WLC:11 Battle Bones မှာ ပရိသတ်လက်ခုပ်သံတွေ သိမ်းကျုံးယူခဲ့သူကတော့ စိုးမင်းအောင်ပါပဲ။ အရှောင်အတိမ်း သေသပ်သလို အဝင်အထွက် ပါးနပ်တဲ့ စိုးမင်းအောင်က ကမ္ဘောဒီးယားဖိုက်တာ ဆော့ရစ်သ်ကို ဒုတိယအချီမှာပဲ အလဲထိုးအနိုင်ယူပြီး ဂျွမ်းထိုးအောင်ပွဲခံလိုက်တော့ သိမ်ဖြူရုံ တစ်ရုံလုံး လက်ခုပ်သံ သောသောညံသွားခဲ့ပါတယ်။
ထိုင်း- မြန်မာ နယ်စပ်မှာ မွေးဖွားခဲ့တဲ့ မြန်မာ့သွေး၊ မြန်မာနွယ် စိုးမင်းအောင်ဟာ ၁၀ နှစ်ကျော် ကွဲကွာနေတဲ့ ဖခင်နဲ့ ပြန်ဆုံစည်းရေးဆိုတဲ့ မျှော်လင့်ချက်ကတစ်ဖက်၊ WLC ချန်ပီယံရွှေခါးပတ် ပိုင်ဆိုင်ရေးဆိုတဲ့ ရည်မှန်းချက်က တစ်ဖက်နဲ့ ခရီးဆက်နေသူပါ။ ဒါပေမဲ့ COVID-19 ကပ်ရောဂါကြောင့် လက်ဝှေ့ကလပ် ပိတ်ထားရချိန်မှာ စိုးမင်းအောင်က ဘန်ကောက်မြို့အနောက်ဘက် ၇၆ မိုင်ကွာဝေးတဲ့ ကန်ချနာဘူရီမြို့က သူ့အမေအိမ်မှာ ပြန်နေပြီး သူ့အမေကို ဝိုင်းကူနေပါတယ်။ ၁၁ နှစ်သားအရွယ်ကတည်းက မွေထိုင်းအားကစားကို တစ်စိုက်မတ်မတ် ဖက်တွယ်ခဲ့တဲ့ စိုးမင်းအောင်ဟာ ပုံမှန်အတိုင်းဆိုရင် တစ်ရက်မှာ ၇ နာရီလောက် လေ့ကျင့်ပေမဲ့ အခုအခါမှာတော့ လေ့ကျင့်မှု ပြတ်နေပြီး ကားဝပ်ရှော့တစ်ခုမှာ ဝိုင်းကူလုပ်ပေးနေတာ တစ်ပတ်လောက်ရှိပြီလို့ ဆိုပါတယ်။ စိုးမင်းအောင်နဲ့ စကားစမြည်ပြောဖြစ်တာကို ရိုးရာလေးပရိသတ်တွေအတွက် ဖော်ပြပေးလိုက်ပါတယ်။
Q – စိုးမင်းအောင်ရေ မင်္ဂလာပါ။ COVID-19 ကာလမှာ ဘာတွေ လုပ်ဖြစ်လဲ။
ဘာမှ မယ်မယ်ရရ မလုပ်ဖြစ်ဘူး။ ကားဝပ်ရှော့မှာ ဝိုင်းကူပေးနေတာ တစ်ပတ်လောက်ပဲ ရှိသေးတယ်။
Q – WLC 11: Battle Bones ပြီးကတည်းက ပွဲဝေးနေတာနော်။ ဒီကာလမှာ လေ့ကျင့်မှုရော လုပ်ဖြစ်လား။
လေ့ကျင့်မှုလည်း မလုပ်ဖြစ်ပါဘူးဗျာ
Q – ပွဲမရှိလို့ မိသားစုကို မထောက်ပံ့နိုင်ဘူးလို့ သတင်းကြားတယ်။ ထိုင်းနိုင်ငံသားမဟုတ်လို့ ထိုင်းအစိုးရ ထောက်ပံ့တာမရဘူးဆို။ ထိုင်းနိုင်ငံသား လျှောက်ထားလား။
အိမ်ကို ငွေမထောက်နိုင်တာ အမှန်ပဲ။ ထိုင်းနိုင်ငံသားဖြစ်ခွင့် မလျှောက်ဖူးဘူး။
Q – ဒီကာလအတွင်း မြန်မာနိုင်ငံမှာ အခြေချဖို့ရော တွေးဖြစ်သေးလား။
မြန်မာနိုင်ငံမှာ အိမ်လေးတစ်လုံးလောက်တော့ ရှိချင်တယ်ဗျာ။ ဒါပေမဲ့ ဘာလုပ်ရမှန်း မသိသေးပါဘူး။
