လူမှုကွန်ရက်ပေါ်ကဗန်းစကားများ

ဗန်းစကားဆိုတာက ဘာသာစကားအများစုမှာ ရှိနေပါတယ်။ အင်္ဂလိပ်လိုကတော့ slang ပေါ့။ ဆိုလိုရင်းတစ်ခုကို မူရင်းအသုံးအမှန်ရှိနေပေမဲ့ အလွယ်ပြောစကားအနေနဲ့သုံးတာဖြစ်လို့ ဗန်းစကားတွေမှာက ပေါ့ပေါ့ပါးပါးသဘောမျိုး ပါနေတတ်ပါတယ်။

ကျွန်တော်တို့မြန်မာစကားမှာလည်း ဗန်းစကားအတော်များများရှိပြီး အခုဖော်ပြပေးတာကတော့ ဒီနေ့ခေတ် လူမှုကွန်ရက်သုံးစွဲသူတွေအကြား အသုံးများနေတဲ့ဗန်းစကားတချို့ရဲ့အကြောင်းပါ။ ထူးထူးခြားခြားရင့်သီးရိုင်းစိုင်းတဲ့အသုံးတွေလည်းမဟုတ်တာမို့ စာဖတ်ပရိသတ်တွေအတွက် ဗဟုသုတတစ်ခုအနေနဲ့တင်ဆက်ပေးတာဖြစ်ပါတယ်။ သိပြီးသားသူတွေရှိနိုင်ပေမဲ့လည်း တချို့အသုံးတွေကို မသိထားသေးတဲ့သူတွေအဖို့ ပေါ့ပေါ့ပါးပါးအသိအမြင်တစ်ခုရစေဖို့ ရည်ရွယ်တာပါ။ စာဖတ်သူသိထားတဲ့ ဗန်းစကားတွေရှိရင်လည်း မူရင်းအဓိပ္ပာယ်နဲ့တကွ မျှဝေပေးခဲ့ဖို့ ဖိတ်ခေါ်ပါရစေ။ ဖတ်ရှုကြည့်လိုက်ပါဦး…။

၁။ ကွီး – ကိုကြီး ဆိုတဲ့စကားလုံးကို အသံချုံပြီးခေါ်လိုက်တဲ့သဘောပါ။
မွီး – မကြီး ဆိုတာကိုလည်း ခုလိုချုံ့လိုက်ပြီး သုံးပါတယ်။
ညေး – ညီလေး ကို ဆိုလိုချင်တာပါ။
ခေး – ကလေး လို့ခေါ်ရတာကို ရှည်တယ်လို့ ယူဆတယ်ထင်ပါရဲ့။ ဒီစကားလုံးတွေက အတော်လေးအသုံးတွင်နေပြီမို့ အထူးတလည်ရှင်းနေဖို့တောင် မလိုလှပါဘူး။

၂။ ဂေါ်တာပေါ့
ထူးထူးခြားခြားပုံစံ၊ ထူးထူးခြားခြားအဖြစ်သနစ်တစ်ခုခုကို ချီးကျူးဝမ်းမြောက်မိတဲ့သဘောနဲ့ ပြောလေ့ရှိကြပါတယ်။

၃။ လေပါတယ်
ကိစ္စတစ်ခုခု၊ လူတစ်ယောက်ယောက်ကြောင့် စိတ်ပျက်စရာဖြစ်ရတဲ့အခါပြောလေ့ရှိကြတဲ့စကားပါ။

၄။ အလွင့်
ဒါကိုတော့ ဂေါ်တယ် ဆိုတာထက်ပိုတဲ့သဘောမျိုးမှာ သုံးတတ်ကြပါတယ်။ ကိုယ်တိုင်ကြုံရတဲ့ သို့ တခြားသူတစ်ဦးရဲ့ ထူးခြားဆန်းပြားတဲ့ ဖြစ်ရပ်မျိုး၊ အလုပ်မျိုးကို မော်ကြွား/အားကျပြီးပြောလိုတဲ့သဘောမျိုးလည်း ပါဝင်နေပါတယ်။

၅။ ထိရှ
သူတစ်ပါးပြောလိုက်တဲ့အကြောင်းကိစ္စတစ်ခုခုက ကိုယ့်အဖြစ်နဲ့ တိုက်ဆိုင်မှန်ကန်နေခဲ့ရင် ဒီစကားကို သုံးတတ်ကြပါတယ်။

