ဖုန်းအသိမ်းခံရတဲ့ ကျောင်းသူက ဒေါသထွက်ပြီး မီးရှို့ခဲ့ရာကနေ ကျောင်းအဆောင် မီးလောင်ခဲ့တာဖြစ်မယ်လို့ ဂူယာနာနိုင်ငံ အာဏာပိုင်တွေက ဆိုပါတယ်။ ပြီးခဲ့တဲ့ တနင်္လာနေ့ နံနက်အစောပိုင်းက ဂူယာနာနိုင်ငံအလယ်ပိုင်း မာဒီယာမြို့မှာ ကျောင်းအဆောင် မီးလောင်ခဲ့လို့ ကျောင်းသူအများစုအပါအဝင် လူ ၁၉ ဦး သေဆုံးခဲ့ပါတယ်။
အဆောင် ရေချိုးခန်းကနေ မီးစတင် လောင်ကျွမ်းခဲ့တာဖြစ်ပြီး အဆောင်တံခါး သော့ခတ်ထားတာကြောင့် ပိတ်မိခဲ့ကြတာ ဖြစ်ပါတယ်။ မီးလောင်နေချိန်မှာ အဆောင်မှူးက အထိတ်တလန့်ဖြစ်နေပြီး သော့ရှာမတွေ့ခဲ့ပါဘူး။ ဒါကြောင့် မီးသတ်သမားတွေက အဆောင်နံရံကို ဖြိုဖျက်ဝင်ရောက်ပြီး ပိတ်မိနေသူတွေကို ကယ်တင်ခဲ့ရပါတယ်။
မီးရှို့ခဲ့ဖွယ်ရှိတဲ့ ကျောင်းသူဟာ သူ့ထက် အသက်ကြီးတဲ့ အမျိုးသားတစ်ဦးနဲ့ ချစ်ကြိုက်နေတာကြောင့် ဖုန်းအသိမ်း ခံခဲ့ရတာပါ။ အဆောင် မီးလောင်ခဲ့တဲ့ဖြစ်ရပ်မှာ ဒီကျောင်းသူဟာ မီးလောင်ဒဏ်ရာတွေ ရရှိခဲ့ပြီး ဆေးရုံမှာ ကုသမှု ခံယူနေရပါတယ်။ အဆောင်ကို သူ မီးရှို့ခဲ့တာလို့ ကျောင်းသူက ဝန်ခံခဲ့ကြောင်း သတင်းတွေက ဖော်ပြပါတယ်။
မီးလောင်ချိန်မှာ အဆောင်အတွင်း ကျောင်းသူ ၅၇ ယောက် ရှိနေပြီး သေဆုံးသူအများစုဟာ တိုင်းရင်းသူတွေပါ။ မီးလောင်ကျွမ်းမှု အလွန်ပြင်းထန်လွန်းတာကြောင့် သေဆုံးသူတွေကို ခွဲခြားဖို့ DNA စစ်ကြည့်ရမယ်လို့ ဆိုပါတယ်။
Ref: Guyana school fire: Pupil suspected of starting deadly blaze over ‘confiscated phone’
NZ ( ရိုးရာလေး)
