အဲလစ်ဇဘက်ဘုရင်မကြီးရဲ့ခေါင်းတလားကို ဝက်စ်မင်စတာ ခန်းမကြီးဆီ စီတန်းလှည့်လည်သယ်ဆောင်လာတဲ့ပွဲမှာ ဝေလမင်းသား ဝီလျံရဲ့ကြင်ရာတော် ကိတ် မစ်ဒယ်တန်ဟာ လက်ဝတ်ရတနာတွေကို ဂရုတစိုက်ရွေးချယ်ဝတ်ဆင်လာပြီး ဂါရဝပြုခဲ့ပါတယ်။ ကိတ်ရဲ့အနက်ရောင်ဝတ်စုံမှာ ချိတ်တွယ်လာခဲ့တဲ့ ရင်ထိုးက ဘုရင်မကြီးရဲ့စိန်နဲ့ပုလဲသစ်ရွက်ပုံရင်ထိုး (သစ်ရွက်ရဲ့အလယ်မှာ ပုလဲ (၃) လုံးပါဝင်တဲ့ ရင်ထိုး) ပါ။ ဒါက ဘုရင်မကြီးရဲ့လူသိများဆုံးရင်ထိုးတွေထဲက တစ်ခုမဟုတ်ပေမဲ့ မြင်တွေ့ရခဲပါတယ်။
![](https://yoyarlay.com/wp-content/uploads/2022/09/15.9-2022-yyl-06.jpg)
၁၉၉၉ ခုနှစ်၊ ဆိုးလ်မြို့မှာ ဘုရင်မကြီးက အဝါရောင်ဝတ်စုံပေါ် ဒီရင်ထိုးတပ်လာခဲ့တာ တွေ့မြင်ခဲ့ရပါတယ်။ ဒါပေမဲ့ နောက်ပိုင်းမှာ ဘုရင်မကြီးက ကိတ်ကို ဒီရင်ထိုးပေးခဲ့တယ်လို့ သိရပါတယ်။ ကိတ်က ဒီရင်ထိုးကို ဘယ်လ်ဂျီယံနိုင်ငံ အလည်အပတ်သွားတော့ ဆင်မြန်းခဲ့တာကို တွေ့ရပါတယ်။
![](https://yoyarlay.com/wp-content/uploads/2022/09/15.9-2022-yyl-07.jpg)
ဒီရင်ထိုးက ဘုရင်မကြီး ပိုင်ဆိုင်ခဲ့တဲ့အရာဖြစ်တဲ့အတွက် အဓိပ္ပာယ်ရှိရုံသာမက ပုလဲတွေကို ဝမ်းနည်းပူဆွေးတဲ့အချိန်မှာ မကြာခဏဝတ်ဆင်လေ့ရှိတာကြောင့်လည်း ကောင်းတဲ့ရွေးချယ်မှုတစ်ခုပါပဲ။ ကိတ်က ဒီရင်ထိုးကို ဗြိတိန်က အောက်မေ့ဖွယ်ပွဲတော်တစ်ခုအတွက် ဝတ်ဆင်ခဲ့ဖူးပါတယ်။
![](https://yoyarlay.com/wp-content/uploads/2022/09/15.9-2022-yyl-08.jpg)
ကိတ်က ဘုရင်မကြီးရဲ့ရင်ထိုးအပြင် ဒိုင်ယာနာမင်းသမီးရဲ့နားကပ်ကိုလည်း ဝတ်ဆင်လာခဲ့ပါတယ်။ ဘယ်လ်ဂျီယံက The Passchendaele Commemorations ပွဲမှာလည်း ကိတ်က အဲဒီရင်ထိုးနဲ့နားကပ်တွေကို ဝတ်ဆင်ခဲ့ဖူးပါတယ်။
![](https://yoyarlay.com/wp-content/uploads/2022/09/15.9-2022-yyl-09.jpg)
ကိတ်က ဘုရင်မကြီး လက်ဆောင်ပေးတဲ့ ပစ္စည်းတွေကို ဝတ်ဆင်တာ ဒါက ပထမဆုံးအကြိမ်မဟုတ်ပါဘူး။ ဝီလျံမင်းသားနဲ့မင်္ဂလာဆောင်တဲ့အချိန်မှာ ဘုရင်မကြီးရဲ့သရဖူတွေထဲက တစ်ခုဖြစ်တဲ့ Cartier သရဖူကို ဝတ်ဆင်ခဲ့ပါတယ်။ ပြီးခဲ့တဲ့နှစ်က ဖီလစ်မင်းသားရဲ့ဈာပနပွဲမှာလည်း ကိတ်က ဘုရင်ကြီးရဲ့လေးတန်းပုလဲလည်ဆွဲကို ဝတ်ဆင်ခဲ့ပါတယ်။
မကြာသေးခင်ကလည်း ကိတ်က ဘက်ကင်ဟမ်နန်းတော်မှာ ဘုရင်မကြီးရဲ့ခေါင်းတလားကို ကြည့်ဖို့လာတော့ ဘုရင်မကြီးရဲ့ပုလဲဆွဲကြိုးနဲ့နားကပ်ကို ဝတ်ဆင်ခဲ့ပါတယ်။
Ref: Metro “Kate Middleton wears the Queen’s diamond and pearl leaf brooch and Princess Diana’s pearl earrings to the procession of the Queen’s coffin”
WL(ရိုးရာလေး)