မြို့ပြမှာ မနေချင်တဲ့ မိခင်ဖြစ်သူအတွက် သားသမီးတွေက လှေကားထစ်ပေါင်း ၄၃၀ ပါဝင်တဲ့ မိုးကောင်းကင်လှေကားကို ကိုယ်ထူကိုယ်ထနဲ့ တည်ဆောက်ပေးခဲ့

mon.jpg

တရုတ်နိုင်ငံ အနောက်တောင်ပိုင်း ချုံချင့် (Chongqing) မြို့အနီးက တောင်တန်းဒေသတစ်ခုမှာ နေထိုင်တဲ့ အသက်အရွယ်ကြီးရင့်သူ မိခင်ဖြစ်သူအတွက် သားသမီးတွေက ကိုယ်ထူကိုယ်ထ လှေကားထစ်ပေါင်း ၄၃၀ ပါဝင်တဲ့ “မိုးကောင်းကင်လှေကား” (Sky Ladder) ကို တည်ဆောက်ပေးခဲ့ပါတယ်။

အသက် ၈၀ ကျော်အရွယ် မိခင်ဖြစ်သူဟာ တောင်ပေါ်ကျေးရွာလေးမှာပဲ တစ်သက်လုံး နေထိုင်လာခဲ့သူဖြစ်ပြီး သားသမီးတွေ နေထိုင်ရာ မြို့ပြကို လိုက်နေဖို့ ငြင်းဆန်ခဲ့ပါတယ်။ သူမအနေနဲ့ တောင်ပေါ်က အိမ်လေးမှာပဲ နေချင်ပြီး ကိုယ်ပိုင်စိုက်ပျိုးရေးလုပ်ငန်းလေးတွေ လုပ်ကိုင်ရင်း အေးအေးချမ်းချမ်း ဖြတ်သန်းလိုတာ ဖြစ်ပါတယ်။

သူနေထိုင်တဲ့ တောင်ပေါ်အိမ်ကို သွားတဲ့လမ်းဟာ မတ်စောက်ပြီး ရွှံ့ဗွက်တွေထူထပ်သလို မိုးရွာတဲ့အခါ အလွန်ချော်ပါတယ်။ အသက်အရွယ်ရလာတဲ့ မိခင်ဖြစ်သူအတွက် တောင်အတက်အဆင်းလုပ်ရတာ အန္တရာယ်များလာသလို သားသမီးတွေ လာရောက်လည်ပတ်ဖို့လည်း ခက်ခဲပါတယ်။

မိခင်ရဲ့ ဆန္ဒကို မလွန်ဆန်ချင်တဲ့ သားသမီးတွေဟာ မိခင်ဖြစ်သူ ဘေးကင်းလုံခြုံစွာ သွားလာနိုင်ဖို့အတွက် ကျောက်တောင်စောင်းတစ်လျှောက် ဘိလပ်မြေလှေကားထစ်ပေါင်း ၄၃၀ ကို ကိုယ်တိုင် အပင်ပန်းခံ တည်ဆောက်ပေးဖို့ ဆုံးဖြတ်ခဲ့ကြပါတယ်။

လှေကားတည်ဆောက်ဖို့အတွက် သဲ၊ ဘိလပ်မြေနဲ့ ဆောက်လုပ်ရေးပစ္စည်းတွေကို တောင်ပေါ်အထိ ပခုံးနဲ့ထမ်းပြီး သယ်ယူခဲ့ကြရပါတယ်။ လှေကားဘေးတစ်ဖက်တစ်ချက်မှာလည်း မိခင်ဖြစ်သူ ကိုင်တွယ်တက်ဆင်းနိုင်ဖို့ သံလက်ရန်းတွေကိုပါ စနစ်တကျ တပ်ဆင်ပေးခဲ့ကြပါတယ်။

မတ်စောက်တဲ့ တောင်စောင်းပေါ်မှာ မိုးပေါ်ကို ထိုးတက်နေသလို ဖြစ်နေတဲ့ ဒီလှေကားကြီးကို ဒေသခံတွေနဲ့ အင်တာနက်အသုံးပြုသူတွေက “မိုးကောင်းကင်လှေကား” (Sky Ladder) လို့ တင်စားခေါ်ဝေါ်ခဲ့ကြပါတယ်။ မိဘအပေါ် ထားရှိတဲ့ သားသမီးတွေရဲ့ သိတတ်မှုနဲ့ မေတ္တာတရားကို လူအများအပြားက ချီးကျူးဂုဏ်ပြုခဲ့ကြပါတယ်။

Ref: Siblings Build 430-Step ‘Sky Ladder’ for Their Mother Who Refuses to Live in the City

WL (ရိုးရာလေး) 

Share this post

ရိုးရာလေးတွင် ဖော်ပြပါရှိသော ဆောင်းပါးများကို မည်သည့် Website နှင့် Social Media များပေါ်တွင်မှ ပြန်လည်ကူးယူဖော်ပြခွင့်မပြုကြောင်း အသိပေးအပ်ပါသည်။ အသေးစိတ်အချက်အလက်များကို ဤနေရာတွင်ဖတ်ရှုနိုင်ပါသည်။

Leave a Reply

scroll to top