ရော့ခ်ကြယ်ပွင့် ဘွန်ဂျိုဗီကတော့ ဂီတဆိုင်ရာ စွမ်းဆောင်မှုနဲ့ ပရဟိတအကျိုး သယ်ပိုးမှုတွေကြောင့် MusiCares Person of the Year ဆု ရရှိတော့မှာပါ။ အသက် ၆၁ နှစ်အရွယ် ရှိပြီဖြစ်တဲ့ ဘွန်ဂျိုဗီဟာ ဒီဆု ဆွတ်ခူးနိုင်တဲ့ ၃၃ ယောက်မြောက် အနုပညာသမား ဖြစ်ပါတယ်။
ဘွန်ဂျိုဗီမတိုင်ခင် Aerosmith ၊ ဒေါ်လီပါတန်၊ ပေါလ်မက္ကာနေး၊ ဘော့ဒိုင်လန်၊ အယ်လ်တန်ဂျွန်၊ ဘိုနို အစရှိတဲ့ ဂီတကြယ်ပွင့်တွေလည်း ဒီဆု ဆွတ်ခူးခဲ့ဖူးပါတယ်။ ၂၀၂၄ ခုနှစ် ဖေဖော်ဝါရီလ ၂ ရက်နေ့ကျရင် အမေရိကန်နိုင်ငံ လော့စ်အိန်ဂျလိစ်ကွန်ဗန်းရှင်းစင်တာမှာ MusiCares Person of the Year ဆု ပေးပွဲ ကျင်းပမှာ ဖြစ်ပါတယ်။
” ရော့ခ်အန်ရိုးအတွက် ဘွန်ဂျိုဗီရဲ့ ပံ့ပိုးမှုတွေဟာ ဂီတလောကတစ်ခုလုံးအတွက် စွဲမြဲထင်ရှားတဲ့ အမှတ်အသားချန်ခဲ့ရုံသာမက ကမ္ဘာတစ်ဝန်းက မရေတွက်နိုင်တဲ့ ပရိသတ်တွေရဲ့ နှလုံးသားမှာပါ ကမ္ဗည်းထိုးနိုင်ခဲ့ပါတယ်။ ဒါ့အပြင် သူက အစားအစာဖူလုံရေး၊ အိမ်ခြေရာမဲ့ ပြဿနာတွေကို ပါဝင်ဖြေရှင်းဖို့လည်း တစိုက်မတ်မတ် ကြိုးစားခဲ့သူပါ။ သူ ဆုရတဲ့အကြောင်း ကြေညာရတာ တကယ့်ကို ဝမ်းသာပီတိဖြစ်ရပါတယ်”လို့ MusiCares ရဲ့ အမှုဆောင်ဒါရိုက်တာ ဆီဂူရာက ဆိုပါတယ်။
Ref: Jon Bon Jovi ‘humbled’ to receive prestigious honour for his music and charity work
NZ ( ရိုးရာလေး)
