရောဂါတွေဖြစ်တဲ့ သွေးတိုးခြင်း၊ ဆီးချို သွေးချို၊ အဝလွန်ခြင်းတို့ကို ရင်ဆိုင်နေရပါတယ်။ များသောအားဖြင့် နှလုံးနဲ့ ပတ်သက်ဆက်နွယ်တဲ့ ရောဂါ တွေက ပိုပြီးအဖြစ်များသလို နှလုံးရောဂါကြောင့် လူလေးယောက်မှာ တစ်ယောက်နှုန်း သေဆုံးကြောင်းလည်း ဆေးပညာစာရင်းဇယားတွေမှာ ဖော်ပြထားပါတယ်။
ရုတ်တရက်နှလုံးအမောဖောက်ခြင်း ( heart attack) ဆိုတာက ရုပ်ရှင်တွေထဲမှာလို ရင်ဘတ်ဖိပြီး ဘုန်းကနဲပစ်လဲသွားတာမျိုးလောက် မရိုးရှင်းပါဘူး။ နှလုံးကသတိပေးနေတဲ့ ရောဂါလက္ခဏာတွေကို အမြဲမပြတ်သတိချပ်ပြီး စောစီးလျင်မြန်စွာကုသမှ အသက်အန္တရာယ်ကနေစိတ်ချရမှာ ဖြစ်ပါတယ်။
ဘယ်လိုမျိုးရောဂါလက္ခဏာတွေ ပြလာရင် Heart attack မှန်း သိနိုင်ပါသလဲ
ရင်ဘတ်ထဲမှာ သက်တောင့်သက်သာ မရှိခြင်း
ရင်ဘတ်ကြီးထဲမှာ တင်းတင်းကျပ်ကျပ်ဖြစ်ပြီး နာကျင်မယ်၊ သက်တောင့်သက်သာ မရှိဘူးလို့ ခံစားနေရရင် အချိန်မီ ဆေးခန်းပြေးသင့်ပါတယ်။ ဒါက heart attack ရဲ့ ရှေ့ပြေးလက္ခဏာလို့ ပြောလို့ရပါတယ်။
လက်မောင်းတစ်လျှောက် နာကျင်လာခြင်း
လက်မောင်းတစ်လျှောက် နာကျင်မှုကိုခံစားရတဲ့အခါ လူတွေက နှလုံးရောဂါအပြင်းစားကို ဖော်ပြနေပြီလို့ သတိမပြုမိတတ်ကြပါဘူး။ ရင်ဘတ်ထဲက အောင်တဲ့အအောင့်က ဘယ်ဘက်လက်မောင်းတောက်လျှောက် တဖြည်းဖြည်းရောက်လာတယ်ဆိုရင်တော့ ပေါ့ဆမနေဘဲ ဆေးရုံပြေးပြီး ECG ဆွဲရပါမယ်။
လည်ချောင်း ဒါမှမဟုတ် မေးရိုး နာကျင်ခြင်း
အမျိုးသမီးတွေမှာဆိုရင် ရင်ဘတ်အောင့်တာအပြင် မေးရိုး ဒါမှမဟုတ် လည်ပင်းတစ်ဝိုက်မှာ နာကျင်ခြင်းတွေ ပြတတ်ပါတယ်။ ရင်ဘတ်ထဲကနေ နာကျင်မှုက လည်ချောင်း ဒါမှမဟုတ် မေးရိုးတွေထိပါ နာကျင်လာတယ်ဆိုရင် ဒါက သေချာပေါက် heart attack လက္ခဏာပါပဲ။
အလွန်အမင်း မောဟိုက်လာခြင်း
အရင်တုန်းက အသာလေး လုပ်နိုင်တဲ့ အလုပ်တွေကို မောဟိုက်ပင်ပန်းစွာ ဆောင်ရွက်နေရပြီဆိုရင်တော့ ဒါက heart attack ရဲ့ လက္ခဏာပါပဲ။
ချွေးထွက်လွန်ခြင်း
ရင်ဘတ်ထဲက အောင့်ပြီး မောဟိုက်ပင်ပန်းလာမယ် ရင်ဘတ်ထဲမှာ ဖျစ်ညှစ်ထားသလို ခံစားနေရတာတွေအားလုံးက ချွေးစေးပြန် မအီမသာ ဖြစ်ခြင်း၊ အော့အန်မူးဝေခြင်းရဲ့နောက်ဆက်တွဲ ဖြစ်တာဆိုရင်တော့ ဒါက သေချာပေါက် heart attack ရဲ့ လက္ခဏာအကြီးစားပဲ ဖြစ်ပါတယ်။
အပေါ်မှာ ပြောခဲ့တဲ့ ရောဂါလက္ခဏာတွေအားလုံးကို သင်ဒါမှမဟုတ် သင်နဲ့ နီးစပ်သူတစ်ယောက်ယောက်က ခံစားနေရပြီဆိုရင်တော့ အကူအညီ ချက်ချင်းပေးဖို့ လိုပါတယ်။ တကယ်လို့ မိနစ် ၃၀ ဒါမှမဟုတ် ဒီ့ထက်ပိုကြာသွားမယ်ဆိုရင်တော့ အသက်အန္တရာယ်စိုးရိမ်ရနိုင်ချေရှိပါတယ်။ ဒါကြောင့် ပေါ့ဆမနေဘဲ အချိန်မီ ဆေးရုံကိုသွားပြနိုင်ရင် အကောင်းဆုံးဖြစ်ကြောင်း အသိပေးရေးသားလိုက်ရပါတယ်။
Ref: blinkd.io “Symptoms of heart attack you should never ignore”
Alice May (ရိုးရာလေး)
