ခေါင်းလျှော်တဲ့အခါ ဆံသားပျက်စီးအောင် လုပ်မိတဲ့ အမှားများ

တချို့မိန်းကလေးတွေအတွက် ခေါင်းလျှော်ရတာ လွယ်ကူကောင်းလွယ်ကူနိုင်ပါတယ်။ တကယ်တော့ ဆံပင်ကို ရေဓာတ်ကုန်ခန်းအောင်၊ ဆံပင်ကျိုးပဲ့အောင်၊ ဦးရေပြားရောဂါပိုးဝင်အောင် ကျွန်မတို့ သတိမပြုမိဘဲ လုပ်မိနေတဲ့ အမှားတချို့ရှိပါတယ်။ ဒါကြောင့် ခေါင်းလျှော်တဲ့အခါမှာ လုပ်မိနေတဲ့အမှားတွေကို အခုပြောပြပေးမှာဖြစ်ပါတယ်။ တကယ်လို့ သင်လည်း ခေါင်းလျှော်တဲ့အခါမျိုးမှာ အဲဒီလိုအမှားတွေ လုပ်မိပြီးဆိုရင် ပြင်ဆင်သင့်ပါတယ်နော်။ ကဲ..ဆံပင်ပျက်စီးအောင် ခေါင်းလျှော်တဲ့အခါ ဘယ်လိုအမှားမျိုးတွေ လုပ်မိနေလဲဆိုတာ ကြည့်လိုက်ရအောင်..။

၁ ခေါင်းလျှော်ရည်သုံးပြီး မကြာခဏခေါင်းလျှော်တာ

ဆေးဘက်ဆိုင်ရာကျွမ်းကျင်ပညာရှင်တွေကတော့ ခေါင်းလျှော်တဲ့အခါတိုင်း ခေါင်းလျှော်ရည်သုံးတာက ဆံသားသန့်ရှင်းသွားဖို့အတွက် မလိုအပ်ဘူးလို့ ဆိုပါတယ်။ ဆံသားကို ရေနဲ့ တစ်ပတ်ကို အကြိမ်များစွာ သန့်စင်ပေးမယ်ဆိုရင်လည်း မမြင်နိုင်တဲ့ဖုန်မှုန့်တွေကို ဖယ်ရှားပေးဖို့အတွက် လုံလောက်ပါတယ်။ ခေါင်းလျှော်ရည်သုံးပြီး ခေါင်းခဏခဏလျှော်တာက ဆံသားက အဆီနှစ်တွေကို ဖယ်ရှားလိုက်သလိုဖြစ်စေပါတယ်။ ဆံသားခြောက်သွေ့ခြင်းနဲ့ ပျက်စီးခြင်းကို ဆံသားရဲ့အဆီအနှစ်က ကာကွယ်ပေးတာကြောင့် ကျန်းမာတဲ့ဆံသားဖြစ်ဖို့ အဆီအနှစ်က မရှိမဖြစ်ပါပဲ။

၂ ရေများများမလောင်ဘဲ ခေါင်းလျှော်ရည်အများကြီးသုံးတာ

ခေါင်းလျှော်ရည်မသုံးခင် ဆံပင်ကို အနည်းဆုံး (၁) မိနစ်လောက် ရေသေချာချာလောင်ပေးသင့်ပါတယ်။ ခေါင်းလျှော်ရည်မသုံးခင် ဆံပင်ကို ရေလုံးဝစိုသွားစေတာကလည်း ခေါင်းလျှော်ဖို့အတွက် အရေးကြီးတဲ့အဆင့်ပါပဲ။ ဆံပင်အရင်းကနေအဖျားထိ ရေစိုသွားပြီဆိုရင် ခေါင်းလျှော်ရည်ကို သေချာသုံးပေးရုံပါပဲ။ ဒါက ခေါင်းလျှော်တဲ့အခါ ခေါင်းလျှော်ရည်နည်းနည်းပဲသုံးမိအောင် ကူညီပေးပါလိမ့်မယ်။

