Botox ဆိုတာ ဘာလဲ?

bo1.jpg

လူတွေ ပြောပြောနေကြတဲ့ လှသွားအောင် botox ထိုးကြတယ်ဆိုတာ ဘာများပါလိမ့်…နည်းနည်းရှင်းပြချင်ပါတယ်။

Botox ဟာ Botulinum toxin ကို အတိုကောက် ခေါ်တာပါ။ သူ့ရဲ့ အဓိက လုပ်ဆောင်ချက်ကတော့ ကြွက်သားတွေကို ပြေလျော့ သေးသွယ်စေခြင်းပါ။ Botox ထိုးထားတဲ့ နေရာအနီးတဝိုက်က ကြွက်သားတွေကို သေးသွယ်သွားစေတဲ့အတွက် ကြွက်သားတင်းအားမလိုတဲ့နေရာတွေ၊ သေးစေချင်တဲ့နေရာတွေမှာ ထိုးကြပါတယ်။

များသောအားဖြင့်တော့ အလှအပရေးရာတွေမှာ အသုံးများ၊ လူသိများကြပါတယ်။ ဥပမာ ပါးနှစ်ဘက်က ကြွက်သားကို ထိုးမယ်ဆိုရင် ပါးလေးသွယ်သွားပြီး မျက်နှာက V ပုံစံ လေး ပေါ်လာမယ်။ မျက်လုံးထောင့်တို့ နဖူးတို့က အရေးအကြောင်းတွေကို botox ထိုးလိုက်မယ်ဆိုရင် ကြွက်သားတွေ ပြေလျော့သွားပြီး အရေးအကြောင်းတွေ သိသိသာသာ လျော့နည်းသွားပါမယ်။ botox ကို သုံးရတဲ့ အများဆုံး အကြောင်းအရင်းတွေပါပဲ။ ဒါတင်မကသေးပဲ ခြေသလုံးသွယ်အောင်လဲ လာထိုးကြပါသေးတယ်။ ချိုင်းချွေးထွက်သက်သာအောင်လဲ သုံးကြပါသေးတယ်။ အလှအပအတွက်တင် Botoxကို သုံးလို့ရတာမဟုတ်ပါဘူး။ နာတာရှည်ခေါင်းတစ်ခြမ်းကိုက်ခြင်း၊ ဇာတ်ကြောတက်၊ တောင့်တင်းခြင်း စတဲ့အခြားနေရာတွေမှာပါ သုံးလို့ရပါသေးတယ်။

Botox က ဘယ်လောက်ခံလဲဆိုတော့ ပုံမှန်အားဖြင့် ၆လ ခံပါတယ်။ ၆လဝန်းကျင်အကြာမှာ ကြွက်သားဟာ နဂိုမူလအရွယ်အစားကို ပြန်ရောက်မှာဖြစ်တဲ့အတွက် ပြန်ထိုးပေးဖို့ လိုအပ်ပါမယ်။ ပုံမှန် Botox ထိုးတဲ့ သရုပ်ဆောင်အချို့မှာဆိုရင် မျက်နှာအရေးအကြောင်းတွေဟာ ၆လမတိုင်ခင် ပြန်ပေါ်လာတာကို တွေ့ရတတ်ပါတယ်။ အဲ့ဒါကတော့ သရုပ်ဆောင်တွေဟာ မျက်နှာအမူအရာ အရမ်းသုံးရတာ ဖြစ်တဲ့အတွက် မျက်နှာကြွက်သားတွေကို ပုံမှန်လူတွေထက် ပိုညှစ်ထုတ်ရပါတယ်။ ဒါ့ကြောင့် ကြွက်သားဟာ နဂိုအခြေအနေကို ပြန်ရောက်တာ ပိုမြန်တတ်ပါတယ်။

ဘေးထွက်ဆိုးကျိုးကိုလဲ သိချင်ကြပါမှာ။ Botox က ကြွက်သားကို သေးသွယ်ပြေလျော့စေတဲ့အတွက် သိသာတဲ့ အခြားအကျိုးကတော့ ဒီလို ကြွက်သားသေးသွားတာတွေနဲ့ အဓိက ပတ်သက်ပါတယ်။ ဒါတွေဟာ botox ကို သုံးရတဲ့ အများဆုံး အကြောင်းအရင်းတွေပါပဲ။

