အဓမ္မပြုကျင့်သူကို သတ်ခဲ့တဲ့ အမျိုးသမီးအပေါ် ထောင်ဒဏ် ၆ နှစ် ချမှတ်ခဲ့တဲ့ မက္ကဆီကိုတရားရုံးရဲ့ ဆုံးဖြတ်ချက်ဟာ ဆန့်ကျင်ကန့်ကွက်မှုတွေနဲ့ ရင်ဆိုင်ခဲ့ရပါတယ်။ ခင်ပွန်းမရှိတဲ့ ကလေးအမေ (Single Mother) တစ်ဦးဖြစ်တဲ့ ရိုဆာနာရုဇ်ဟာ အာလူးကြော်ရောင်းရင်း အသက်မွေးဝမ်းကျောင်းသူပါ။ ၂၀၂၁ ခုနှစ် မေလမှာ သူငယ်ချင်းတစ်ဦးနဲ့အတူ ဘီယာသောက်နေရင်း တစ်ခါဆုံခဲ့ဖူးသူ အမျိုးသားတစ်ယောက်နဲ့ ထပ်ဆုံခဲ့ပါတယ်။
အဲဒီအမျိုးသားနဲ့ အပြင်လျှောက်လည်ကြပြီး အိမ်အပြန်မှာ အမျိုးသားက ရိုဆာနာကို အိမ်လိုက်ပို့ပါတယ်။ အိမ်ပြန်ရောက်တော့ မိုးချုပ်နေပြီး သူ့အိမ် ပြန်ရမှာ ဝေးတဲ့အတွက် ရိုဆာနာရဲ့အိမ်မှာ အိပ်ပါရစေလို့ အမျိုးသားက ခွင့်တောင်းခဲ့ပါတယ်။ ရိုဆာနာကလည်း အိပ်ခွင့်ပြုခဲ့ပါတယ်။ ညရောက်တော့ အမျိုးသားက ရိုဆာနာရဲ့ အိပ်ယာထဲ ဝင်လာပြီး သူ့အင်္ကျီတွေကို ဆွဲဖြဲကာ ရိုက်နှက်ခဲ့တယ်လို့ ရိုဆာနာက ဆိုပါတယ်။
ရိုဆာနာက နှာခေါင်းကို လက်သီးနဲ့ထိုးပစ်ခဲ့ပြီး အမျိုးသားက သူ့ကို သတ်ပစ်မယ်လို့ ခြိမ်းခြောက်ခဲ့ပါတယ်။ ရိုဆာနာက သူ့ရဲ့အင်္ကျီကို ဆွဲပြီး လည်ပင်းညှစ်ခဲ့ရာမှာ အမျိုးသား သေဆုံးသွားခဲ့ပါတယ်။ ရိုဆာနာက အမျိုးသားရဲ့ ရုပ်အလောင်းကို အိတ်ကြီးထဲထည့်ပြီး လမ်းပေါ်ဆွဲချလာတုန်း ရဲတပ်ဖွဲ့က တွေ့သွားလို့ အဖမ်းခံခဲ့ရပါတယ်။ ဒီအခြေအနေမှာ အမျိုးသားကို မသတ်ရင် သူ အသတ်ခံရလိမ့်မယ်လို့ ရိုဆာနာက ဆိုပါတယ်။
ရိုဆာနာအနေနဲ့ အမျိုးသားကို မူးမေ့သွားအောင် ခေါင်းကို တစ်ချက်လောက် ထုလို့ ရပေမဲ့ ဒီလုပ်ရပ်ကတော့ ကိုယ့်ကိုယ်ကိုယ် ခုခံမှု အတိုင်းအတာထက် ကျော်လွန်ခဲ့ပြီး လူသေဆုံးစေမှုဖြစ်တယ်လို့ တရားရုံးက ဆုံးဖြတ်ခဲ့တာပါ။ ဒီအမှုမှာ ရိုဆာနာကို ထောင်ဒဏ် ၆ နှစ် ချမှတ်ခဲ့ပြီး သေဆုံးသူရဲ့ ကျန်ရစ်သူမိသားစုကို နစ်နာကြေး အမေရိကန်ဒေါ်လာ ၁၆၀၀၀ ပေးဖို့ ပြီးခဲ့တဲ့တနင်္လာနေ့မှာ တရားရုံးက အမိန့်ချမှတ်ခဲ့ပါတယ်။
ရိုဆာနာရဲ့ ရှေ့နေတွေကတော့ ဒီဆုံးဖြတ်ချက်ဟာ မျှတမှုမရှိဘူးလို့ မှတ်ချက်ပေးခဲ့ပြီး အယူခံဝင်မယ်လို့ ဆိုပါတယ်။ ဒီသတင်းဟာ ယခုသီတင်းပတ်အတွင်း နိုင်ငံတကာ သတင်းစာမျက်နှာတွေမှာပါ ဖော်ပြခံခဲ့ရပြီး ကိုယ့်ကိုယ်ကိုယ် ခုခံပိုင်ခွင့်နဲ့ပတ်သက်လို့ မေးခွန်းထုတ်စရာ ဖြစ်ခဲ့ပါတယ်။
Ref: Woman Sentenced to 6 Years in Prison for Killing Man Who Was Raping Her
NZ ( ရိုးရာလေး)
