ကိုရိုနာဗိုင်းရပ်စ် ကူးစက်ပျံ့နှံ့မှု ဆိုးရွားလာတဲ့အတွက် ဂျပန်နိုင်ငံမှာ နိုင်ငံတစ်ဝန်း အရေးပေါ်အခြေအနေ ကြေညာလိုက်ပါပြီ။ နိုင်ငံတစ်ဝန်း အရေးပေါ်အခြေအနေ ကြေညာလိုက်လို့ ဒေသဆိုင်ရာ အစိုးရအဖွဲ့တွေက လူတွေကို အိမ်ထဲမှာ နေကြဖို့ တိုက်တွန်းနိုင်မှာဖြစ်ပေမဲ့ ပြစ်ဒဏ်ပေးနိုင်လောက်တဲ့ စည်းမျဉ်း ဒါမှမဟုတ် ဥပဒေအရ စည်းနှောင်အားရှိတဲ့ အမိန့်မျိုး ထုတ်ပြန်နိုင်မှာမဟုတ်ပါဘူး။ ဂျပန်နိုင်ငံတစ်ဝန်း အရေးပေါ်အခြေအနေ ကြေညာမှုဟာ မေလ ၆ ရက်အထိ အကျုံးဝင်မှာပါ။
အစောပိုင်းမှာ ဂျပန်ဝန်ကြီးချုပ် ရှင်ဇိုအာဘေးက ဒေသ ၇ ခုကို တစ်လကြာမြင့်တဲ့ အရေးပေါ်အခြေအနေ ကြေညာခဲ့ပါတယ်။ ဂျပန်နိုင်ငံမှာ COVID-19 ကူးစက်ခံရသူ မြင့်တက်လာလို့ ဝန်ကြီးချုပ်ရှင်ဇိုအာဘေးရဲ့ တုံ့ပြန်လှုပ်ရှားမှုအပေါ် ဝေဖန်သံတွေ ပိုကျယ်လာပါတယ်။ ရှင်ဇိုအာဘေးက တိုကျိုမြို့မှာ အရေးပေါ်အခြေအနေ ကြေညာဖို့ အချိန်ဆွဲလွန်းတယ်လို့ စစ်တမ်းတစ်ရပ်မှာ လူ ၇၅ ရာခိုင်နှုန်းက မှတ်ချက်ပေးခဲ့ပါတယ်။ ဂျပန်နိုင်ငံမှာ COVID-19 ကူးစက်ခံရသူ ၉၂၃၁ ယောက်ရှိပြီး သေဆုံးသူ ၁၉၀ ရှိပါတယ်။
Nz (ရိုးရာလေး)
