ဒူးခေါင်းနာခြင်းအတွက် အစွမ်းထက်အိမ်တွင်းကုသနည်းများ

ဒူးခေါင်းနာခြင်းကို အသက်ကြီးပိုင်တွေဆီကနေ မကြာခဏလိုလိုကြားနေရပါတယ်။ တကယ်တော့ ဒူးခေါင်းနာတာက လူငယ်တွေမှာလည်း ဖြစ်တတ်ပါတယ်။ ထိခိုက်ဒဏ်ကြောင့်ပဲဖြစ်ဖြစ်၊ အခြားအကြောင်းအရင်းကြောင့်ပဲဖြစ်ဖြစ် ဒူးခေါင်းနာတာကို ကျွန်တော်တို့ နေ့စဉ်ဘဝမှာ ကြုံတွေ့ရနိုင်ပါတယ်။ ဒူးခေါင်းနာတာအတွက် ကုသနည်းတွေရှိပါတယ်။ အဲဒီကုသနည်းတွေက အိမ်မှာပဲလုပ်ဆောင်လို့ရပြီး အတော်လေးကို အကူအညီဖြစ်ပါတယ်။

မရှိမဖြစ်ဆီတွေလိမ်းပြီး နှိပ်နယ်ပေးပါ

နှိပ်နယ်ပေးခြင်းကလည်း ဒူးခေါင်းနဲ့ အဆစ်အမြစ်နာကျင်တဲ့လက္ခဏာရပ်တွေကို သက်သာသွားစေနိုင်တဲ့ နည်းတစ်နည်းပါပဲ။ သင့်ဒူးခေါင်းကို ဆီလိမ်းပြီး နှိပ်နယ်ပေးတာက ပိုပြီးထိရောက်မှုရှိပါတယ်။ တချို့လေ့လာချက်တွေအရ ချင်းနဲ့ လိမ္မော်ဆီတွေက ဒူးခေါင်းနာခြင်းကို ပျောက်ကင်းသက်သာစေတဲ့နေရာမှာ အစွမ်းထက်တယ်လို့ ဆိုပါတယ်။

အပူအအေးကပ်ပေးပါ

အပူကော၊ အအေးကောနှစ်ခုလုံးက ဒူးခေါင်းနာခြင်းလက္ခဏာရပ်တွေကို ပြောလျော့စေတဲ့နေရာမှာ အစွမ်းထက်ပါတယ်။ ဒါပေမဲ့ သင် ရွေးချယ်တဲ့ကုသမှုက သင်ခံစားနေရတဲ့နာကျင်တဲ့အမျိုးအစားပေါ်မူတည်ပါတယ်။ သင်က ရောင်ရမ်းနေတယ်ဆိုရင် အပူကပ်ပေးတာကို ရှောင်သင့်ပါတယ်။ အပူနဲ့ကုသတာက အဆစ်ရောင်နာကဲ့သို့ နာတာရှည်နာကျင်မှုအတွက် အကောင်းဆုံးပါပဲ။ အားကစားလုပ်လိုက်လို့ ထိခိုက်နာကျင်တာမျိုးတွေဆိုရင် အအေးကပ်ပေးလို့ရပါတယ်။

ပန်းသီးအရက်ရှာလကာရည်

ပန်းသီးအရက်ရှာလကာရည်က အဆစ်အမြစ်ရောင်ရမ်းခြင်းကဲ့သို့ နာတာရှည်နာကျင်မှုမျိုးကို ပြေလျော့သွားစေနိုင်တဲ့ ဂုဏ်သတ္တိတွေပါဝင်ပါတယ်။ ဒါက နာကျင်မှုတွေ ပြောလျော့စေတဲ့ အဆစ်အမြစ်တွေမှာရှိတဲ့ Lubrication ကို သိုလှောင်ဖို့အတွက် ကူညီပေးပြီး ခြေထောက်လှုပ်ရှားရတာလည်း လွယ်ကူသွားစေပါတယ်။ ရေတစ်ခွက်ထဲကို ပန်းသီးအရက်ရှာလကာရည်ခွက်တစ်ဝက်ထည့်ပြီး ရောစပ်လိုက်ပါ။ အဲဒီရောစပ်ထားတဲ့အရည်ကို ညအိပ်ရာမဝင်ခင် နေ့စဉ်သောက်သုံးပေးပါ။

ချင်းမှုန့်

ချင်းအဆီ၊ ချင်းမှုန့် (ချင်းကိုအမှုန့်ဖြစ်အောင်လုပ်ထား) (သို့) ချင်းတို့က သင့်ဒူးခေါင်းအတွက် ကောင်းပါတယ်။ ဒီဆေးဘက်ဝင်အပင်က ရောင်ရမ်းနာကျင်မှုတွေကို သဘာဝအလျောက်ဖယ်ရှားပေးနိုင်တဲ့ gingerolဆိုတဲ့ဒြပ်ပေါင်းပါဝင်ပါတယ်။ ချင်းပြုတ်ရည်လုပ်ပြီး ဒူးခေါင်းနာတာသက်သာဖို့အတွက် တစ်နေ့ နှစ်ကြိမ်သောက်ပေးသင့်ပါတယ်။

နနွင်းမှုန့်

နနွင်းမှုန့်က အစွမ်းထက်ဟင်းခတ်အမွေးအကြိုင်ဖြစ်ပြီး ဟိုအရင်ကတည်းက ဆေးပညာသမိုင်းမှာ အသုံးပြုခဲ့ကြတာပါ။ နနွင်းမှုန့်မှာပါဝင်တဲ့ ကာကူမင်း (curcumin) ဆိုတဲ့ဒြပ်ပေါင်းက အဆစ်အမြစ်နာကျင်တာနဲ့ ရောင်ရမ်းခြင်းတွေကို ကုသတဲ့နေရာမှာ အကူအညီဖြစ်ပါတယ်။ ရေခွက်တစ်ခွက်ထဲမှာ ချင်းနဲ့နနွင်းမှုန့်တို့ကို ရောထည့်ပြီး (၁၂-၁၅) မိနစ်လောက် ဆူအောင်ထားလိုက်ပါ။ အဲဒီနောက် ဒူးခေါင်းနာတာ၊ အဆစ်အမြစ်နာကျင်တာတွေ သက်သာသွားဖို့အတွက် ဒီအရောအနှောကို နေ့စဉ်သောက်သုံးပေးလို့ရပါတယ်။

Ref: best home remedies to get rid of knee pain
WL (ရိုးရာလေး)