ဒေါ်အောင်ဆန်းစုကြည်၏ မိန့်ခွန်းကောက်နုတ်ချက် သတင်း
နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က COVID-19 ရောဂါဖြစ်ပွားမှု နောက်ဆုံးအခြေ အနေနဲ့စပ်လျဉ်းပြီး ပြည်သူလူထုသို့ အစီရင်ခံတင်ပြတဲ့ မိန့်ခွန်းကို မြန်မာ့အသံနှင့် ရုပ်မြင်သံကြားရဲ့ မတ် ၂၄ ရက်၊ ည ၆ နာရီအစီအစဉ်မှာ ထုတ်လွှင့်ခဲ့ပါတယ်။
COVID-19 ရောဂါဟာ ကုသလို့ရတဲ့ရောဂါဖြစ်တဲ့အတွက် ရောဂါလက္ခဏာပေါ်လာပြီလို့ ထင်စရာ ဖြစ်တာနဲ့ အနီးဆုံး ကျန်းမာရေးဌာနကို သွားရောက်အသိပေးစေလိုတယ်လို့ နိုင်ငံတော်၏ အတိုင်ပင်ခံပုဂ္ဂိလ် ဒေါ်အောင်ဆန်းစုကြည်က တိုက်တွန်းလိုက်ပါတယ်။
”စောစောပြော၊ စောစောသိ၊ အားလုံးအကျိုးရှိဆိုတဲ့အတိုင်း ကျန်းမာရေးဌာနကို စောစောပြောသင့်တာ ပြောပါ။ ဒါဟာ ကိုယ့်လုံခြုံရေး၊ ကိုယ့်ပတ်ဝန်းကျင်ရဲ့လုံခြုံရေး နှစ်ရပ်စလုံးအတွက် ဖြစ်ပါတယ်”လို့ ဒေါ်အောင်ဆန်းစုကြည်က ပြောပါတယ်။
COVID-19 ရောဂါဖြစ်ပွားမှုကြောင့် သေဆုံးသွားသူတွေဟာ ရောဂါအခံရှိသူတွေ၊ ကိုယ်ခံအား နည်းသူတွေ၊ ဆေးကုသခံယူမှုနောက်ကျသူတွေသာဖြစ်ပြီး ရောဂါရသူတွေထဲကနေ သေဆုံးတဲ့ရာခိုင်နှုန်းဟာ လည်း ၄.၄ ရာခိုင်နှုန်းသာ ဖြစ်တယ်လို့ ဆိုပါတယ်။
ဒါ့ကြောင့် COVID-19 ရောဂါဟာ ကုသလို့ရတဲ့ရောဂါဆိုတာ ထင်ရှားတဲ့အပြင် ကမ္ဘာ့ကျန်းမာရေးအဖွဲ့ (WHO)ကလည်း ဒီရောဂါဟာ ထိန်းချုပ်လို့ရတဲ့ရောဂါလို့ အတိအလင်းပြောကြားထားပြီးဖြစ်တယ်လို့ ဒေါ်အောင်ဆန်းစုကြည်က ပြောပါတယ်။
အခုတွေ့ရှိခဲ့တဲ့ COVID-19 ရောဂါကူးစက်ခံရသူနှစ်ဦးစလုံးဟာလည်း ဆေးကုသမှုခံယူနေပြီး အခု အချိန်ထိ စိုးရိမ်စရာမရှိဘူးလို့ မိန့်ခွန်းထဲကနေ အသိပေးလိုက်ပါတယ်။
မြန်မာနိုင်ငံအတွင်းကို ပြန်ရောက်လာကြသူတွေအနေနဲ့လည်း စိုးရိမ်စိတ်ကြောင့် ပုန်းကွယ်ရှောင်တိမ်းတာတွေ မပြုလုပ်ကြဖို့ အရေးကြီးပြီး အစိုးရရဲ့ညွှန်ကြားချက်တွေကို လိုက်နာကြရမယ်လို့ ဆိုပါတယ်။
အစိုးရအနေနဲ့ အများပြည်သူတွေအတွက် မရှိမဖြစ်လိုအပ်တဲ့ ဝန်ဆောင်မှုလုပ်ငန်းတွေ၊ ဈေးတွေနဲ့ အရောင်းအဝယ်စင်တာတွေကို ပိတ်သိမ်းဖို့ အစီအစဉ်မရှိဘူးလို့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က အသိပေးပြောကြားခဲ့ပါတယ်။
မြန်မာနိုင်ငံမှာ COVID-19 ရောဂါကူးစက်ခံရသူ ၂ ဦးတွေ့ရှိတယ်လို့ သတင်းထွက်လာတာနဲ့တပြိုင်နက် စားနပ်ရိက္ခာတွေ၊ ဆေးတွေကို အလုအယက်ထွက်ဝယ်သူတွေ ရှိလာတဲ့အတွက် ပြည်သူတွေ မစိုးရိမ်ကြစေဖို့ အခုလို အသိပေးပြောကြားလိုက်တာပါ။
”ရိက္ခာပြတ်နိုင်တဲ့ အလားအလာ မရှိပါဘူး။ လူအုပ်ထဲသွားတိုးဝယ်လို့ ရောဂါကူးစက်မယ့်အလားအလာက ပိုပြီး များပါတယ်”လို့ ဒေါ်အောင်ဆန်းစုကြည်က သတိပေးလိုက်ပါတယ်။
COVID-19 ရောဂါ မပြန့်ပွားစေဖို့အတွက် ဈေးဝယ်တဲ့အခါ မိသားစုလိုက်၊ အစုအဖွဲ့လိုက်မသွားဘဲ တစ်ဦး တစ်ယောက်တည်းက တာဝန်ယူပြီး မိသားစုအတွက် အမှန်တကယ်လိုအပ်တဲ့ ပမာဏကိုပဲ သွားရောက်ဝယ်ယူ ကြစေလိုတယ်လို့လည်း မေတ္တာရပ်ခံခဲ့ပါတယ်။
အခုလတ်တလောမှာ ထွက်ပေါ်နေတဲ့ လုပ်ငန်းတွေ၊ စက်ရုံတွေ၊ အလုပ်ရုံတွေ၊ ဈေးတွေ၊ စင်တာတွေကို ပိတ်မယ်၊ မြို့ရွာအဝင်အထွက်တွေကို ပိတ်မယ်ဆိုတာတွေကလည်း မဟုတ်မမှန်သတင်းတွေသာဖြစ်တယ်လို့ ဒေါ်အောင်ဆန်းစုကြည်က အတည်ပြုခဲ့ပါသေးတယ်။
KST(ရိုးရာလေး)
