တိုင်ဖွန်းမုန်တိုင်း တိုက်ခတ်နေချိန်မှာ ပျောက်ဆုံးသွားတဲ့ ကုန်တင်သင်္ဘောကို ဂျပန်ကမ်းခြေစောင့်တပ်ဖွဲ့က ရှာဖွေနေပါတယ်။ Gulf Livestock 1 သင်္ဘောပေါ်မှာ သင်္ဘောသား ၄၃ ယောက်နဲ့ ကျွဲနွားအကောင်ရေ ၆၀၀၀ တင်ဆောင်လာတာပါ။ တိုင်ဖွန်းမုန်တိုင်း မေဆက် (Maysak) တိုက်ခတ်မှုဒဏ် ခံစားခဲ့ရတဲ့Gulf Livestock 1 သင်္ဘောဟာ အရှေ့တရုတ်ပင်လယ်ကနေ အန္တရာယ်ကြုံနေရပြီလို့ အချက်ပြခဲ့ပါတယ်။
အဲဒီကုန်တင်သင်္ဘောပေါ်က အသက်ကယ်အင်္ကျီ ဝတ်ထားတဲ့ သင်္ဘောသားတစ်ယောက်ကတော့ လှိုင်းလုံးကြီးနဲ့ မျောပါလာခဲ့ပြီး သူ့ကို ကမ်းခြေစောင့်တပ်ဖွဲ့က ကယ်တင်နိုင်ခဲ့ပါတယ်။ မုန်တိုင်းကြောင့် လှိုင်းကြီးလေထန်နေပေမဲ့ လေယာဉ်တွေ၊ ကင်းလှည့်သင်္ဘောတွေ စေလွှတ်ပြီး ကုန်တင်သင်္ဘောနဲ့ ကျန်ရှိနေတဲ့ သင်္ဘောသားတွေကို ရှာဖွေလျက်ရှိပါတယ်။ ကုန်တင်သင်္ဘောပေါ်မှာ ဖိလစ်ပိုင်သင်္ဘောသား ၃၉ ယောက်၊ နယူးဇီလန်နိုင်ငံသား ၂ ယောက်၊ သြစတြေးလျနိုင်ငံသား ၂ ယောက် လိုက်ပါခဲ့တာပါ။ ဂျပန်ကမ်းခြေစောင့်တပ်ဖွဲ့က ကယ်တင်ခဲ့တဲ့ သင်္ဘောသားကတော့ ဖိလစ်ပိုင်နိုင်ငံသားဖြစ်တယ်လို့ သြစတြေးလျအစိုးရက ထုတ်ပြန်ထားပါတယ်။
Gulf Livestock 1 သင်္ဘောဟာ သြဂုတ်လ ၁၄ ရက်မှာ နယူးဇီလန်နိုင်ငံကနေ စတင်ထွက်ခွာပြီး ၁၇ ရက်ကြာမြင့်ဖွယ်ရှိတဲ့ တရုတ်နိုင်ငံခရီးကို ဦးတည်ခဲ့တာပါ။ ပြီးခဲ့တဲ့ဗုဒ္ဓဟူးနေ့ညမှာတော့ Gulf Livestock 1 သင်္ဘောက ဂျပန်နိုင်ငံ အနောက်တောင်ပိုင်း အမာမီအိုရှီမာကျွန်းအနောက်ဘက် ရေပြင်ကနေ အန္တရာယ်ကြုံနေရပြီလို့ အချက်ပြခဲ့တာပါ။ ၂၀၀၂ ခုနှစ်က တည်ဆောက်ခဲ့တဲ့ Gulf Livestock 1 သင်္ဘောဟာ အလျား ပေ ၄၅၀ ရှည်လျားပြီး ပနားမားအလံ တပ်ဆင်ထားတဲ့ ကုန်တင်သင်္ဘော ဖြစ်ပါတယ်။
Ref: BBC ” Cargo ship with crew and thousands of cattle missing in typhoon off Japan”
Nz (ရိုးရာလေး)
