၂၀၂၂ ခုနှစ် တရုတ်နိုင်ငံ၊ ယူနန်ပြည်နယ်မှ အာဏာပိုင်တွေဟာ နီကျူးမြစ် ချောက်နက်ပိုင်းမှာတည်ရှိတဲ့ နီကျူးဟဲရွာမှ ကလေးတွေ ကျောင်းတက်ဖို့အတွက် စွန့်စွန့်စားစား တောင်တက် သွားလာစရာ မလိုအောင် ၂၆၈ မီတာမြင့်တဲ့ ဓာတ်လှေကားတစ်စင်း တည်ဆောက်ပေးခဲ့ပါတယ်။
နီကျူးဟဲရွာမှ ကလေးတွေဟာ ကွမ်ကျဲရွာမူလတန်းကျောင်းကို ကျောင်းအိပ်ကျောင်းစား သွားတတ်ရပြီး ၃ ပတ်ကို တစ်ခေါက်လောက် ၃ နာရီကြာ တောင်တက်ခရီးစဉ်ကို ဖြတ်သန်းရလေ့ရှိပါတယ်။ ချင်းယွန်းလို့ အမည်ပေးထားတဲ့ (Qingyun Ladder) ဓာတ်လှေကားကို ဆောက်လုပ်ပေးခဲ့ပြီးနောက်ပိုင်း ကလေးတွေ ကျောင်းတက်ဖို့ ပိုမိုလွယ်ကူသွားခဲ့ပါတယ်။
စတင်ဖွင့်လှစ်ချိန်မှာ နိုင်ငံတကာသတင်းတွေအထိ ဖော်ပြခံခဲ့ရတဲ့ ချင်းယွန်းဓာတ်လှေကားဟာ လူကြိုက်များလွန်းခဲ့ပြီး ကမ္ဘာလှည့်ခရီးသည်တွေတောင် ရှုခင်းကြည့်ရင်း ဓာတ်လှေကား လာစီးလေ့ရှိပါတယ်။ ဓာတ်လှေကားစီးဖို့ တန်းစီစောင့်ဆိုင်းနေရတာကြောင့် ယူနန်ပြည်နယ် အာဏာပိုင်တွေက ချင်းယွန်းဓာတ်လှေကားနဲ့အပြိုင် နောက်ထပ်လေဟာပြင် ဓာတ်လှေကားတစ်စီးကို ထပ်မံတည်ဆောက်ခဲ့ကြပါတယ်။
ဖူယောင်ဓာတ်လှေကား (Fuyao Ladder) ဟာ ချောက်နက်အောက်ခြေကနေ တောင်ထိပ်အထိ ၉၄၅ ပေ မြင့်မားပြီး ကမ္ဘာ့အံ့အားသင့်ဖွယ် အကောင်းဆုံးလေဟာပြင် ဓာတ်လှေကားတစ်စီး ဖြစ်လာခဲ့ပါတယ်။ ဖူယောင်ဓာတ်လှေကားဟာ ချင်းယွန်းဓာတ်လှေကားထက် လမ်းကြောင်းအရှည် မီတာ ၂၀ ပိုများပေမဲ့ ပိုမြန်သလို ပိုလည်း ကျယ်ဝန်းပါတယ်။
ကျောင်းသား/သူလေးတွေဟာ လေဟာပြင်ဓာတ်လှေကားဆီကို ရောက်ဖို့ ကြိုပို့ယာဉ်နဲ့ ကေဘယ်ကားစီးရပါတယ်။ ဒါပေမဲ့ အရင်တုန်းက ကျောင်းကို ရောက်ဖို့ ၃ နာရီကြာ တောင်တက်ခဲ့ရတာနဲ့ယှဉ်ရင်တော့ အချိန်ကုန်၊ လူပန်းဖြစ်မှု သက်သာသွားခဲ့ပြီး နာရီဝက်နဲ့ကျောင်းကို အရောက်သွားနိုင်နေပါပြီ။
Ref: China Builds 288-Meter Outdoor Elevator to Help Children Reach School Easier
NZ (ရိုးရာလေး)
