“သွားခါနီး လာခါနီး “ လား၊ “သွားကာနီး လာကာနီး” လား

ဒီတစ်ပတ်မှာတော့ ရောထွေးတတ်တဲ့ မြန်မာစကားအသုံးအနှုန်းတွေထဲက “ကာ” နဲ့ “ခါ” အကြောင်းကို ပြောပြသွားမှာ ဖြစ်ပါတယ်။ လူအများစု သိပြီးသား အကြောင်းအရာပေမယ့် အမှတ်တမဲ့ မှားယွင်းသုံးစွဲမိတာတွေရှိတတ်လို့ ပြန်လည်ဆွေးနွေးကြည့်ရအောင်လေ။

တစ်ပြိုင်နက်ဖြစ်စေ၊ ဆက်တိုက်ဖြစ်စေ ဖြစ်ပျက်နေတဲ့အကြောင်းအရာတွေကို ဖော်ပြချင်ရင် “ကာ” ကို သုံးပါတယ်။
ဥပမာ – ရယ်ကာ မောကာ ပြောသည်။
အင်တာနက်ဖွင့်ကာ facebook သုံးသည်။

အချိန်၊ အခါ၊ ကာလတွေကိုပြချင်ရင်တော့ “ခါ” ကို သုံးပါတယ်။
ဥပမာ – ငယ်စဉ်အခါ ပညာရှာ
“ဖြစ်ခါမှ ဖြစ်ရော ရသလောက် ကြိုးစားရမှာက ကိုယ့်တာဝန် “ (ဒီမှာ “ ဖြစ်တဲ့ အချိန်အခါမှ ဖြစ်ရော “ ဆိုတဲ့ သဘောနဲ့ “ ခါ” ကို သုံးတာပါ )

ခေါင်းစဉ်က မေးခွန်းအတွက်လည်း အဲဒီသဘောပါပဲ။ အချိန်အခါကို ပြတဲ့သဘောနဲ့ “သွားခါနီး လာခါနီး” လို့ သုံးထားတာပါ။ မှားယွင်းရောထွေးတတ်တဲ့ မြန်မာစာ အသုံးအနှုန်းတွေကို ရိုးရာလေးက ပုံမှန်တင်ဆက် မျှဝေပေးလျက် ရှိနေပါတယ်။

ကိုးကား ။ ။ ပညာရေး ဝန်ကြီးဌာန မြန်မာစာအဖွဲ့ထုတ် “မြန်မာစာ မြန်မာစကား”