အာနိုးကြီး တကယ်ပြန်လာခဲ့ပါပြီ။ မင်းသားကြီးအာနိုးပါဝင်သရုပ်ဆောင်ထားတဲ့ Terminator ဇာတ်ကားအသစ်ဖြစ်တဲ့ Dark Fate ရုပ်ရှင်ကို လာမယ့် ၂၀၁၉ ခုနှစ်၊ နိုဝင်ဘာလ (၁) ရက်နေ့မှာ ကမ္ဘာတစ်ဝှမ်း ရုံတင်ပြသသွားတော့မှာဖြစ်တယ်လို့ သိရပါတယ်။ ဒီ Terminator: Dark Fate ဇာတ်ကားမှာ ပါဝင်မယ့်် ဇာတ်ကောင်ခြောက်ဦးရဲ့ First Look ပုံရိပ်တွေဟာလည်း ပူပူနွေနွေးထွက်ရှိလာခဲ့ပြီဖြစ်တာမို့ ပရိသတ်တွေ ကြိုတင်ရင်ခုန်စိတ်လှုပ်ရှားနိုင်ဖို့ တင်ဆက်ပေးပါရစေ။
ပါရာမောင့်ရုပ်ရှင်ကနေ ရိုက်ကူးထုတ်လုပ်တဲ့ Terminator: Dark Fate ရုပ်ရှင်မှာ နဂို Terminator ဇာတ်ကားတွေက ပရိသတ်တွေရဲ့အသည်းစွဲပုံရိပ်တွေ ဖြစ်ခဲ့တဲ့ မင်းသားအာနိုးနဲ့ မင်းသမီး လင်ဒါဟာမီလ်တန် (Linda Hamilton) တို့နဲ့အတူ ပရိုဂျူဆာအဖြစ် တာဝန်ယူထားတဲ့ ဒါရိုက်တာကြီး ကင်မရွန်းတို့ဟာ ၁၉၉၁ ခုနှစ် နောက်ပိုင်းမှာ ပထမဆုံးအကြိမ်အဖြစ် ပြန်လည်ပေါင်းဆုံစည်းကြမှာဖြစ်ပြီး ရိုက်ကူးတဲ့ဒါရိုက်တာကတော့ တင်မ်မေလာ (Tim Miller) ဖြစ်ပါတယ်။
အာနိုးကြီးပြန်လာတော့မယ့် လက်ရှိ Terminator: Dark Fate ဟာ Terminator ရုပ်ရှင်ကားတွဲတွေရဲ့ ခြောက်ကားမြောက်ဖြစ်လာမှာဖြစ်ပြီး မင်းသမီး နာတာလီရေးယက်စ် (Natalie Reyes) နဲ့ Agents of S.H.I.E.L.D မှာ နာမည်ကြီးခဲ့တဲ့ လူနာ (Luna) တို့ကလည်း ထူးထူးခြားခြား ဇာတ်ရုပ်အသစ်တွေအနေနဲ့ ထပ်မံပေါင်းစပ်လာဦးမှာဖြစ်ပါတယ်။
1991 ခုနှစ်က Terminator:Judgement Day ဇာတ်ကားအပြီးမှာ အနားယူသွားခဲ့တဲ့ အသက် (၆၁) နှစ်အရွယ် မင်းသမီးလင်ဒါ ပြန်လည်ပါဝင်လာခြင်းက ဒီရုပ်ရှင်ရဲ့ အရေးအပါဆုံးအရာဖြစ်ခဲ့ပြီး Terminator:Judgement Day ဇာတ်ကားနဲ့ပြန်လည်ချိတ်ဆက်ထားတယ်လို့ သိရပါတယ်။ ဇာတ်လမ်းဇာတ်အိမ်တည်ဆောက်မှုအရ ဆာရာကော်နာဇာတ်ကောင်နေရာဟာ မင်းသမီးကြီးနဲ့မှသာ အလိုက်ဖက်ဆုံးဖြစ်နိုင်မှာ လို့ ဒါရိုက်တာတင်မ်က အခုလို မှတ်ချက်ပေးသွားခဲ့ပါတယ်။
“လင်ဒါက သူ့ရဲ့ အရင်က ဇာတ်ရုပ်တန်ဖိုးကိုလည်းမပျောက်အောင်၊ လက်ရှိဇာတ်ရုပ်မှာလည်း ပိုပြီးဆန်းသစ်လာအောင် ဖန်တီးပြခဲ့ပါတယ်။ တစ်စုံတစ်ရာ အသစ်အဆန်းကို ခံစားကြရပါလိမ့်မယ်” လို့ တင်မ်ကဆိုခဲ့ပါတယ်။
Ref: DailyMail “Arnold Schwarzenegger and Linda Hamilton are back! ….. “
AI (ရိုးရာလေး)
