လကမ္ဘာပေါ်မှာထားရှိမယ့် လူသားမျိုးနွယ်ရဲ့အလုံးစုံသောအသိပညာများ

ပြီးခဲ့တဲ့သီတင်းပတ်က အစ္စရေးနိုင်ငံက လပေါ်ကိုလွှတ်တင်ခဲ့တဲ့ Beresheet အာကာသယာဉ်ငယ်ဟာ ထူးဆန်းတဲ့ပစ္စည်းတစ်ခုကို သယ်ဆောင်သွားခဲ့ပါတယ်။ ကနဦးမှာ ဒီအကြောင်းအရာနဲ့ပတ်သက်လို့ သေသေချာချာ ရှင်းလင်းခဲ့ခြင်းမရှိပါဘူး။ ဒါပေမဲ့ အဲဒီလဆင်းယာဉ်ငယ်မှာ သယ်ဆောင်သွားတဲ့ပစ္စည်းဟာ လူသားမျိုးနွယ်ရဲ့ စာမျက်နှာပေါင်း သန်း (၃၀) စာရှိ အသိဗဟုသုအားလုံးကိုထည့်သွင်းထားတဲ့ DVD တစ်ချပ်အရွယ် သတ္ထုပြားတစ်ခုဖြစ်ကြောင်း အခုတော့ သိလိုက်ကြရပါပြီ။

 

“လပေါ်က စာကြည့်တိုက်” လို့ အမည်ပေးထားတဲ့ ဒီပစ္စည်းဟာ နောက်လာမယ့် လူသားမျိုးဆက်တွေအနေနဲ့ လူသားမျိုးနွယ်က စုဆောင်းသိရှိထားပြီးသမျှအသိဗဟုသုတတွေကို မဆုံရှုံးလိုက်ရစေဖို့ဖန်တီးထားတဲ့ အရန်သင့်အစီအစဉ်တစ်ခုဖြစ်ကြောင်း ဒီစီမံကိန်း (Arch Mission) ကို တွဲဖက်ဦးဆောင်သူဖြစ်တဲ့ နိုဗာ စပစ်ဗက် (Nova Spivack) က ဆိုပါတယ်။

သူက “ကျွန်တော်တို့ရဲ့ ဆင့်ကဲတိုးတက်မှုဆိုင်ရာ အခြေခံစိန်ခေါ်မှုတွေထဲကတချို့ကတော့ အရင်ကအမှားတွေကိုမေ့လျော့တတ်ခြင်းနဲ့ ဒီအမှားတွေကို ထပ်ခါတလဲလုပ်မိနေတာကို ပြင်ဆင်ဖို့ အားနည်းကြတာတွေပါပဲ။ ကျွန်တော်တို့ လူသားမျိုးနွယ်ရှင်သန်ရပ်တည်ရေးအတွက် ဘာတွေကအလုပ်ဖြစ်ထားပြီး ဘာတွေကမဖြစ်ခဲ့ဘူးလဲဆိုတာကို စူးစမ်းနေရမယ်..ပြီးတော့ အနာဂတ်မျိုးဆက်တွေအတွက် ဒါကို လက်ဆင့်ကမ်းမျှဝေပေးရမယ်” လို့လည်း ပြောပြခဲ့ပါတယ်။

အရီဇိုးနားတက္ကသိုလ်က အခြေခံရူပဗေဒဌာနရဲ့ ဒါရိုက်တာ ပေါလ် ဒေးဗီးစ် (Paul Davies) က “အခုလုပ်ဆောင်ချက်က စကြဝဠာကြီးထဲမှာ လူသားတွေရဲ့ ဖြစ်တည်နေမှုကို ပြန်ပြီးဆင်ခြင်မိလာစေတယ်..ကျွန်တော်တို့တောင် ကိုယ့်မှတ်တမ်းမှတ်ရာတွေကို လပေါ်မှာ အချိန်အတော်ကြီးကြာအောင်ထားနိုင်တယ်ဆိုရင် တခြားဂြိုဟ်သားတွေလည်း ဒီလိုမလုပ်ထားဘူးလို့ မပြောနိုင်ဘူးလေ..လ ဒါမှမဟုတ် တခြားတစ်နေရာရာမှာ သူတို့ထားရှိတဲ့အရာတွေကို ရှာဖွေလို့ ရကောင်းရလာနိုင်ပါသေးတယ်” လို့ သူ့ထင်မြင်ချက်ကို ပြောခဲ့ပါတယ်။

