ဂျပန်နိုင်ငံရဲ့နာမည်အကြီးဆုံးစကားပြန်ကတော့ နာဆုကို တိုဒါပါ။ သူဟာ ၁၉၇၀ ခုနှစ်ကတည်းက စကားပြန်လုပ်ခဲ့တာအပြင် အင်္ဂလိပ်ဘာသာစကားရုပ်ရှင်ရာချီကိုလည်း ဂျပန်ဘာသာအဖြစ် ပြန်ဆိုပြီး ရုပ်ရှင်တွေမှာ စာတန်းထိုးခဲ့တာပါ။ ဂျပန်နိုင်ငံကို နိုင်ငံခြားရုပ်ရှင်သရုပ်ဆောင်တွေလာတဲ့အခါတိုင်း သူ့ကို စကားပြန်လုပ်ပေးဖို့လည်း တောင်းဆိုခဲ့ကြတာပါ။
သူ အကြိမ်ရေအများဆုံးစကားပြန်လုပ်ပေးဖြစ်တဲ့ ဟောလိဝုဒ်မင်းသားက တွမ်ခရုစ်ပါ။ တွမ်ခရုစ်ကဆိုရင် ၁၉၉၂ ခုနှစ်ကတည်းက အလုပ်ကိစ္စနဲ့ ဂျပန်ကို ၂၄ ကြိမ် လာဖြစ်ခဲ့ပါတယ်။ နာဆုကိုက တွမ်ခရုစ်အတွက် စကားပြန်အနေနဲ့ ၁၉၉၄ ခုနှစ်မှာ စလုပ်ပေးဖြစ်ခဲ့တာပါ။ မနှစ်က ဂျပန်နိုင်ငံကို Top Gun: Maverick ရုပ်ရှင်ကားအတွက် တွမ်ခရုစ်လာရောက်တဲ့အချိန်မှာ သူ့အတွက် နာဆုက စကားပြန်မလုပ်ပေးခဲ့တာကို သတိထားမိခဲ့ပါတယ်။
အခုနှစ် အသက် ၈၆ နှစ်ရှိပြီဖြစ်တဲ့ နာဆုကိုက အနားယူသွားခဲ့ပြီဖြစ်လို့ တွမ်ခရုစ်အတွက် စကားပြန်မလုပ်ဖြစ်ခဲ့တာပါ။ သူက အသက်ကြီးလာတာနဲ့အမျှ စကားပြန်လုပ်ဖို့အတွက် ကိုယ့်ကိုယ်ကိုယုံကြည်ချက်မရှိတော့သလို ခံစားရတဲ့အတွက် အနားယူဖို့ ဆုံးဖြတ်ခဲ့တာပါ။ သူ အနားယူဖို့ စဉ်းစားနေတဲ့အချိန်တုန်းက Top Gun: Maverick အတွက် ဂျပန်ကို တွမ်ခရုစ်လာမယ်လို့ သူ ကြားတော့ အတော်လေးဒုက္ခရောက်ခဲ့တာပါ။
နာဆုကိုက တွမ်ခရုစ်ကို “မင်း ဂျပန်မလာခင် တစ်လလောက်က အနားယူခဲ့တယ်လို့ပြောခဲ့တယ်။ တွမ်ခရုစ်ကလည်း စနောက်သလိုနဲ့ “တကယ် မလုပ်တော့တာလား၊ ကျွန်တော့်ရဲ့စကားပြန်မဖြစ်ချင်တော့ဘူးလား”တဲ့။ သူ ဆုံးဖြတ်ချက်ချပြီးသွားတာကိုလည်း တွမ်ခရုစ်က သိပါတယ်။ နာဆုကိုက သူ့အတွက် စကားပြန်မလုပ်ပေးခဲ့ပေမဲ့ တွမ်ခရုစ်က ဂျပန်လာတော့ သူ့အတွက် အချိန်ပေးတွေ့ဖြစ်ခဲ့ပါတယ်။ သူ့ရဲ့ဟိုတယ်မှာ တွမ်ရဲ့ညီမတွေ၊ တူမတွေနဲ့အတူ လက်ဖက်ရည်သောက်ရင်း ၃ နာရီကြာ စကားစမြည်ပြောဖြစ်ခဲ့ကြတာပါ။
သူတို့တွေ့ဆုံပြီးသွားတော့ နာဆုကိုကို ရုပ်ရှင်ကားအထူးပြပွဲကို ဧည့်သည်အနေနဲ့လာရောက်ဖို့ ဖိတ်ကြားခဲ့ပါတယ်။ တွမ်ခရုစ်က နာဆိုကိုကို သူ့အတွက် ဘာမှလုပ်ပေးစရာမလိုဘူး။ ဒီအတိုင်းလေးပဲ ဘေးမှာနေပေးရုံပါပဲတဲ့။ Mission Impossible – Dead Reckoning Part 1 အတွက်လည်း ဂျပန်နိုင်ငံကို ပြန်လာခဲ့ဦးမှာဖြစ်တဲ့အတွက် နာဆုကိုကို ထပ်တွေ့ဆုံရဖို့ မျှော်လင့်တယ်လို့လည်း တွမ်ခရုစ်က ပြောခဲ့ပါသေးတယ်။
Mission: Impossible – Dead Reckoning Part 1 အတွက် ဂျပန်ခရီးစဉ်က ပျက်သွားခဲ့ပေမဲ့ တွမ်ခရုစ်က သူ့စကားကို တည်ချင်တဲ့အတွက် နာဆုကိုကို အခြားမှာပြုလုပ်တဲ့ ရုပ်ရှင်ကားအထူးပြပွဲမှာ အထူးဧည့်သည်အဖြစ် လာရောက်ဖို့ ဖိတ်ကြားဖြစ်ခဲ့ပါသေးတယ်။
Ref: Japan’s Most Famous Translator Retires; Worked With Tom Cruise For 30 Years And Became His Friend
WL (ရိုးရာလေး)
