ဘောစကိုင်း ပင်ရဲ့ ဆေးဖက်ဝင်ပုံ အဖုံဖုံ

13-7-2020-yyl-007.jpg

ဘောစကိုင်း ဆိုတာ မြန်မာ၊ ထိုင်း၊ ဖိလစ်ပိုင် အပါအဝင် အာရှနိုင်ငံတွေမှာ စားသုံးကြတဲ့ အပင်တစ်မျိုးပါ။ အညွန့်နဲ့ အရွက်နု စိမ်းစိမ်းလေးတွေကို ဒီတိုင်း ကြွပ်ကြွပ်လေး တို့စားမလား၊ မန်ကျည်းမှည့်လေးနဲ့ အချဉ်ပြုတ်ပြီး တို့စားမလား ဒါမှမဟုတ် ရေနွေးဖျောပြီးသုပ်စားမလား အမျိုးမျိုး စားသုံးကြပါတယ်။

မြန်မာ့ ထမင်းဝိုင်းတွေမှာ ချဉ်ရည်ဟင်းလေး၊ ငပိချက်လေးနဲ့ ဘောစကိုင်းရွက်လေး တို့စားလိုက်ရရင် ထမင်းသိပ်မြိန်စေတာပေါ့။ တခြားနိုင်ငံတွေမှာတော့ သူ့ရဲ့အစေ့နဲ့ ပင်စည်အခေါက် ကိုပါ ဆေးဖက်ဝင်ပစ္စည်းတွေ အဖြစ် အသုံးပြုကြပါတယ်။ ဘောစကိုင်းအစေ့က ဆိုရင် တညင်းသီးလိုလို မျောက်ငိုသီး လိုလို အနံ့အရသာ ရှိပါတယ်နော်။

ကဲ စားလို့ကောင်းတဲ့ ဘောစကိုင်း ရဲ့ အရွက်၊ အသီး၊ အစေ့နဲ့ အခေါက် တို့မှာ ဘာတွေ ဆေးဖက်ဝင်စေသလဲ ဆိုတာ လေ့လာကြည့်ရအောင်။

ဆေးဖက်ဝင်တဲ့ ဘောစကိုင်း

ဘောစကိုင်းရွက်တွေဟာ ပရိုတင်းဓာတ် ပါဝင်မှု များတဲ့ အရင်းအမြစ်ကောင်းတစ်ခု ဖြစ်ပါတယ်တဲ့။ ဘောစကိုင်းပင်ကနေ ရရှိတဲ့ အဆီအနှစ်တွေက အသားအရေ နဲ့ ဆံသား ကျန်းမာရေး တို့အတွက် အကျိုးအာနိသင် ကောင်းသလို ဘောစကိုင်းအစေ့ ကနေ ရရှိတဲ့ ကျန်းမာရေး အကျိုးကျေးဇူးတွေလည်း မနည်းလှပါဘူး။

အစိမ်းရောင် အသီးအရွက်တွေ ဖြစ်တာမို့ ဗီတာမင်တွေ၊ သတ္တုဓာတ်တွေ အပါအဝင် အာဟာရဓာတ်မျိုးစုံ ပါဝင်နေတာဖြစ်ပါတယ်။

(၁) သဘာဝ Toner အာနိသင်ရှိတယ်

ဘောစကိုင်းရွက်နဲ့ အစေ့မှာ အရေပြားဆဲလ်တွေမှာ ကော်လာဂျင်ထိန်းသိမ်းဖို့ ကူညီပေးတဲ့ သဘာဝအင်ဇိုင်းတွေ ပါရှိပါတယ်။ ကော်လာဂျင် ထိန်းသိမ်းမှုကြောင့် အသားအရေ ညစ်ခြင်း၊ အရေးအကြောင်းဖြစ်ခြင်း၊ ခြောက်သွေ့ခြင်း၊ အဖတ်ကွာခြင်း စတာတွေကို ကုစားပေးနိုင်ပါတယ်။ အစွမ်းထက်တဲ့ သဘာဝ toner တစ်ခုလို အာနိသင် ပေးပြီး အရွယ်မတိုင်ခင် ရင့်ရော်ခြင်းတွေ မဖြစ်အောင် ကာကွယ်ပေးပါတယ်။

