ကဖင်းဓာတ်ပါ ကော်ဖီကို သောက်သည်ဖြစ်စေ ကဖင်းဓာတ်ဖယ်ထားတဲ့ ကော်ဖီကို သောက်သည်ဖြစ်စေ ကော်ဖီသောက်သုံးခြင်းဟာ ကျန်းမာရေးပြဿနာ ဖြစ်ပွားနှုန်းများကို လျှော့ကျစေနိုင်တယ်လို့ လေ့လာသူများက နိုင်ငံပေါင်းစုံမှာနေကြတဲ့ ကော်ဖီသောက်သုံးသူ ၂ ထောင်ကျော်ကို လေ့လာပြီး စစ်တမ်းတစ်ခုထုတ်ပြန်ခဲ့ပါတယ်။
ဒီစစ်တမ်းကို Annals of Internal Medicine ဂျာနယ်မှာ ဇူလိုင် ၁၀ ရက်နေ့က ပုံနှိပ်ထုတ်ဝေခဲ့တာဖြစ်ပြီး အမေရိကန်နိုင်ငံ ကယ်လီဖိုးနီးယားပြည်နယ် လောစ်အင်ဂျလိစ်မြို့ရှိ Keck School of Medicine of USC မှ တွဲဖက်ပါမောက္ခဖြစ်သူ ဗရိုနီကာ ဆန်တီယာဝမ် (Veronica Setiawan) နဲ့ အခြားသော အဖွဲ့များ ပူးပေါင်းလေ့လာခဲ့တာ ဖြစ်ပါတယ်။
ကော်ဖီသောက်သုံးခြင်းက ကျန်းမာရေးအတွက် ကောင်းမွန်စေပြီး ကင်ဆာရောဂါကို ကာကွယ်စေနိုင်တယ် လို့စစ်တမ်းက ဖော်ပြခဲ့ပါတယ်။ ဒါ့အပြင် တစ်နေ့ကို ကော်ဖီ ၂ ခွက် ၊ ၃ခွက် သောက်သုံးသူများဟာ ကော်ဖီလုံးဝမသောက်သုံးသူများထက် ၁၈ % ခန့် အသက်သေဆုံးနိုင်ခြေနည်းပါးပြီး ကော်ဖီသောက်သုံးသူများဟာ နှလုံးရောဂါ၊ ကင်ဆာ၊ ဆီးချို၊ လေဖြတ်ခြင်းနဲ့ အသက်ရူလမ်းကြောင်းဆိုင်ရာရောဂါများ ဖြစ်ပွားနှုန်း နည်းပါးပါတယ်။ ဒါပေမဲ့ စစ်တမ်းမှာ ကော်ဖီဘယ်လောက်သောက်သလဲ ဆိုတာကိုသာလေ့လာခဲ့ပြီး သကြားဘယ်လောက်ရောလဲ၊ နွားနို့ ဘယ်လောက်ရောပြီး သောက်လဲဆိုတာကိုတော့ မလေ့လာခဲ့ဘူးလို့ လေ့လာသူများက ဆိုပါတယ်။
လေ့လာချက်ထဲမှာ ကဖင်းဓာတ်ပမာဏကိုပါ ထည့်သွင်းစဉ်းစားခြင်းမပြုခဲ့တဲ့အတွက် ကဖင်းဓာတ် ပမာဏများလွန်းရင်လည်း ကျန်းမာရေးအတွက် ဆိုးကျိုးဖြစ်စေနိုင်ပါသေးတယ်။ တစ်နေ့ကို ကော်ဖီ ၄ ခွက်မှ ၅ခွက် (ကဖင်းဓာတ် ၄၀၀ မီလီဂရမ်) အထိသောက်သုံးသူများရဲ့ ကျန်းမာရေးဟာ ရေရှည်ဆိုရင် ထိခိုက်နိုင်ပါတယ်။ ဒါကြောင့် ကော်ဖီပုံမှန်သောက်သုံးခြင်းဟာ ကျန်းမာရေးအတွက်ကောင်းမွန်စေနိုင်တယ် ဆိုပေမဲ့ အလွန်အကျွံမသောက်သုံးဖို့လိုအပ်ပြီး ကော်ဖီထဲထည့်သောက်တဲ့ သကြားနဲ့ နွားနို့ ပမာဏကိုလည်း ဂရုစိုက်ကာ သောက်သုံးဖို့ လိုအပ်ပါတယ်။
Ref : Today News :Coffee can be part of a healthy lifestyle, new studies show