၃ ခေါင်းလျှော်ရည်သုံးပြီးမှ ပျော့ဆေးသုံးတာ

မိန်းကလေးတော်တော်များများက ခေါင်းလျှော်တဲ့အခါ ခေါင်းလျှော်ရည်ကို အရင်ဆုံးသုံးပြီးမှ ပျော့ဆေးကို သုံးကြပါတယ်။ တချို့ဆံသားအမျိုးအစားတွေက ပျော့ဆေးသုံးပြီးမှ ခေါင်းလျှော်ရည်ကို သုံးတာပိုကောင်းပါတယ်။ပျော့ဆေးကို အရင်သုံးတာက သင့်ဆံသားကို ပွပွရောင်းရောင်းမဖြစ်စေပါဘူး။ ဒီနည်းက အစိုဓာတ်လိုအပ်တဲ့ဆံသားအတွက် အကောင်းဆုံးဖြစ်ပါတယ်။

၄ ဆံသားအဖျားကို ခေါင်းလျှော်သုံးတာ

ခေါင်းလျှော်ရည်ကို ဆံသားအဖျားမှာ အများဆုံးသုံးမယ်ဆိုရင် ဆံသားအဖျားတွေကို ပျက်စီးစေပါတယ်။ ခေါင်းလျှော်ရည်ကို ဆံသားအဖျားထက် ဦးရေပြားမှာ သုံးဖို့လိုအပ်ပါတယ်။ ဆံသားအဖျားတွေက အမြဲလိုလိုခြောက်သွေ့တဲ့အတွက် အဖျားမှာ ခေါင်းလျှော်ရည်သုံးမယ်ဆိုရင် ပိုပြီးရေဓာတ်ကုန်ခန်းစေပါတယ်။

၅ ဦးရေပြားမှာ ဆံပင်ပျော့ဆေးသုံးတာ

ဦးရေပြားမှာ ဆံပင်ပျော့ဆေးသုံးတာက ဆံသားကို ပိုပြီးအဆီပြန်စေပါတယ်။ တကယ်တော့ ဆံပင်အဖျားက ပိုပြီးရေဓာတ်လိုအပ်တဲ့အတွက် ဆံပင်အဖျားမှာ ပျော့ဆေးကို ပိုသုံးပေးသင့်ပါတယ်။ ဦးရေပြားမှာ ပျော့ဆေးသုံးတာက ဆံပင်သန်တာနှေးကွေးစေတဲ့အပြင် အဆီထုတ်လုပ်မှုကိုလည်းတိုးလာစေကာ မွေးညင်းပေါက်တွေကို ပိတ်သွားစေနိုင်ပါတယ်။

၆ ဆံပင်မခြောက်သေးဘဲ ခေါင်းဖြီးတာ

ဆံပင်ရေစိုကြီးကို ခေါင်းဖြီးတာက ဆံသားကို ပျက်စီးစေနိုင်ပါတယ်။ ဆံသားက ရေစိုနေတဲ့အချိန်မှာ အားနည်းနေတဲ့ အခြေအနေဖြစ်တဲ့ အတွက်ကြောင့်ဖြစ်ပါတယ်။ တဘတ်နဲ့ ဆံပင်ကို ကြမ်းကြမ်းတမ်းတမ်း သုတ်တာကလည်း ဆံသားကို ပျက်စီးစေနိုင်ပါတယ်။ ဆံသားခြောက်သွေ့အောင်လုပ်ဖို့ အကောင်းဆုံးနည်းက ဆံပင်ကို ပုတ်ပုတ်ပြီး သုတ်ပေးဖို့နဲ့ သဘာဝအတိုင်းအခြောက်ခံတာပါပဲ။

Ref: Hair Washing Mistakes You May Be Making

WL (ရိုးရာလေး)