Beresheet အာကာသယာဉ်ငယ်က ဘယ်ဆောင်သွားတဲ့သတ္ထုပြားမှာ သီချင်းမျိုးစုံ၊ အစ္စရေးယဉ်ကျေးမှုနဲ့သမိုင်းအကြောင်း ကလေးတွေရဲ့ ရေးသားသရုပ်ဖော်မှုတွေ၊ အင်္ဂလိပ်လိုရေးသားထားတဲ့ ဝီကီပီဒီးယားအချက်အလက်တွေ၊ သရုပ်မှန်နဲ့ စိတ်ကူးယဉ်စာအုပ်ပေါင်း ၁၀၀၀၀၊ ပြဌာန်းစာအုပ်တွေနဲ့ နမူနာဘာသာပြန်ဆိုမှု (၁.၅) ဘီလျံပါ ဘာသာစကားပေါင်း ၅၀၀၀ အတွက်လမ်းညွှန်ချက်တွေကို ထည့်သွင်းထားတာပါ။ ဒီအချက်အလက်တွေအားလုံးကို ၄၀ မိုက်ခရွန် (၁ လက်မ၏ ၆၀၀ ပုံ ၁ ပုံ) အထူရှိတဲ့ တွဲလျက်နီကယ်လ်သတ္ထုပြားငယ် (၂၅) ပြားပေါ်မှာ ထည့်သွင်းရေးသားထားတာဖြစ်ပါတယ်။

လပေါ်မှာရှိနေတော့မယ့်ဒီသတ္ထုပြားမှာ လုံလောက်ပြည့်စုံတဲ့ အကာအကွယ်တွေပါရှိနေပြီး လပေါ်ကိုကျရောက်နေတဲ့ ဥက္ကာခဲတွေနေဲ့ အခြားအခြေအနေတွေကြောင့် ထိခိုက်ပျက်စီးမှုကို ခံနိုင်ရည်ရှိပါတယ်။ “ဒီပစ္စည်းက နှစ်သန်းပေါင်း ၁ ဘီလျံလောက်ထိတော့ အကောင်းပကတိအတိုင်း ရှိမနေနိုင်ပေမဲ့လည်း နှစ် ၁၀ သန်းကနေ နှစ်သန်း ၅၀ ထိ မပျက်မစီးဘဲ ရှိနေနိုင်လောက်မှာပါ” လို့ အရီဇိုးနားအခြေခံရူပဗေဒဌာနရဲ့ ဒါရိုက်တာ ပေါလ် ဒေးဗီးစ် (Paul Davies) ကတော့ ခန့်မှန်းထားပါတယ်။

 

Arch Mission Foundation ကို တွဲဖက်ဦးဆောင်သူ နိုဗာ စပစ်ဗက် (Nova Spivack) ကလည်းအခုဆိုရင် အတိတ်နဲ့ လက်ရှိကာလလူ့အဖွဲ့အစည်းရဲ့အသိဗဟုသုတတွေကို လပေါ်ကိုပို့ဆောင်ထားလိုက်တာဟာ လပေါ်မှာ လူ့အဖွဲ့အစည်းတစ်ခုကို ထူထောင်ထားလိုက်သလိုမျိုးပါပဲ…လကိုမော့ကြည့်မိသူတိုင်း လူသားမျိုးနွယ်ရဲ့ နောက်ထပ်နယ်ပယ်တစ်ခုရှိနေပြီလို့ ခံစားမိစေလောက်အောင်ပေါ့” လို့ ဆိုခဲ့ပါတယ်။

Ref: NBCNews “A 30-million page library is heading to the moon to help preserve human civilization”
TH (ရိုးရာလေး)