ဆောင်းတွင်းကာလ အနွေးဓာတ်ထိန်းပေးမယ့် အစားအစာတွေ

ဆောင်းရာသီဝင်လာတာနဲ့ အအေးဓာတ်ကြောင့် ကျွန်တော်တို့တွေ ပျင်းရိကာ လေးလံထိုင်မှိုင်းပြီး အိပ်ချင်စိတ်တွေပဲဖြစ်နေမယ်ထင်ပါတယ်။ ချမ်းစိမ့်စိမ့်ဖြစ်နေတဲ့အတွက် မနက်ခင်းဆို အိပ်ရာကနေ မထချင်တော့ဘဲ စောင်ထဲပဲ ကွေးနေချင်ကြတာပါ။ ဒီလိုအချိန်အခါမျိုးမှာ ခွန်အားမချင်သလိုခံစားရပြီး အချမ်းပြေစေဖို့အတွက် ပူပူစပ်စပ်အစားအစာတွေပဲ စားချင်တဲ့စိတ်တွေလည်း တဖွာဖွာပေါ်နေမယ်ထင်ပါတယ်။ ဆောင်းရာသီမှာ ပူပူစပ်စပ်အစားအစာတွေချည်းပဲ စားနေလို့မရပါဘူး။ အာဟာရဓာတ်ပြည့်ဝအောင်လည်း စားပေးဖို့လိုပါတယ်။ ဒါကြောင့် ဆောင်းရာသီမှာ အနွေးဓာတ်လည်းပေးမယ့် သွားရည်စာအနေနဲ့စားပေးလို့ရတဲ့ အာဟာရဓာတ်လည်း ကြွယ်ဝတဲ့အစားအစာတွေကို စာဖတ်ပရိသတ်တွေအတွက် မျှဝေပေးချင်ပါတယ်။

ပန်းသီး

ပန်းသီးက အနွေးဓာတ်ပေးနိုင်တဲ့အစားအစာပါပဲ။ အစာခြေစနစ်ကောင်းမွန်စေဖို့အတွက် ထောက်ပံ့ပေးတဲ့ Polyphenolsဓာတ်တွေကြွယ်ဝပါတယ်။ ပန်းသီးကို စားသုံးပေးတာက ကင်ဆာရောဂါနဲ့ ပန်းနာရင်ကျပ်ရောဂါတွေမဖြစ်အောင်လည်း ကာကွယ်ပေးနိုင်ပါတယ်။ ခန္ဓာကိုယ်က ယူရစ်အက်ဆစ်ကိုဖယ်ရှားပေးဖို့အတွက်လည်း ကူညီပေးပါတယ်။ မနက်ခင်းအစားအစာအနေနဲ့ ပန်းသီးကို စားပေးနိုင်ပါတယ်။

ကြက်သွန်နီ

ကြက်သွန်နီဟာ ကမ္ဘာတစ်ဝှမ်းက ဟင်းလျာမျိုးစုံအတွက် မရှိမဖြစ်အရေးကြီးတဲ့ ပါဝင်ပစ္စည်းပါပဲ။ ဆောင်းရာသီမှာ ကြက်သွန်နီက သင့်ခန္ဓာကိုယ်ရဲ့အနွေးဓာတ်ကို ထိန်းပေးနိုင်စွမ်းရှိပါတယ်။ ကြက်သွန်နီက အန္တရာယ်ဖြစ်စေတဲ့ဘတ်တီးရီးယားပိုးမွှားတွေကို တိုက်ထုတ်တဲ့နေရာမှာ ထိရောက်မှုရှိပြီး အကျိုးကျေးဇူးပေးတဲ့ ဘတ်တီးရီးယားပိုးတွေအတွက် အစားအစာဖြစ်ပေးကာ အစာခြေစနစ်အားလည်းကောင်းစေပါတယ်။ ကြက်သွန်နီက ကင်ဆာရောဂါကို ကာကွယ်ပေးနိုင်စွမ်းရှိတယ်လို့လည်း ကြားဖူးပါတယ်။ ကြက်သွန်နီဟင်းရည်ပြုတ်သောက်ပေးမယ်ဆိုရင် သင့်ခန္ဓာကိုယ်ကို အနွေးဓာတ်ပေးစွမ်းပါလိမ့်မယ်။

