မလေးရှားလူမျိုးအမျိုးသားတစ်ယောက်ကတော့ ကပ်ရောဂါအတွင်းမှာ ဝင်ငွေရဖို့အတွက် Marvel စူပါဟီးရိုးတွေထဲက Iron Man ဇာတ်ကောင်လို ဝတ်ဆင်ပြီး ပြောင်းဖူးဖျော်ရည်ရောင်းချလို့နေပါတယ်။ အသက် ၂၆ နှစ်အရွယ် မူဟာမတ် ဆူကာ မို ပတ်သီ (Muhammad Skykur Mohd Patthi) ဆိုတဲ့ အဲဒီအမျိုးသားဟာ COVID-19 ကြောင့် ဆက်သွယ်ရေးကုမ္ပဏီဝန်ထမ်းအလုပ်ကနေ ထွက်ခဲ့ရပြီး အခုလို ပြောင်းဖူးဖျော်ရည်ရောင်းတဲ့အလုပ်ကို လုပ်နေတာဖြစ်ပါတယ်။
![](https://yoyarlay.com/wp-content/uploads/2020/11/23-11-2020-yyl-021.jpg)
ကပ်ရောဂါအတွင်းမှာ သူ အလုပ်ပြုတ်ခဲ့ပြီးတဲ့နောက် အလုပ်သစ်ရှာဖို့ တော်တော်ရုန်းကန်ခဲ့ရပါတယ်။ လူငယ်တွေက ကိုယ်ကိုယ်တိုင် အသက်ရှင်နေထိုင်လို့ရနေသရွေ့ အခြားသူတွေရဲ့အကူအညီကို မျှော်ကိုးနေလို့မရဘူးလို့ မူဟာမတ်က ပြောပါတယ်။ သူဟာ အရင်ဆက်သွယ်ရေးဝန်ထမ်းလုပ်တုန်းကလည်း Penang Superhero Gang လို့ခေါ်တဲ့အဖွဲ့တစ်ဖွဲ့မှာလည်း စူပါဟီးရိုးဇာတ်ကောင်လိုဝတ်ပြီး ဖျော်ဖြေရတဲ့ အချိန်ပိုင်းအလုပ်ကို လုပ်ခဲ့တာပါ။ ကလေးတွေကို ဖျော်ဖြေတင်ဆက်ဖို့အတွက် မွေးနေ့ပါတီလို အခမ်းအနားပွဲတွေကို သူတို့အဖွဲ့က အမြဲတက်ရောက်ပေးရတယ်လို့ မူဟာမတ်က ဆိုပါတယ်။
![](https://yoyarlay.com/wp-content/uploads/2020/11/23-11-2020-yyl-022.jpg)
COVID-19 ကပ်ရောဂါဖြစ်လာတဲ့အချိန်မှာ အလုပ်အကိုင်အခွင့်အလမ်းအကုန်လုံး ဆုံးရှုံးခဲ့ရပါတယ်။ ဒါကြောင့် သူ့နဲ့သူ့သူငယ်ချင်း (၂) ဦးတို့က ပြောင်းဖူးဖျော်ရည်ရောင်းတဲ့အခါ ဖောက်သည်တွေကို အားပေးလာအောင် ဆွဲဆောင်ဖို့အတွက် မတူတဲ့ဇာတ်ကောင်ဝတ်စုံတွေဝတ်ဖို့ ဆုံးဖြတ်ခဲ့ကြတာပါ။ “ကျွန်တော်တို့ လမ်းပေါ်မှာ နေပူမိုးရွာမရှောင် အလုပ်လုပ်နေရပေမဲ့ ဖြတ်သွားတဲ့လူတွေက ကျွန်တော်တို့ကို လက်ပြနှုတ်ဆက်တဲ့အခါတိုင်း ပျော်ရွှင်ရပါတယ်။ သူတို့ကို ဖျော်ဖြေခွင့်ရတာကိုပဲ ကျွန်တော် ပျော်ရွှင်မိပါတယ်” လို့ မူဟာမတ်က ပြောပါတယ်။
![](https://yoyarlay.com/wp-content/uploads/2020/11/23-11-2020-yyl-023.jpg)
မူဟာမတ်တို့အဖွဲ့က Stock ကျန်ရှိနေတဲ့ ပြောင်းဖူးဖျော်ရည်တွေကိုလည်း ကိုဗစ်ရောဂါကို ရှေ့တန်းကနေ တွန်းလှန်ပေးနေတဲ့သူတွေကို ပေးသွားမှာဖြစ်တယ်လို့လည်း သိရပါတယ်။ သူတို့အဖွဲ့ကတော့ ပီနန်ပြည်နယ်၊ ဘန်ဒါ ပါဒါတစ်ဝိုက်မှာ ဇာတ်ကောင်ဝတ်စုံတွေဝတ်ဆင်ကာ ပြောင်းဖူးဖျော်ရည်ကို ရောင်းချနေတာဖြစ်ပါတယ်။
Ref: WorldofBuzz “Former Telco Staff Creatively Dresses Up As Iron Man & Sells Corn Juice To Survive During The Pandemic”
WL (ရိုးရာလေး)