အမေရိကန်နိုင်ငံက မြန်မာနိုင်ငံမှာ အာဏာသိမ်းမှုကို ဆန့်ကျင်ဆန္ဒပြနေသူတွေအပေါ် အင်အားသုံးဖြိုခွဲခြင်းနဲ့ပတ်သက်ပြီး ရှုတ်ချခဲ့တဲ့အပြင် မြန်မာပြည်သူလူထုကို လွတ်လပ်စွာဆန္ဒထုတ်ဖော်ခွင့်ပေးဖို့ တောင်းဆိုခဲ့ပါတယ်။
“ဆန္ဒပြသူတွေအပေါ် အင်အားသုံးပြီးအကြမ်းဖက်တာကို ကျွန်တော်တို့ပြင်းပြင်းထန်ထန်ရှုတ်ချပါတယ်။ မြန်မာနိုင်ငံက လူတိုင်းဟာ လွတ်လပ်စွာထုတ်ဖော်ပြောဆိုခွင့်၊ အသင်းအဖွဲ့ဖွဲ့စည်းခွင့်၊ ငြိမ်းချမ်းစွာစုဝေးခွင့်အပါအ၀ င်ငြိမ်းချမ်းစွာဆန္ဒပြဖို့အတွက် အခွင့်အရေးတွေရှိပါတယ်”လို့ နိုင်ငံခြားရေး ဝန်ကြီးဌာနပြောရေးဆိုခွင့်ရှိသူ နက်ပရိုက်စ် (Ned Price) က ပြောကြားခဲ့ပါတယ်။
“အာဏာလွှဲပြောင်းပေးရေး၊ ဒီမိုကရေစီနည်းကျရွေးကောက်တင်မြှောက်ခံထားရတဲ့အစိုးရကိုပြန်လည်ပေးအပ်ရေး၊ ထိန်းသိမ်းခံထားရသူတွေကိုပြန်လွှတ်ပေးဖို့၊ ဆက်သွယ်ရေးကန့်သတ်ချက်အားလုံးကိုဖယ်ရှားပေးဖို့၊ အကြမ်းဖက်မှုကိုရှောင်ကြဉ်ဖို့စစ်တပ်ကို ကျွန်တော်တို့တောင်းဆိုပါတယ်” လို့ နက်ပရိုက်စ်က ဆက်လက်ပြောကြားခဲ့ပါတယ်။
ဥရောပသမဂ္ဂ (EU) ရဲ့နိုင်ငံခြားရေးမူဝါဒအကြီးအကဲ ဂျိုဆက် ဘောရယ်လ် (Josep Borrell) ကလည်း မြန်မာစစ်တပ်ကို အာဏာသိမ်းယူအပေါ် ဒဏ်ခတ်အရေးယူမှုအသစ်ချမှတ်နိုင်ကြောင်း၊ မြန်မာပြည်သူလူထုကို ထိခိုက်စေမယ့် အပြစ်ပေးမှုမျိုးမရှိသင့်ကြောင်း အသိပေးပြောကြားခဲ့ပါတယ်။
ဘောရယ်လ်က “ ကျွန်တော်တို့ ရွေးချယ်ဆုံးဖြတ်မှုအားလုံးကိုပြန်လည်သုံးသပ်နေပါတယ်။ လူပုဂ္ဂိုလ်တစ်ဦးချင်းနဲ့စစ်တပ်ပိုင်စီးပွားရေးလုပ်ငန်းတွေအပေါ် နောက်ထပ်ပစ်မှတ်ထားပိတ်ဆို့မှုတွေလုပ်သွားမယ်” လို့ ပြောကြားခဲ့ပါတယ်။ ဥရောပသမဂ္ဂက မြန်မာနိုင်ငံရဲ့ဖွံ့ဖြိုးတိုးတက်မှုဆိုင်ရာအကူအညီတွေကို ပြန်လည်သုံးသပ်တာ (ဒါမှမဟုတ်) အရှေ့တောင်အာရှနိုင်ငံတွေနဲ့ ကုန်သွယ်ရေးဆက်သွယ်တာတွေကို တားဆီးနိုင်တယ်လို့ ဘောရယ်လ်ကပြောပါတယ်။
ဒါပေမဲ့ စပိန်ဝန်ကြီးချုပ်ဟောင်းက လူအများစုကို ထိခိုက်နစ်နာစေမယ့် လုပ်ဆောင်ချက်တွေကို အလျင်အမြန်ရှောင်ရှားသင့်ကြောင်းပြောကြားခဲ့ပါတယ်။ ဥရောပသမဂ္ဂရဲ့၂၇ နိုင်ငံက နိုင်ငံခြားရေး ဝန်ကြီးတွေက ဖေဖော်ဝါရီလ ၂၂ ရက်မှာ ပြုလုပ်မယ့် အစည်းအဝေးမှာ နောက်ထပ်လုပ်ဆောင်မှုတွေကို ဆွေးနွေးသွားမယ်လို့ပြောကြားခဲ့ပါတယ်။
Ref: TheStraitsTimes “US ‘strongly’ condemns violence against protesters as EU weighs sanctions on Myanmar military”
WL (ရိုးရာလေး)