(၂) အရေပြား ယားနာ သက်သာစေတယ်

ဘောစကိုင်းရဲ့ ရောင်ရမ်းမှု သက်သာစေတဲ့ အာနိသင်ကြောင့် နှင်းခူ၊ ဆိုရီရေးစစ် (Psoriasis) အပါအဝင် အရေပြားပြဿနာတွေကို သက်သာစေနိုင်ပါတယ်။ သူက အရေပြားကို ပြန်လည်ကုစားပေးပြီး နာကျင်မှု၊ ယားယံမှုတွေ သက်သာစေနိုင်ပါတယ်။

(၃) ဗောက် ပျောက်စေတယ်

ဘောစကိုင်း အစေ့က ရတဲ့ အဆီဟာ မှိုပိုးနဲ့ ဘက်တီးရီးယားတွေကို သေစေနိုင်တာကြောင့် ဗောက်ထခြင်း တို့လို ဆံသားပြဿနာတွေကို ဖြေရှင်းပေးနိုင်ပါတယ်။

(၄) သန် ကျစေတယ်

ဒါက လူသိများတဲ့ အချက်ပါ။ ဘောစကိုင်းအစေ့ကို ပြုတ်စား၊ ချက်စားရင် သန်ကျစေတဲ့ အာနိသင် ရှိပါတယ်တဲ့။ သန်ကောင်၊ တုတ်ကောင်တွေကို နှိမ်နင်းပေးနိုင်လို့ ဘောစကိုင်းကို မကြာမကြာ စားပေးသင့်ပါတယ်။

(၅) ကင်ဆာ ကာကွယ်တယ်

ကင်ဆာ ကာကွယ်ခြင်း၊ ကင်ဆာဆဲလ် မပြန့်ပွားအောင် တားဆီးနိုင်ခြင်း ဆိုတဲ့ အာနိသင်တွေကို ဘောစကိုင်းအစေ့ ကနေ ရရှိနိုင်ပါတယ်။

(၆) အကိုက်အခဲ ပျောက်စေတယ်

ဘောစကိုင်းမှာ နာကျင်ကိုက်ခဲမှုတွေ သက်သာစေတဲ့ သဘာဝအာနိသင် ပါရှိပါတယ်။ ဘောစကိုင်းပင်က ရတဲ့ အဆီအနှစ်နဲ့ လိမ်းလိုက်ရင် အဆစ်အမြစ် နာကျင်မှု၊ ခန္ဓာကိုယ် ကိုက်ခဲနာကျင်မှု၊ ဇက်ကြောနာခြင်း၊ ခါးနာခြင်း၊ အရွတ်နာခြင်း တို့ကို သက်သာစေနိုင်ပါတယ်။

(၇) ရာသီလာစဉ် နာကျင်ကိုက်ခဲတာတွေ သက်သာစေတယ်

ဘောစကိုင်းရွက်က အမျိုးသမီးတွေကို ရာသီစက်ဝန်း မှန်ကန်စေဖို့နဲ့ ရာသီလာစဉ် နာကျင်ကိုက်ခဲမှုတွေကို သက်သာလျော့ပါးစေဖို့ အထောက်အကူ ပေးပါတယ်။

ဒီလို ဆေးဖက်ဝင်နေတဲ့ ဘောစကိုင်းရွက် ကို တို့စရာ အဖြစ်နဲ့ စားကြည့်ဖို့တော့ သင့်ပြီထင်တယ်နော်။

Ref : hellosayarwon

ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win | ရေးသားသူ Yun Sandi Nan Mon

Team (ရိုးရာလေး)

Share this post

ရိုးရာလေးတွင် ဖော်ပြပါရှိသော ဆောင်းပါးများကို မည်သည့် Website နှင့် Social Media များပေါ်တွင်မှ ပြန်လည်ကူးယူဖော်ပြခွင့်မပြုကြောင်း အသိပေးအပ်ပါသည်။ အသေးစိတ်အချက်အလက်များကို ဤနေရာတွင်ဖတ်ရှုနိုင်ပါသည်။

Leave a Reply

scroll to top