အင်ဒိုနီးရှားနိုင်ငံမှာ သမုဒ္ဒရာထဲကနေ ပလတ်စတစ်အမှိုက်တွေ ဖယ်ရှားရှင်းလင်းပေးတဲ့ တံငါသည်တွေကို လုပ်အားခပေးနေပါပြီ။ ပလတ်စတစ်အမှိုက် ရှင်းလင်းပေးတဲ့ တံငါသည်တွေကို လုပ်အားခပေးဖို့ ရန်ပုံငွေ အမေရိကန်ဒေါ်လာ ၇၀၀၀၀ (သို့) ရူပီး ၁ ဘီလျံ လျာထားတယ်လို့ အင်ဒိုနီးရှားနိုင်ငံ ငါးလုပ်ငန်း ဝန်ကြီးဌာနက အောက်တိုဘာလ ၄ ရက်မှာ ကြေညာခဲ့တာပါ။
အင်ဒိုနီးရှားနိုင်ငံဟာ သမုဒ္ဒရာထဲကို ပလတ်စတစ်စွန့်ပစ်ပစ္စည်း အများဆုံး ရောက်ရှိစေတဲ့ နိုင်ငံတစ်နိုင်ငံ ဖြစ်ပြီး အဲဒီနာမည်ဆိုးကို ဖယ်ရှားဖို့အတွက် လာမယ့် ၃ နှစ်အတွင်း အမေရိကန်ဒေါ်လာ ၁ ဘီလျံ သုံးစွဲသွားမှာပါ။ သူတို့ရဲ့ကမ်းခြေတွေကနေ သမုဒ္ဒရာတွေထံ ပလတ်စတစ်အမှိုက် မျောပါမှုကို ၇၀ ရာခိုင်နှုန်းအထိ လျှော့ချသွားမယ်လို့ ဆိုပါတယ်။
ကျွန်းမကြီးရဲ့ ကမ်းလွန်ဘက်မှာ တစ်နေ့ကို ပလတ်စတစ်အမှိုက် ၄ ကီလိုဂရမ်အထိ ဖယ်ရှားရှင်းလင်းပေးနိုင်တဲ့ တံငါသည်တွေကို အင်ဒိုနီးရှားအစိုးရက တစ်နေ့ လုပ်အားခ ဒေါ်လာ ၁၀ ပေးအပ်သွားမှာပါ။ အဲဒီငွေပမာဏဟာ တံငါသည်တစ်ယောက် ငါးဖမ်းပြီး ဈေးထဲမှာ သွားရောင်းလို့ရတဲ့ ဝင်ငွေထက် အနည်းငယ်ပိုများပါတယ်။
” ကြိုတင်ကာကွယ်မှုက အရေးအကြီးဆုံးပါပဲ။ ကြိုတင်ကာကွယ်မှုကို ထိထိရောက်ရောက်လုပ်နိုင်ရင် သမုဒ္ဒရာထဲမှာ စွန့်ပစ်အမှိုက်တွေ ရှိတော့မှာ မဟုတ်ပါဘူး။ သမုဒ္ဒရာထဲကို အမှိုက်တွေ ရောက်သွားတာနဲ့ ထိခိုက်ပျက်စီးတော့တာပါပဲ”လို့ အင်ဒိုနီးရှားနိုင်ငံ ငါးလုပ်ငန်းဝန်ကြီး ဆာတီဝါယုထရင်ဂိုနိုက ဆိုပါတယ်။
Ref:Fishermen Getting Paid to Collect Plastic Trash at Sea, As Indonesia Slashes Pollution
NZ (ရိုးရာလေး)