ပါးနှစ်ဘက်ကို သွယ်လျသွားအောင် ထိုးတဲ့အခါမှာ V ပုံစံ လှလှလေး ပေါ်လာတယ်ဆိုတာ ပါးပေါ်က ကြွက်သားလေးတွေ သေးသွားတာပါ။ ဒီကြွက်သားလေးတွေက ပါးစပ်လှုပ်ရှားမှုမှာ သုံးတဲ့အတွက် ဒီလိုဖြစ်နေစဉ် ခဏတာအတွင်းမှာ အသားကင်လို အစာမာမာဝါးရင် ညောင်းတတ်ပါတယ်။ ကြွက်သားသေးနေတုန်း အားနည်းသွားတာကြောင့်ပါ။ ဒီအတိုင်းပါပဲ ၊ ခြေသလုံးသွယ်သွားအောင် ထိုးထားတဲ့ အချိန် ၂ပတ်ကနေ ၁လအတောအတွင်းမှာ ခြေထောက်အားကစား ပြင်းပြင်းထန်ထန် မလုပ်ဖို့ လိုအပ်ပါတယ်။ ကြွက်သားတွေ သွယ်ကာစမှာ ချက်ခြင်းကြီး ပြန်မရုန်းခိုင်းတာအကောင်းဆုံးပါ။

Botox ဆက်မထိုးတော့ရင် ပိုဆိုးသွားမှာလားဆိုပြီး တချို့ကလည်း မေးကြပါတယ်။၊ ဒါကတော့ ဟိုးအရင် generation အဟောင်း Botox တွေမှာတော့ ကြားဖူးပါတယ်။ Korea Botox အကောင်းစားတွေမှာတော့ ဒါမျိုး မရှိပါဘူး။ တချို့ဆို ၆လတစ်ကြိမ် ပုံမှန်သုံးရင်းနဲ့ နောက်ပိုင်းမှာ သိပ်ပြီး Botox dose တင်ဖို့မလိုပဲ နေလို့ရသွားတဲ့သူတွေတောင် ရှိပါသေးတယ်။

Botox ရဲ့ ဆောင်ရန် ရှောင်ရန်တွေလည်း တစ်ခါတည်း မှာပေးချင်ပါတယ်။ Botox ထိုးပြီးပြီးချင်း ၄နာရီအတောအတွင်းမှာ ရေပြင်ညီလှဲမအိပ်ပါနဲ့။ အိပ်ရာထဲ လှဲတာတို့ ဘာတို့ မလုပ်သေးပဲ ခန္ဓာကိုယ်ကို အတဲ့ပုံလေး၊ တစ်စောင်းသက်သက်သာသာပုံလေးမှာပဲ နေပါ။ ထိုး ပြီးရှောင်ရန်မှာ Botox ထိုးပြီး ၂၄နာရီအတွင်း alcohol သောက်ခြင်း၊ လေ့ကျင့်ခန်း အပြင်းအထန်လုပ်ခြင်းများကို ရှောင်ရပါမယ်။

Botox ထိုးထားပြီး ၁လလောက်အတွင်းမှာ ထိုးထားတဲ့ နေရာတွေကို နှိပ်နယ်တာ ရှောင်ပေးပါ။ ဥပမာ မျက်နှာအရေးအကြောင်းအတွက် ထိုးထားမယ်ဆိုရင် face massage နှိပ်တဲ့အခါမှာ Botox ထိုးထားတဲ့နေရာလေးတွေကို ရှောင်နှိပ်ခိုင်းဖို့ လိုပါမယ်။ တကယ်လို့ alcohol သောက်တတ်တဲ့သူ၊ ဝိုင် တို့ဘာတို့ပဲ ဖြစ်ဖြစ် သောက်လေ့ရှိတယ်ဆိုရင် သောက်နှုန်းလေးကို လျော့ပေးနိုင်မယ်ဆိုရင် အဆင်ပြေပါတယ်။

Botox ဟာ ကြွက်သားကို သေးသွယ်ဖြေလျော့ပေးတာဖြစ်တဲ့အတွက် ကြွက်သားကို ပြန်ပြီး များများ လှုပ်စေမယ်ဆိုရင် ပြန်ကြီးလာတာ မြန်စေပါတယ်။ ဥပမာ V shape Botox ထိုးထားပြီး ပီကေတွေ ခဏခဏ ဝါးနေမယ်ဆိုရင် ပါးနှစ်ဖက်က ကြွက်သားတွေကို ခဏခဏ ပြန်သုံးတာ ဖြစ်တဲ့အတွက် မျက်နှာပြန်ပြည့်လာတာ မြန်တတ်ပါတယ်။

ကဲ … ဒီလောက်ဆို Botox အကြောင်းလေးကို သိကြပြီ ထင်ပါတယ်နော်။ နောက်နောင်မှာလည်း အလှအပရေးရာဗဟုသုတလေးတွေကို တင်ဆက်ပေးသွားပါဦးမယ်။

Ref: Der Celebrity
Team (ရိုးရာလေး)

Share this post

ရိုးရာလေးတွင် ဖော်ပြပါရှိသော ဆောင်းပါးများကို မည်သည့် Website နှင့် Social Media များပေါ်တွင်မှ ပြန်လည်ကူးယူဖော်ပြခွင့်မပြုကြောင်း အသိပေးအပ်ပါသည်။ အသေးစိတ်အချက်အလက်များကို ဤနေရာတွင်ဖတ်ရှုနိုင်ပါသည်။

Leave a Reply

scroll to top