Q – WLC ရဲ့ ၂ နှစ်စာချုပ်အရ လစဉ်ထောက်ပံ့ငွေရတယ်လို့ သိရပါတယ်။ အခုလက်ရှိ စားဝတ်နေရေး အခြေအနေကရော ဘယ်လိုလဲ။ ဘယ်နှစ်လလောက် တောင့်ခံနိုင်ဦးမလဲ။
အခုတော့ တခြားဝင်ငွေမရှိဘူးလေ။ WLC ကရတဲ့ လစဉ်ထောက်ပံ့ကြေးကိုပဲ ထိုင်စားနေရတာပေါ့ဗျာ။ (WLC ရဲ့ ၂ နှစ်စာချုပ်အရ စိုးမင်းအောင်ကို လစဉ်လတိုင်း ဘတ်ငွေ ၃၀၀၀( မြန်မာငွေ ၁၃၂၅၈၀ ကျပ်) ထောက်ပံ့ပေးနေတယ်လို့ သိရပါတယ်)
Q – ၁၁ နှစ်အရွယ်ကတည်းက မွေထိုင်း လေ့ကျင့်ခဲ့တာဆိုတော့ ဒီလောကထဲ ဘယ်လိုရောက်လာတာလဲဆိုတာ သိပါရစေ။
ကျွန်တော့်သူငယ်ချင်းခေါ်လို့ လိုက်ကစားဖြစ်သွားတာ။ အဲဒီနေ့က ကျွန်တော့်သူငယ်ချင်းအိမ်မှာ ကစားနေရင်း ညနေဘက်ရောက်တော့ ကလပ်က လူတွေက သူ့ကို လာခေါ်တယ်။ နည်းပြလည်း ပါလာတယ်။ အဲဒါနဲ့ သူငယ်ချင်းက လိုက်ခဲ့ပါလား၊ မင်းပါလာရင် အဖွဲ့တောင့်သွားတာပေါ့လို့ ပြောတာနဲ့ လိုက်လေ့ကျင့်ဖြစ်သွားတာ။
Q – ၁၀ နှစ်ကျော် ကွဲကွာနေတဲ့ ဖခင်ကို ရှာဖွေနေတယ်လို့ သတင်းကြားပါတယ်။ ဖခင်နဲ့ရော အဆက်အသွယ်ရပြီလား။
WLC မှာ ထိုးတော့ ကျွန်တော့်အဖေ မြန်မာနိုင်ငံကို ပြန်ရောက်လာမယ်လို့ ထင်တာပေါ့။ အဖေ့နဲ့ ပြန်တွေ့ချင်တယ်ဗျာ။ COVID-19 မတိုင်ခင်တုန်းကတော့ ကြားလူတစ်ယောက်က အဖေ့ကို တွေ့လိုက်တယ်ဆိုပြီး တစ်ခါ လှမ်းဆက်သွယ်ဖူးတယ်။
Q – အခုက အမေ့အိမ်မှာ ပြန်နေနေပြီး အမေ့ကို ဝိုင်းကူနေတယ်လို့ သိရပါတယ်။ လက်ဝှေ့ကလပ် ပြန်ဖွင့်တာနဲ့ ကလပ်ကို ပြန်ဖြစ်မလား။ အမေ့အိမ်မှာ ဆက်နေဖြစ်မလား။
အခုတော့ အမေနဲ့ အတူတူနေတယ်။ ဘာလုပ်ရမှန်း မသိသေးဘူးဗျာ။ လောလောဆယ် ဘာမှစဉ်းစားလို့ မရသေးဘူးဖြစ်နေတယ်။
Q – ခင်ဗျားရဲ့ အနာဂတ်အစီအစဉ်ကိုလည်း သိပါရစေ။
WLC နဲ့ပဲ ရှေ့လျှောက် လက်တွဲသွားမယ်
Q – WLC ပွဲဦးထွက်မှာ မြန်မာပရိသတ်တွေက ခင်ဗျားကို တစ်ခဲနက် အားပေးခဲ့တယ်နော်။ မြန်မာပရိသတ်တွေကို ဘာပြောချင်လဲ။
ကျွန်တော်က ထိုင်းမှာနေတာဆိုတော့ ကျွန်တော့်ကို အားပေးတဲ့ မြန်မာပရိသတ် အဲ့လောက်ရှိမှန်းမသိဘူးဗျ။ ကျွန်တော့်ကို အားပေးလို့ ကျေးဇူးတင်ပါတယ်။ WLC ရဲ့ လက်ဝှေ့ချန်ပီယံခါးပတ် ပိုင်ဆိုင်နိုင်အောင် ကြိုးစားသွားမယ်။
Nz (ရိုးရာလေး)