ကြက်သွန်ဖြူ

ကြက်သွန်ဖြူကလည်း Anti-inflammatory ဂုဏ်သတ္တိပါဝင်ပြီး သွေးအတွင်းသကြားဓာတ်ကိုလည်း ထိန်းညှိပေးပါတယ်။ ဂတ်စ်ကို လျော့ချပေးပြီး ဝမ်းချုပ်တာကို သက်သာစေတဲ့အပြင် ကူးစက်ရောဂါကိုလည်း ကုသပေးပါတယ်။ သင့်ခန္ဓာကိုယ်ရဲ့အနွေးဓာတ်ကို ထိန်းပေးနိုင်တဲ့အစားအစာလည်းဖြစ်ပါတယ်။ ကြက်သွန်ဖြူကို ဒီအတိုင်းစားလို့ရတဲ့အပြင် အခြားအစားအစာတွေနဲ့ချက်စားပေးလို့ရပါတယ်။

ချင်း (ဂျင်း)

ချင်းကလည်း သင့်ခန္ဓာကိုယ်ကို အနွေးဓာတ်ထိန်းပေးနိုင်တဲ့ စွမ်းအားမြင့် (Thermogenic) ဖော်မြူလာဂုဏ်သတ္တိပါဝင်ပါတယ်ယ။ ဇီဝဖြစ်စဉ်အားကောင်းစေတဲ့အပြင် သွေးလည်ပတ်မှုအားကောင်းစေပြီး အစာခြေအားလည်းကောင်းပါတယ်။ ချင်းကို ရေနွေးကြမ်းထဲထည့်သောက်တာ၊ချင်းပြုတ်ရည်အနေနဲ့ သောက်ပေးလို့ရပါတယ်။ အခုကိုဗစ်ကာလမျိုးမှာရော ဆောင်းရာသီမှာပါ ချင်းပြုတ်ရည်က လည်ချောင်းမနာအောင်၊ အအေးမိဖျားနာတာတွေမဖြစ်အောင် ကူညီပေးနိုင်ပါတယ်။

အစေ့အဆံ

အစေ့အဆံတွေက ဖော့စ်ဖရပ်စ်ဒြပ်ပေါင်းကြွယ်ဝတဲ့အတွက် ဆောင်းရာသီမှာ လေလံထိုင်မှိုင်းတာတွေမဖြစ်အောင် ခွန်အားတွေပြည့်စေပါလိမ့်မယ်။ အယ်မွန်စေ့၊ သစ်ကြားစေ့၊ ဖရုံစေ့တွေကလည်း သင့်ခန္ဓာကိုယ်က အနွေးဓာတ်ကို ထိန်းပေးနိုင်စွမ်းရှိပါတယ်။ ဒါတွေကို ညနေခင်းသွားရည်စာအနေနဲ့ (သို့) ညမအိပ်ခင်စားပေးရမယ့်သွားရည်စာအနေနဲ့ စားပေးရင် အကောင်းဆုံးပါပဲ။ အစေ့အဆံတွေကို စွပ်ပြုတ်ပူပူထဲ ထည့်ပြီးလည်း စားလို့ရပါတယ်။

နနွင်းမှုန့်

နနွင်းက ဆေးဘက်ဝင်ဟင်းခတ်အမွှေးအကြိုင်ဖြစ်ပြီး ဆောင်းရာသီမှာဆိုရင် သင့်ခန္ဓာကိုယ်ရဲ့အနွေးဓာတ်ကို ထိန်းပေးနိုင်စွမ်းရှိပါတယ်။ ခန္ဓာကိုယ်ကို အာဟာရဓာတ်စုပ်ယူမှုအားကောင်းအောင် ကူညီပေးပါတယ်။ နီမြန်းရောင်ရမ်းတာတွေကိုလည်း တွန်းလှန်ပေးပြီး အဆစ်အမြစ်နာကျင်တာတွေအတွက် ကောင်းမွန်ပါတယ်။ နနွင်းမှုန့်က ဆေးဖက်ဝင်ရေနွေးကြမ်းတွေထဲ ထည့်သောက်ပေးလို့ရတဲ့အပြင် ဟင်းလျာတွေမှာလည်း ထည့်ချက်ပေးနိုင်ပါတယ်။

အသား

ငါးနဲ့ကြက်သားလို အသားတွေကလည်း ခန္ဓာကိုယ်မှာ အနွေးဓာတ်ရစေပါတယ်။ ဒီအသားတွေမှာပါဝင်တဲ့ ပရိုတင်းဓာတ်တွေက ခန္ဓာကိုယ်ရဲ့ဇီဝဖြစ်စဉ်ကို မြှင့်တင်ပေးမယ့် စွမ်းအားမြင့် (Thermogenic) ဖော်မြူလာအာနိသင်ရှိပါတယ်။ ဒါတွေကို ခါတိုင်း သင်ချက်နေကျပုံစံအတိုင်း ချက်စားပေးလို့ရပါတယ်။

Ref: Foods to keep you warm in the Winters

WL (ရိုးရာလေး)