သန္ဓေသားက ဦးနှောက်ဖွံ့ဖြိုးမှုမရှိလို့ ကိုယ်ဝန်ဖျက်ချဖို့ ဆရာဝန်တွေ ၅ ကြိမ်တိုင်တိုင် ပြောခဲ့ပေမဲ့ နိုအာဝေါလ်ရဲ့မိဘနှစ်ပါးက ငြင်းဆန်ခဲ့ကြတယ်။ နိုအာဝေါလ်က သန္ဓေသားဘဝမှာ ဦးနှောက် ၂ ရာခိုင်နှုန်းပဲ ရှိသလို မွေးရာပါ ကျောရိုးမအာရုံကြော နှစ်ခြမ်းကွဲတဲ့ရောဂါ(spina bifida) ပါ ခံစားနေရသူပါ။
” ငယ်ရွယ်တဲ့ လင်မယားတွေဆိုရင်တော့ ဆရာဝန်တွေ အကြံပေးတာကို လက်ခံချင် လက်ခံလိမ့်မယ်။ ကျွန်တော်တို့လင်မယားကတော့ အသက်လည်း ရနေပြီ။ သူ့ကို ရှင်သန်ခွင့်ပေးဖို့ ဆုံးဖြတ်ပြီးသားလည်း ဖြစ်နေတယ်။ ပြီးတော့ ကျွန်တော်တို့ ၂ ယောက်လုံးက အပြုသဘောဆောင်ကြလို့ ဒီကလေးကို မွေးဖွားခဲ့တာပါ” လို့ နိုအာဝေါလ်ရဲ့အဖေ ရော့ဘ်ဝေါလ်က ပြောပါတယ်။
၂၀၁၂ ခုနှစ်က အင်္ဂလန်နိုင်ငံ ကမ်ဘရီယာကောင်တီမှာ နိုအာဝေါလ်ကို မွေးပါတယ်။ ဆေးရုံခွဲခန်းထဲမှာ ဆရာဝန် ၁၂ ယောက် ရှိတယ်။ တကယ်လို့ ကလေးက အသက်မရှူရင် CPR မလုပ်ဖို့လည်း ဆရာဝန်တွေက ဆုံးဖြတ်ပြီးသားပါ။ ဒါကြောင့် သူ့အသက်ရှူ၊ မရှူဆိုတာကို တထိတ်ထိတ် စောင့်စားခဲ့ရတာပါ။ ဒါပေမဲ့ နိုအာက တခြားကလေးတွေလိုပဲ မွေးမွေးချင်း ငိုလိုက်လို့ သူ့မိဘတွေ စိတ်အေးခဲ့ရတယ်။
ဆရာဝန်တွေကတော့ နိုအာကို အသက်ရှည်မယ်လို့ ထင်မထားကြဘူး။ မိခင်ဝမ်းထဲမှာ ဦးနှောက်မဖွံ့ဖြိုးတဲ့ သန္ဓေသားက ဦးနှောက်ကြီးထွားဖွံ့ဖြိုးလာမှာ မဟုတ်ဘူးလို့ ဆရာဝန်တချို့က ယူဆကြတယ်။ နိုအာက စကားလည်း ပြောနိုင်မှာမဟုတ်ဘူးလို့ သူတို့ ထင်ကြတယ်။
ဒါပေမဲ့ သူတို့တွက်ကိန်းလွဲခဲ့ပြီး နိုအာက ၃ နှစ်သားအရွယ်မှာ စကားပြောတတ်ခဲ့တယ်။ နိုအာရဲ့မိဘတွေက သြစတြေးလျနိုင်ငံကိုသွားပြီး အာရုံကြောဆိုင်ရာ သမားတော်တွေနဲ့ ပြခဲ့တယ်။ နိုအာရဲ့ဦးခေါင်းထဲမှာ အရည်တွေကို စုပ်ထုပ်ပြီး ဦးနှောက်ဖွံ့ဖြိုးလာအောင် နေရာပေးဖို့ ပိုက်ထည့်ခဲ့တယ်။ ဒါကြောင့် ၆ နှစ်သားအရွယ်မှာ နိုအာရဲ့ ဦးနှောက်ဖွံ့ဖြိုးမှုက ၈၀ ရာခိုင်နှုန်း ရှိလာခဲ့တယ်။ နိုအာရဲ့ ဦးနှောက်ဖွံ့ဖြိုးမှုကို ကြည့်ပြီး ဆရာဝန်တွေ အံ့အားသင့်ကုန်ကြတယ်။
နိုအာက ဘီးတပ်ကုလားထိုင် သုံးရပေမဲ့ မိဘတွေက သူ့ကို လမ်းလျှောက်တတ်အောင်၊ အားကစားနည်းတွေ ကစားတတ်လာအောင် သင်ပေးတယ်။ သူတို့မိသားစုမှာ နိုအာ တစ်ယောက်တည်း ယောကျာ်းလေးပါတာဆိုတော့ မိဘ ၂ ပါးကရော၊ အစ်မ ၂ ယောက်ကပါ နိုအာကို အရမ်းချစ်ကြတယ်။ နိုအာ ကျန်းမာသန်စွမ်းလာဖို့ အားလုံးဝိုင်းပြီး ကြိုးစားပေးနေကြတယ်။
Ref: Boy Born Without A Brain Overcomes Incredible Odds To Live
NZ (ရိုးရာလေး)
