ဖေဖော်ဝါရီပွဲကျပ်ကာလမှာ မန်စီးတီးအသင်း ရလဒ်ကောင်းတွေ ရယူနိုင်ခဲ့ရင် ပရီးမီးယားလိဂ် ချန်ပီယံဆုအတွက် ဂိုးကွာခြားချက်နဲ့ ဆုံးဖြတ်ရမယ့် အခြေအနေမျိုး ဖြစ်လာနိုင်တယ်လို့ မန်စီးတီးနည်းပြ ဂွာဒီယိုလာက ပြောပါတယ်။
မန်စီးတီးဟာ ဖေဖော်ဝါရီလ ၇ ရက် မြန်မာစံတော်ချိန် ၂ နာရီ ၁၅ မိနစ်အချိန်မှာ ကစားမယ့် အဲဗာတန်နဲ့ပွဲစဉ်ကို အနိုင်ရခဲ့ရင် (လီဗာပူးအသင်းထက် တစ်ပွဲပိုကစားပြီး)ဂိုးကွာခြားချက်အရ အမှတ်ပေးဇယား ထိပ်ဆုံးနေရာကို တက်လှမ်းနိုင်မှာဖြစ်ပါတယ်။ အမှတ်ပေးဇယား ထိပ်ဆုံးနေရာက လီဗာပူးဟာ နောက်ဆုံးကစားခဲ့တဲ့ ပွဲစဉ် ၂ ပွဲမှာ လက်စတာ၊ ဝက်စ်ဟမ်းတို့ကို သရေကျခဲ့လို့ ၄ မှတ်လျော့ခဲ့ပြီး မန်စီးတီးကို ၃ မှတ်ပဲ ဖြတ်နိုင်တဲ့ အခြေအနေ ဖြစ်လာပါတယ်။
မန်စီးတီးဟာ ၂၀၁၂ ခုနှစ်၊ ၂၀၁၄ ခုနှစ်တွေက ပရီးမီးယားလိဂ် နောက်ဆုံးနေ့ ပွဲစဉ်တွေ ကစားပြီးမှ ချန်ပီယံဖလား ဆွတ်ခူးနိုင်ခဲ့တာပါ။ ” နောက်ဆုံးနေ့ ပွဲစဉ် ဒါမှမဟုတ် နောက်ဆုံးပွဲစဉ် ၂ ပွဲကျမှ ဘယ်အသင်း ချန်ပီယံဖြစ်မလဲဆိုတာ ပြောနိုင်ပါလိမ့်မယ်။
ပရီးမီးယားလိဂ် ချန်ပီယံဆုအတွက် ဂိုးကွာခြားချက်နဲ့ ဆုံးဖြတ်ရနိုင်တယ်ဆိုတဲ့ အမြင်ကို ကျွန်တော် သဘောတူပါတယ်။ ဒါပေမဲ့ ကျွန်တော့် ကစားသမားတွေကို ၅ ဂိုးပြတ်နိုင်အောင် ကစားလို့ ပြောတာမဟုတ်ပါဘူး။ အရေးအကြီးဆုံးက နိုင်ပွဲရဖို့ပါပဲ။ ပြီးရင်တော့ ဂိုးသွင်းနိုင်သလောက် သွင်းပေါ့။ ဒါမှမဟုတ်လည်း ဂိုးမပေးရအောင် ကစားပေါ့။ ပြီးခဲ့တဲ့ ၃၊ ၄ ရက်မှာ ကျွန်တော်တို့တွေ အဲဒီလို လုပ်နိုင်ခဲ့ပါတယ်။ လီဗာပူးက တောက်လျှောက်ဦးဆောင်ခဲ့ပေမဲ့ အခုတော့ ကျွန်တော်တို့ ဦးဆောင်နိုင်လောက်တဲ့ အခြေအနေ ဖြစ်လာပါပြီ”လို့ ဂွာဒီယိုလာက ပြောပါတယ်။
Nz (ရိုးရာလေး)