၆။ လစ်
စိတ်နဲ့ကိုယ်နဲ့မကပ်ဘဲဖြစ်နေတဲ့အခြေအနေမျိုးကို ဒီစကားနဲ့ ခိုင်းနှိုင်းပုံဖော်ကြပါတယ်။

၇။ ကြွေ
ပစ္စည်းတစ်ခုခု၊ လူတစ်ယောက်ယောက်ကို ကိုယ့်အနေနဲ့ အလွန်အမင်းသဘောကျမိသွားတဲ့အခါမျိုးမှာ ကြွေတယ်/ပြီ လို့ သုံးကြပါတယ်။

၈။ ပလစ်
ဂရုမမူ၊ လျစ်လျူရှုထားတဲ့သဘောကို ဆိုလိုတဲ့စကားပါ။ အထူးသဖြင့် မိန်းကလေးတွေ ပိုပြီးသုံးတတ်ကြပါတယ်။

၉။ ဝေးလိုက်တာ
အကြောင်းကိစ္စတစ်ခုခုကို လေ့လာလုပ်ကိုင်ရာ၊ နားထောင်ရာမှာ အလွယ်တကူသဘောမပေါက်နိုင်ဖြစ်နေသူတွေကို ပြောကြလေ့ရှိပါတယ်။

၁၀။ ဆေးထိုး/ ဆေးမိ
သူငယ်ချင်းတွေအချင်းချင်းအကြားမှာတော့ ရေပန်းစားလွန်းတဲ့စကားလုံးပါ။ အများအမြင်မှာ ရယ်စရာဖြစ်သွားအောင် တမင်လုပ်တဲ့ကိစ္စမျိုး၊ ရယ်စရာဖြစ်သွားအောင်အလုပ်ခံရတဲ့ကိစ္စမျိုးဆို ဒီစကားလုံးကိုသုံးကြပါတယ်။

၁၁။ တာဇံ
(လူမှုကွန်ရက်ပေါ်မှာ) အများတကာဆွေးနွေးပြောဆိုနေတဲ့အကြောင်းတစ်ခုခုကို ခြေခြေမြစ်မြစ်မသိထားဘဲ လူတတ်ကြီးလုပ် ဝင်ပြောလေ့ရှိတဲ့သူ၊ မဟုတ်တာတွေကို အတည်ပေါက်နဲ့ ပြောနေ၊ မျှဝေနေတတ်သူမျိုးကို အပြောင်အပျက်သဘောနဲ့ တာဇံ (တောတွင်းနေလူသား) လို့ ခေါ်လေ့ရှိကြပါတယ်။

၁၂။ ဆရာကြီး
နေရာတကာမှာ ငါသိ၊ ငါတတ် အမြဲလုပ်တတ်သူမျိုးကို တမင်ရွဲ့ပြီးခေါ်တဲ့ အသုံးဖြစ်ပါတယ်။ ဒါကြောင့် ဒီလိုအခေါ်ခံရရင် သတိထားပြီး ပီတိဖြစ်သင့်ငြောင်းပြောပါရစေ။

၁၃။ ပလပ်ကျွတ်
ပလပ်ခုံကနေ ပလပ်ခေါင်းကျွတ်သွားရင် မီးမလင်းနိုင်တော့ပါဘူး။ အလားတူပဲ စိတ်ဖိစီးမှု ဒါမှမဟုတ် အရက်သေစာသောက်စားမှုကြောင့် စိတ်နဲ့ကိုယ်မကပ်တော့ဘဲ ပြောချင်ရာ၊ လုပ်ချင်ရာတွေ လျှောက်ပြော၊ လျှောက်လုပ်နေတဲ့သူမျိုးကို ဒီစကားနဲ့ဖော်ညွှန်းပြောဆိုလေ့ရှိကြပါတယ်။

ဒီနေ့အတွက်တော့ ဒီလောက်ပါပဲ။ နောက်ရက်တွေမှလြည်း ခုလိုပေါ့ပေါ့ပါးပါးအကြောင်းအရာလေးတွေကို ရှာဖွေတင်ဆက်ပေးသွားဦးမှာမို့ ဆက်လက်အားပေးပါဦး…။

TH (ရိုးရာလေး)